Pái khế apoăng hơnăm 2026, kơpong kĭng têa kơxĭ peăng mâ hâi Lo kong pơlê Dak Lak rak tơdroăng ki tơtêk hôm, châ dâng 8%, ƀă tâi tâng ki kơnâ pêt mơjiâng tơmeăm tơkêa châ dâng 1.500 rơtal liăn. Tơdroăng tê mơdró, mơdró môi tơdroăng ƀă ôm hyô ai pơhlêh hôm, tơdah dâng 150.000 – 200.000 roh tơmối, pêi lo liăn châ lối 200 rơtal liăn.

Xông tơpui a roh pêi cheăng, pôa Đỗ Hữu Huy, Kăn hnê ngăn Vi ƀan kong pơlê Dak Lak tối rơdêi, kơpong kĭng têa kơxĭ peăng mâ hâi Lo cho tíu mơnhông cheăng ton xŏn, rak hnoăng tơtêk dêi kong pơlê tung hneăng la ngiâ. Vâ xúa châ tơƀrê tơmeăm ki ai hlâu, pơkâ cho thế tơkŭm tah lôi pá puât, mâu tíu ki kreăng dế mơdât mơnhông mơdêk.