A kơpong kong ngo peăng mâ hâi Lu kong pơlê Quảng Ngãi, vâi krâ kuăn pơlê mâu hdroâng kuăn ngo tơkŭm po tơbâ hâi Pơtáu Hùng hlâ, tơmiât troh xiâm rêi dêi hdroâng mơngế, tơ’mot hên kơdrâm tơmối troh lăm ngăn.

Pakĭng tí tăng ngăn tơnêi tơníu ki lĕm, châ ngăn túa lĕm tro mâu hdroâng kuăn ngo akố, hên tơmối xuân mơdoh hên hâi chôu lăm troh a mâu tíu ki rak vế mâu tơdroăng ki ton nah cho mâu tíu xối pleăng Pơtáu Hùng, môi tiah Đình Lương Khế a bêng Kon Tum, hngêi chuô Tháp Kỳ Quang, cheăm Đăk Hà, vâ rơtế ƀă kuăn pơlê akố têk nhang tơbâ troh xiâm rêi hdroâng mơngế. Nâ Y Khar, a cheăm Đăk Mar, ăm ‘nâi:

“Ngin mơđah tơbleăng tôu chêng koăng, kơ’nhon xuăng vâ tơbâ troh ƀă ô eăng hnoăng cheăng dêi mâu jâ pôa hiăng pleăng dêi hnoăng kân ăm pơlê cheăm, tơnêi têa”.

*** A tíu xối tơbâ ton nah túa lĕm tro tơnêi têa Đình Lạc Giao, bêng Buôn Ma Thuột, kăn pơkuâ ƀă kuăn pơlê, kong pơlê Dak Lak tơkŭm po kân krip Hâi leh tơbâ Pơtáu Hùng hlâ vâ mơnê mâu Pơtáu Hùng hiăng pleăng dêi hnoăng mơjiâng tơnêi têa. Rôh leh kố po tung tơdroăng ki môi tuăn hơniâp ro pơxiâm ƀă tôu hơkâ, tôu chêng tiô túa chal krâ; têk nhăng, pleăng tơmeăm dêi kuăn pơlê a kong pơlê Dak Lak; leh tơbleăng hnoăng, rơkâu mâu tơdroăng ƀă hơ’muăn tối tơdroăng ton nah khên tơnôu dêi hdroâng mơngế. Akố ối tơkŭm po hơdruê chèo, quan họ, trâm mâ mâu kâu lak ƀô̆ prôa tĭnh, hơdruê then ƀă hên ki ê ƀă hlối mơđah tơbleăng mâu kế tơmeăm OCOP dêi kong pơlê Dak Lak.

*** A tíu xối tơbâ Âu Lạc a ngo Phượng Hoàng ối tung kơpong ôm hyô xí Prenn Đà Lạt, kong pơlê Lâm Đồng tơkŭm po kân krip hâi leh tơbâ Pơtáu Hùng hlâ, tơ’mot hên tơmối ôm hyô ƀă kuăn pơlê veăng ai mâ. Klêi kơ’nâi rôh tơkŭm po tơdah xo mâu kế tơmeăm, xối pleăng Tơnêi têa ƀă xối pleăng khôi hmâ, kăn pơkuâ ƀă kuăn pơlê, kong pơlê Lâm Đồng rơtế ƀă hên hĭn tơmối ôm hyô hiăng têk nhăng a Tơnêi têa xiâm. Akố ối ai mâu tơdroăng mơđah tơbleăng hơdruê xoăng chal krâ, mâu tơdroăng ki xah ro môi tiah cờ tướng, hếo loăng trăng pik rơmâ, pâm hdro pro tơnêi hneăn ƀă rôh po kơchô pế kế kâ, tíu ki ôu chế Việt Nam, chêh chư thư pháp ƀă mơđah tơbleăng um vâ vêh mơhno mâu túa ki lĕm ‘na túa lĕm tro chal krâ nah.

*** A tíu xối tơƀâ Pơtáu Hùng tíu kơpong tơkăng kong Tuy Đức, kong pơlê Lâm Đồng, vâi krâ kuăn pơlê mâu hdroâng kuăn ngo tơkŭm po kân krip tơbâ hâi Pơtáu Hùng hlâ. Tíu xối tơbâ xua vâi krâ kuăn pơlê xiâm rêi Phú Thọ pro sap ing hơnăm 2018 tung ƀăng tơnêi rơdâ lối 2.100 met karê. Kố hiăng chiâng tíu ki tơkŭm po hên tơdroăng pêi pro tơmiât troh xiâm rêi, rak vế ƀă mơnhông khôi hmâ, veăng gum ‘mâi mơnhông tơrŭm hdroâng kuăn ngo a tíu tơkăng kong. Pôa Chử Anh Chương, ngế ki cheăng tung Khu rak ngăn tíu xối

“Tâi tâng rêm ngế pơrá tơmiât troh xiâm rêi, hlê plĕng dêi vâi krâ kuăn pơlê pin cho: “Maluâ kơbố lăm ulâi, tơbâ hâi Pơtáu Hùng hlâ hâi má 10 khế 3 âm lĭt mê xuân ối chôu pâ”. Vâi krâ kuăn pơlê bô bố xuân tơmiât môi tiah mê”.

*** Hâi kố, vâi krâ kuăn pơlê xiâm rêi Phú Thọ dế rêh ối a mâu cheăm peăng mâ hâi Lu kong pơlê Gia Lai tơkŭm troh a Tíu xối tơbâ Pơtáu Hùng a bêng Pleiku, tâp nhăng.

Akố, hơ’muăn tối ‘na xiâm rêi, vâi krâ nhŏng o pơchân dêi rơpó pêi pro tro troăng hơlâ pơkâ dêi Đảng, tơnêi têa ƀă tơkŭm mơjiâng tơdroăng cheăng kâ rơpŏng hngêi, mơjiâng túa lĕm tro a kơpong kuăn pơlê ối. Pôa Đỗ Xuân Thu, ối tung khu ki tơpui tơno Hô̆i đong rơtế ối môi to kong pơlê Vĩnh Phúc a kong pơlê Gia Lai ăm ‘nâi:

“Hơnăm ki lâi ngin xuân tơkŭm po vâ tơbâ troh hâi Pơtáu Hùng, Pơtáu dêi tâi tâng hdroâng mơngế Việt Nam. Ngin đi đo hâk tơngăm tơná cho ngế kuăn dêi tơnêi Xiâm, gá hơniâp ro khât”.