A ngiâ plông hngêi trá ton nah, pôa Rơ Châm Nha  krâ pơlê pê ngăn dêi têng nêng  rak dêi môi tiah tơmeăm ki git đi đo ối tung ngôa, tơrêm ngrăng kŏng pêi  rêi dêi a kơxái têng nêng, rêi ăm chuât prông, prŏng. Mâ ngăn hơngế, hmâng dêi  idrâp rêi tơrêm kơxái ki rêi chuât, môi tiah dế hơ’muăn tơdroăng dêi kuăn pơlê ƀă dêi tơná dế ối rơtăm nah.

Mê cho dế 20 hơnăm nah, pôa mot pro du kich a pơlê klêi mê veăng tung khu rơtăm lăm pleăng tơná tơplâ, pêi  hnoăng cheăng pôu chiên phái kế kâ ăm mâu mố đô̆i ki lăm plâ Mih.  

Hơnăm 1968, pôa xo on veăng ƀă potói lăm pro du kich nếo a pơlê. Tung mâu hơnăm tơplâ tơplong, mơhé vâ pá puât to kéa lâi la pôa Rơ Châm Nha xuân môi hiâm môi mơ no tiô Đảng, tiô Pôa Hồ, veăng ‘no hnoăng kum tơplâ pro tơleăng lĕm peăng Hdroh- lâp tơnêi têa tơrŭm môi.

“Mâu hơnăm 1961-1962, a cho ngế rơtăm a pơlê, troh hơnăm 1963 a mot Đoân ƀă troh hơnăm  1965 a châ pơcháu pro Ngế kăn pơkuâ khu du kĭch. Kơhâi pêi cheăng ƀă mâu rơtăm tung pơlê  môi tiah hmâ tê, troh kơmăm, djâ mâu ngế tung khu lăm plâ ‘nhiê a mâu đông xâ. Kăn ƀô̆ ƀă mâu mố đô̆I  drêng mê ôh tá ai ngế djâ mơhno troăng pá lêi vâ prôk lăm. Xua a cho ngế ối a pơlê, a ‘nâi tâi tâng tơdroăng ki xâ plâ ƀă tíu ối hmuâ dêi xâ a kơpong ki lâi , ngo drăng lâi mê a djâ mơhno troăng ăm mố đô̆i lăm plâ xâ tơkŭm tơplâ chiâng kâi ƀlêi”

Tối ‘na hâi lơ 30/4/1975 cho hdró Tơleăng lĕm peăng Hdroh lơ 30/4/1975 – mâ ngăn dêi pôa Rơ Châm Nha, krâ pơlê mê chiâng bâ lĕm, rơkong tó hlo kéa ki hŏn a ngiâ. Pôa thế dêi cháu peăng kuăn kơdrâi Rơ Châm Tứ tôu prôa không  vâ rơtế ƀă pôa rêi têng nêng tiô tơdrá ƀai hơdruê tơnêi têa châ tơleăng lĕm.

“Tơdroăng ki ro rế ro tâ drêng tơnêi têa châ tơleăng lĕm,. Klêi kơ’nâi á plâ xâ klêi, tơnêi têa châ tơleăng lĕm, mâu ngế sap ing mâu hơnăm ối nếo, droh rơtăm kơnốu kơdrâi bô bố pơrá phiu ro môi tiah hiăng châ lêi tah kơxái ki vâi kât, phiu ro rơtế ƀă pơlê cheăm. Pêi pro tơdroăng tiô rơkong krếo thế mơjiâng mâu khu droh rơtăm hnê tối, môi khu pro văn ngê̆, mơđah tơbleăng mơhnhôk tơdroăng tơ’noăng, môi khu lăm pêi cheăng kâ, mơjiâng ‘mâi mơnhông tơnêi têa pơlê cheăm. Ro khât xua châ tơniăn, tŏn chêng koăng, kơ’nhon xoăng hơniâp ro”.

Ƀă pôa Rơ Châm Nha, krâ pơlê, ngê̆ nhân châ rêi prôa, tôu chêng koăng tung rôh tơbâ 51 hơnăm Tơleăng Peăng hdroh, pro tơnêi têa tơrŭm chiâng môi cho rôh ki pôa tâ ro má môi, tíu ki ai idrâp rơtế tơrŭm ƀă tơdroăng hâk tơngăm pơlê cheăm pơhlêh nếo.