A cheăm Ia Băng, kong pơlê Gia Lai, tíu xiâm dêi troăng kân, ăm rơxế kơtâu têi ing Quy Nhơn troh  a Pleiku, maluâ dế tung pơla hneăng pơtê leh, idrâp kơmăi gu, kơmăi kui xuân dế ối chuât rơdêng plâ hâi plâ măng. Tơrêm khu rơxế kân pơtăng dêi rơpó gu pro tơbăng gâ troăng a mâu tíu ki hiăng xo tơnêi, pro chiâng tơdroăng ki ro tung pơla pro troăng. Pôa Trương Anh Đài, ngế pơkuâ tíu pro troăng dêi môi khu mơdró kâ mơjiâng pro dế pro tơdroăng tơkêa tíu 3, troăng prôk luâ cheăm Ia Băng ăm ‘nâi:

“Vâ mơdêk rĕng tơdroăng pro ƀă rĕng pro tung pơla kong tôu kố, kŏng ti ngin mơnhên ai tíu pro troh lâi, pro troh mê, 3 ca 4 kíp, “pêi 3 xôh, 4 khu tung môi hâi măng” pro pơtối hlối pro plâ hâi măng vâ rĕng pro klêi; troăng hơlâ cho thăm mơnhông tơ’nôm pơtroh kơmăi kơmok, thăm pơtroh mâu ngế pêi cheăng pro, mơdêk rĕng má môi mơni kô pro klêi hdrối rơnó mê hngê”.

Troăng kân ăm rơxế kơtâu têi ing Quy Nhơn troh a Pleiku xŏn dâng 125km, châ klâ pro 3 tơdroăng tơkêa. Tung mê, tơdroăng tơkêa 1 ƀă 3 hiăng klêi xo tơnêi dâng 65-67%. Kố xuân cho môi tung mâu troăng prôk ki kal ai tơdroăng ki tơbleăng pro rĕng dêi kong pơlê Gia Lai, kơnôm ing tơdroăng môi tuăn dêi kuăn pơlê kơpong pro tơdroăng tơkêa. Hên rơpŏng hiăng hbrâ rơnáu tơrŭm, rĕng pơcháu tơnêi pro troăng vâ pro. Ngoh Yôh, kuăn ngo Bơhnéa a pơlê A Lao, cheăm Lơ Pang, ai tơnêi ối tung tơdroăng ki châ xo tơvêh ăm ‘nâi:

“Rơpŏng á tiô troăng hơlâ pơkâ dêi Tơnêi têa pro troăng kân, sap ing pơxiâm tơbleăng pro hiăng môi tuăn. Kơlo yă chêl thiê̆n tơxâng mê rơpŏng á môi tuăn”.

Peăng pá rŏng tơdroăng ki rĕng pro hâi kố cho tơdroăng ki hên hơnăm pâ thế dêi kuăn pơlê ƀă mâu kăn kuăn pơlê kong pơlê Gia Lai. Tung plâ ton hơnăm, Troăng kân 19 cho troăng tơdjêp pơla Gia Lai prế Bình Định hdrối nah. Tơdroăng prôk lăm tơkâ luâ văng rơnâk ngo, trối: An Khê, ‘Mang Yang pro hâi chôu ƀă liăn ngân pơto chơ tơmeăm, malối ƀă mâu tơmeăm pêi lo ing chiâk deăng, đi đo ối a kơlo ki hên. Pôa Nguyễn Hữu Thọ, a cheăm Đăk Đoa, kong pơlê Gia Lai ăm ‘nâi, kuăn pơlê a cheăm kố hên xôh pâ thế pro troăng kân peăng mâ hâi Lo tơdjêp ƀă mâ hâi Lâ, tơdjêp ƀă Tây Nguyên ƀă kong tơbăng achê kĭng têa kơxĭ peăng Tơdế Tơnêi têa, malối cho troăng kân kơtâu ing Pleiku troh a Quy Nhơn. Mâu rơkong pâ thế kố hiăng châ Khu kăn Kuô̆k hô̆i kong pơlê Gia Lai tơmâng, pơtroh a hneăng hôp Kuô̆k hô̆i, Chin phuh ƀă mâu khu xiâm, kơvâ cheăng.

“Troăng kân kơtâu ing Quy Nhơn troh a Pleiku cho tơdroăng ki rơhêng vâ dêi Kuăn pơlê a kong pơlê sap ing nah troh nôkố, sap ing ton nah. Kuăn pơlê xuân pâ ƀă Khu kăn Kuô̆k hô̆i, tá mâu kăn a kong pơlê ƀă mâu kăn a tơnêi têa, pơrá tối ‘na tơdroăng púi rơhêng vâ kố. Tơkâ luâ 2 hneăng cheăng Kuô̆k hô̆i hneăng 14 ƀă 15, pơrá séa ngăn khât tơdroăng pơkâ kố, pâ thế Kuô̆k hô̆i ƀă Chin phuh, vâ pêi châ tơdroăng púi rơhêng vâ dêi kuăn pơlê”.

Kuăn pơlê kong pơlê Gia Lai tối phiu ro khât drêng troăng kân ăm rơxế kơtâu têi ing Quy Nhơn troh a Pleiku dế rế hía rế châ tơbleăng pro, rế hía rế ai hmâ klêi kơ’nâi hên hơnăm tơkôm. Troăng prôk ki kố châ tơngah kô veăng lêi tah mâu tơdroăng ki xơpá tung tơdroăng ki prôk lăm, tê mơdró cho tơdroăng ki sap ing ton nah tơkôm to a troăng kân 19 ai hên to văng, rơnâk, ing mê pro tơ’lêi hlâu tâ ăm kuăn pơlê ƀă khu mơdró kâ tung mơnhông cheăng kâ. Nâ Phạm Thị Thu, a bêng Pleiku, hmâ prôk lăm pêi cheăng a Quy Nhơn, tối:

“Rơpŏng hngêi á hmâ lăm pêi cheăng kâ a Quy Nhơn, tơdroăng ki prôk lăm nôkố gá tơbrêi tơbrêh khât, kơto rơxế hmâ sap ing 4 lơ 5 chôu kơxo má. Drêng tâng tối kô ai troăng kân, á tâ phiu ro khât. Á ‘nâi, troăng kân kố pro klêi ah mê pin prôk lăm gá kô rĕng troh tâ bu dâng 2 chôu xo. Tiah mê, ƀă mâu ngế ki pêi cheăng kâ môi tiah ngin kố mê gá kơdroh iâ ivá, kơdroh iâ liăn ngân tâ tung mâu rôh prôk lăm”.

Troăng kân ăm rơxế kơtâu têi ing Quy Nhơn troh a Pleiku ôh tá xê to troăng prôk ki kal dêi kong pơlê Gia Lai, mê ối ăm hlo nhên tơdroăng púi rơhêng vâ tơxâng dêi kuăn pơlê a kong pơlê đi đo châ tơmâng, ƀă pêi pro ăm. Mâu tơdroăng kố ôh ti xê to veăng gum mâu tơdroăng cheăng ki kal dêi kong pơlê mê ối pro ivá vâ Khu kăn Kuô̆k hô̆i kong pơlê Gia Lai pơtối mơdêk hnoăng cheăng dêi tơná tung la ngiâ. Pôa Châu Ngọc Tuấn, Phŏ pơkuâ hnê ngăn Đảng, Ngế xiâm pơkuâ khu kăn Kuô̆k hô̆i kong pơlê Gia Lai ăm ‘nâi:

“Ngin đi đo hlê plĕng khât ‘na hnoăng cheăng, tơdroăng pôu râng dêi khu kăn Kuô̆k hô̆i kong pơlê rế athế châ mơdêk tâ nếo. Khu kăn Kuô̆k hô̆i kong pơlê Gia Lai mâu hneăng ki pơtối kô pơtó khôi hmâ, pêi pro klêi hnoăng cheăng dêi kuăn pơlê, veăng gum mơjiâng Việt Nam, tung mê, ai Gia Lai mơnhông rĕng, krá tơniăn ton ƀă ai hên túa lĕm tro”.

Troăng kân ăm rơxế kơtâu têi ing Quy Nhơn troh a Pleiku dế châ tơbleăng pro tơdrêng a kong pơlê Gia Lai cho tơdroăng ki mơhno nhên ăm tơdroăng ki púi rơhêng vâ tơxâng dêi kuăn pơlê hiăng châ tơmâng ƀă rế hía rế pêi pro pơhlêh chiâng troăng hơlâ, chiâng mâu kế tơmeăm pro ki nhên. Ing mê, veăng gum pro ivá mơnhông nếo ăm kơpong Tây Nguyên ƀă a kong tơbăng achê kĭng têa kơxĭ peăng Tơdế Tơnêi têa.