Tung pơla kố nah, Tổng Liên đoân Pêi cheăng Việt Nam hiăng pêi pro hên troăng pêi tơdâng tơ’mô, pêi pro mâu pơkâ, tơdroăng pơkâ mơ’no tung tơdroăng tơpui tơno, tơpui tơno tiô khu pú hên ƀă hiăng châ tơƀrê păng ‘nâng. Troh nôkố, tơdroăng ki môi tuăn pêi cheăng khu pú hên tâi tâng lối 85% tung tâi tâng kơxô̆ mơngế pêi cheăng a mâu khu tê mơdró, tíu pêi cheăng khu kŏng đoân.

Xông tơpui a roh trâm mâ, jâ Võ Thị Ánh Xuân, Phŏ Kăn xiâm hnê ngăn tơnêi têa kheăn kơdeăn khu kăn ƀô̆, kŏng đoân pêi cheăng tối tơdjuôm ƀă 101 kăn ƀô̆ kŏng đoân pêi cheăng kơhnâ rơkê tung tơdroăng tơpui tơno, tơpui tơno tiô khu pú hên tối krê tung pơla kố nah, gum lối 382 rơpâu ngế pêi cheăng châ pơxúa ƀă tâi tâng kơxô̆ liăn tơdâng lối 6 rơpâu rơtal liăn/hơnăm.

Phŏ Kăn xiâm hnê ngăn tơnêi têa mơnhên, mâu tơdroăng châ tơƀrê kố hiăng gum ăm mơngế pêi cheăng ai tơdroăng rêh ối lĕm tro tâ, tơniăn tâ tơrŭm pêi cheăng, cho xiâm rêi vâ mơngế pêi cheăng loi tơngah tung tơdroăng pêi cheăng kŏng đoân, ing mê mơnhên tíu cheăng, hnoăng cheăng dêi khu tơrŭm cheăng Kŏng đoân tung tơrŭm pêi cheăng ƀă khu cheăng kal kí.

Jâ Võ Thị Ánh Xuân, Phŏ Kăn xiâm hnê ngăn tơnêi têa pơkâ thế Tổng Liên đoân Pêi cheăng Việt Nam pơtối pơhlêh nếo ó rơdêi tơkŭm po ƀă troăng pêi cheăng kŏng đoân tiô troăng iâ mơngế, xêt khât, châ tơƀrê, tơmiât troh a xiâm rêi, xo đoân viên ƀă mơngế pêi cheăng pro tíu xiâm. Tơdrêng amê, tơkŭm mơdêk ki dâi lĕm teăng mâ, rak ngăn, gâk kring hnoăng pơkuâ ƀă ki pơxúa tiô luât, tơxâng dêi mơngế pêi cheăng; teăm tơdrêng ‘nâi troăng tơmiât, troăng pói vâ, tơleăng mâu tơdroăng ki tô tuăn sap ing xiâm rêi, gum pro krá tơdroăng loi tơngah ƀă thăm tơrŭm môi tuăn tâi tâng hdroâng mơngế.