Bêng Phú Thuỷ, kong pơlê Lâm Đồng hiăng châ mơjiâng klêi kơ’nâi ‘mot 3 to bêng, tung mê ai: Phú Thủy, Thanh Hải ƀă Phú Hải, ối tung kong pơlê Bình Thuận hdrối nah. Vêh mơnhên hnoăng cheăng pơhlêh xúa kơxô̆ cho hnoăng cheăng ki xiâm, ki pơhlêh kân, klêi kơ’nâi pơkuâ ngăn tơdroăng cheăng pơkuâ ngăn kuăn pơlê 2 râ, bêng Phú Thuỷ thâ rĕng rah xo mơngế pêi cheăng tung Tôh Ứng Cứu Công nghệ ƀă Nghiệp vụ tơveăng gum vâ chêh bro hlá mơ-éa; mơjiâng 23 Tôh Công nghệ pơlê pơla ai 130 ngế bă mơjiâng túa cheăng Bình dân học vụ số. Ngoh Phan Anh Tiến, kăn pơkuâ hnê ngăn Đoân Droh rơtăm Phú Thuỷ, tối ăm ngin ‘nâi, pơtối mơdêk hnoăng cheăng ki djâ troăng, mơhnŏng pêi pro dêi tơdroăng cheăng tơná, ai lối 4.400 ngế đoân viên droh tơtăm dêi bêng ki djâ troăng ahdrối, thăm mơdêk túa cheăng ki veăng gum ăm kuăn pơlê “xut tah lôi ki plong ‘na kŏng ngê̆”.

“Đoân bêng hmâ đi đo hnê mơhriâm túa cheăng ki xúa kơxô̆ ăm đoân viên droh rơtăm. Mâu Chi đoân troh tơrêm hơlâ, tơgôu tơrêm péa hngêi tơveăng gum ăm mâu vâi miê, vâi xăng, vâi tăm malối ƀă mâu ngế ki hiăng hên hơnăm ƀă mâu ngế ki chó chêng tơvê kŏng chiâng xúa phôn ki rơkê plĕng, chêh tơ’mot mâu tơdroăng ki kal tung VNeID kơlo má 2. ‘Nâi nâp hô sơ tơdrêng tung internet tiô troăng dịch vụ công. Drêng hnê mâu vâi ki hiăng hên hơnăm la ta hâi teăm chiâng vâ xúa kŏng nghê̆, mê athế pơtối hnê hên xoh, hnê chôa ‘lâng vâ mâu vâi miê, vâi tăm, vâi xăng, vâi meh la lâi chiâng ‘nôi nếo lôi. Tung măng tĭng, Đoân Droh rơtăm bêng hiăng ăm thế mâu khu ki pêi dêi hnoăng cheăng kố ki cheăng a Tíu xiâm chêh bro hlá mơ-éa tơveăng gum kuăn pơlê nâp hô sơ”.

Vâ chê 10 khế hdrối mê hía nah, tơdrêng ƀă tơdroăng ki tơkŭm pơkuâ ngăn hnoăng cheăng, Đảng ủi bêng Phú Thủy, kong pơlê Lâm Đồng hiăng vêh mơnhên păng ‘nâng ki xiâm dêi ki kal dêi tơdroăng xúa kơxô̆ cheăng ki nếo rĕng tâ, xêt khât tâ, ai pơxúa tâ, rơkê tâ ƀă achê ƀă kuăn pơlê hên tâ. Mâu túa cheăng, mâu tơdroăng: “Troăng prôk ki ăm liăn ôh tá xúa liăn mâ”. Roh ki pêi tơdroăng cheăng 60 hâi măng hbru tài khoản định danh điê̆n tưh tơdjêp ƀă tơdroăng pơkâ pêi pro túa: “Rêm kuăn pơlê-Môi to inâi kơxô̆”, ki pêi hên cho 90 hâi măng pro kro, pro krúa mâu tơdroăng ki chêh tối tung măng internet ‘na tơnêi tíu dêi bêng; 90 hâi măng pêi cheăng ‘na chêh ‘măn inâi dêi mâu on veăng ki hiăng xo dêi pó; chêh xo ‘măn mâu tơdroăng ki kal tung phân mềm chêh tơbleăng mâu tơdroăng ki hbrâ tơpâ mơdât on chếo ƀă hên mâu tơdroăng ki ê, ing mê, veăng gum thăm mơdêk ki ai pơxúa kân khât tung pơkuâ ngăn dêi tơnêi têa ƀă tơdroăng ki vâ môi tuăn dêi kuăn  pơlê khu mơdró kâ. Pôa Nguyễn Hữu Thông, Kăn pơkuâ hnê ngăn Đảng ủi bêng Phú Thuỷ, vêh mơnhên, Đảng ủi bêng vêh mơnhên tơdroăng ki xúa kơxô̆ ƀă xúa kŏng ngê̆ thŏng tin tung pêi pro mâu tơdroăng cheăng dêi bêng cho ki kal păng ‘nâng vâ mơnhên tối ivá cheăng dêi mâu kăn, tơdroăng pơkuâ ngăn dêi khu hnê ngăn, ƀă hnoăng pêi cheăng dêi mâu kăn ƀô̆, đảng viên:

 “Ki tơƀrê dêi tơdroăng xúa kơxô̆, xúa ứng dụng kong ngê̆ thong tin tung mơhnhôk thế khu râ, kơvâ cheăng dêi Phú Thuỷ cho tơxâng tơmâng ngăn, pêi pro păng ‘nâng. 100% kơxô̆ kăn ƀô̆, mơngế cheăng ki xúa tung tơdroăng pơkuâ ngăn ‘na hlá mơ-éa điê̆n tưh, chêh bro mâu tơdroăng cheăng tung kơxô̆ tâi tâng. Kơxô̆ ki ‘mâi rơnêu, chêh bro hô sơ trực tuyến tung măng internet dêi bêng châ lối 70%, a mâu kơvâ cheăng ki ê ối hên tâ. Tung hơnăm 2025 túa ki ‘mâi rơnêu tơdroăng cheăng dêi bêng Phú Thuỷ kô ối má 3 tung 124 to cheăm, bêng, kơpong cheăng kâ. Bêng chôa ‘lâng pơhlêh xúa cheăng kơxô̆ hồ sơ ƀă mơjiâng mâu túa hlá mơ-eá ki vâ xúa tơdjuôm, thăm mơdêk tơdroăng ki pêi cheăng a dịch vụ công trực tuyến vâ tơveăng gum tơ’lêi hlâu ăm kuăn pơlê ƀă khu mơdró kâ”.

Vêh mơnhên ki ai păng ‘nâng a hên cheăm, bêng dêi kong pơlê Lâm Đồng ăm hlo, pơhlêh xúa kơxô̆ dế chôa ‘mêng pơhlêh túa ki pơkuâ ngăn. Ki rơhêng vâ tối, drêng ai hên mâu tơdroăng cheăng a mâu cheăm bêng, mê hnoăng cheăng xúa kơxô̆ hiăng chiâng “ivá xiâm” ki kal. Kơnôm xúa ứng dụng kŏng ngê̆ thŏng tin, kăn ƀô̆ mơngế cheăng râ cheăm hiăng rơkê plĕng pêi pro mâu tơdroăng cheăng rĕng tâ, tro tâ, tơdrêng amê, hnối thăm mơdêk tơrŭm ki tơdjêp, pơtroh hlá mơ-eá ƀă kong pơlê rĕng tâ. Vâ kuăn pơlê a kơpơng thôn pơlê, kơpong hơngế hơngo, kơpong kơtiê xahpá dêi kong pơlê ôh tá tro lôi pá rŏng tung hneăng ki pơhlêh cheăng xúa kŏng ngê̆ kơxô̆, mê khu kăn ƀô̆ ki cheăng a cheăm bêng dêi kong pơlê Lâm Đồng hiăng hbrâ pêi cheăng tơbrê tơbrêh hên tâ. Pôa Đặng Thiện Viên, Phŏ Kăn hnê ngăn Vi ƀan cheăm Liên Hương, kong pơlê Lâm Đồng tối ăm ngin ‘nâi:

“A tơnêi tíu Liên Hương cho thôn pơlê, kuăn pơlê ối hmâ chêh bro hlá mơ-eá, chêh ƀă kŏng hên. Dế nôkố, kăn ƀô̆, mơngế cheăng dêi cheăm drêng chêh bro hlá mơ-eá vâi xuân ối pơtối chêh bro hlá mơ-eá ƀă kŏng xuân hnê tối ‘na tơdroăng chêh tơ’mot tung măng internet tiô kơ kŏng ngê̆ kơxô̆ tiô troăng tơdjâ pơkâ thế dêi kong pơlê”.

Hnê pơkâ pêi pro trâu rơdâ Tơdroăng pơkâ kơxô̆ 7 dêi Khu xiâm ngăn ‘na cheăng kal kí, Tơdroăng pơkâ kơxô̆ 71 dêi Chin phuh ‘na pơhlêh túa mơnhông cheăng khoa hok, kŏng ngê̆, pơhlêh nếo tung rơkê plĕng ƀă pơhlêh nếo ‘na kơxô̆ dêi tơnêi têa, kong pơlê Lâm Đồng dế thăm mơdêk pơhlêh kơxô̆ tiô Tơdroăng tơkêa pêi pơla sap ing hơnăm 2026-2030. Tung mê, vêh mơnhên troăng hơlâ kơxô̆ ƀă mâu tơdroăng chêh tối kơxô̆ cho ki xiâm dêi tơdroăng cheăng; tơkŭm mơnhông Tíu xiâm rak ‘măn mâu kế tơmeăm tro tiô chal nếo, tơdrêng; mơjiâng chêh ‘măn mâu tơmeăm khoăng ki tơniăn “tro, tŭm, krúa, kal, môi tiah, xúa tơdjuôm” vâ tơrŭm cheăng, vâ pơtroh dêi pó châ tơƀrê pơla mâu kơ koan, mâu tíu cheăn ƀă hên mâu tíu ki ê. Pôa Võ Thành Công, Kăn ngăn ‘na Cheăng Khoa hok ƀă Kŏng ngê̆ kong pơlê Lâm Đồng tối ăm ngin ‘nâi:

“Tíu pơkuâ cheăng dế pơkâ pêi pro tơdroăng tơkêa bro mâu tơdroăng ki mơnhên tiô kơ tơnêi tíu ki xúa tơdjuôm. Tơdroăng tơkêa bro kố cho ki xiâm dêi hnoăng cheăng ki kân ki ai tơdjâk troh 11 tíu cheăng, khu râ cheăng. Klêi kơ’nâi tơdroăng tơkêa bro kố hiăng chiâng cho tơmeăm khoăng ki tơdjuôm dêi lâp kong pơlê, tung mê, kô ai mâu phân mêm ki chêh tro tiô tơdroăng pơkâ dêi khu râ, kơvâ cheăng, ki pơtroh troh a khu kơmăi, măng internet vâ vêh mơnhên, pro leăng ‘na hnoăng cheăng pơkuâ ngăn, hnê tơdjâ pêi pro tơdroăng cheăng”.

Ƀă mâu tơdroăng ki kơdo mơ-eăm tung pơhlêh kơxô̆ mê, troh nôkố, ai 100% tơdroăng ki chêh bro hlá mơ-eá râ kong pơlê ƀă râ cheăm dêi kong pơlê Lâm Đồng hiăng kring vế tơniăn tơdroăng ki tơdah xo, tơleăng mơnhên, mơdrếo mâu tơdroăng ki chêh bro hlá mơ-eá mê adrêng, môi tuăn tung lâp kong pơlê. Kơlo ki kơxô̆ hô sơ, ki tơƀrê dêi tơdroăng chêh bro hlá mơ-eá mê hiăng pêi kêi deăng vâ chê 90%. Kơlo ki vêh mơnhên, tí tăng ‘nâi, xúa mâu tơdroăng nếo ai, kơxô̆ tâi tâng châ vâ chê 93%. Lâm Đồng dế nốkố ai lối 14.000 túa hlá mơ-eá ki ai chư kĭ kơxô̆ ki tiah hmâ xúa. Ing mê ah, prôk troh tơdroăng ki mơjiâng khu kăn hnê ngăn xúa kơxô̆, pêi cheăng kâ kơxô̆ ƀă pơlê pơla kơxô̆, kong pơlê dế pơtối kơdo mơ-eăm mơ’no liăn, thăm rôe xo hên mâu khu kơmăi, troăng hyôh internet, tơdrêng amê, hnối thăm mơnhông tơdroăng hnê mơjiâng, hnê mơhriâm ăm mâu khu kăn ƀô̆, mơngế pêi cheăng vâ thăm rế mơdêk hên tâ nếo hnoăng veăng ki gum ăm kuăn pơlê, khu mơdró kâ.