VOV.Xơ Đăng - Tung 2 hâi mơ’nui măng tĭng kố (lơ 25 ƀă lơ 26/4) a kong pơlê Gia Lai kô tơkŭm po hên tơdroăng mơhno khôi túa lĕm tro. Mê cho Hâi tơkŭm xah hêi ro Khôi túa lĕm tro mâu hdroâng mơngế kong pơlê Gia Lai roh má môi châ tơkŭm po a Plông kân Đại Đoàn Kết, bêng Pleiku. Rơtế drêng mê, a Tíu chôu ‘măn tơmeăm khoăng roh ton nah – khôi túa lĕm tro tơnêi têa Plei Ơi, cheăm Chư A Thai tơkŭm po Leh rơkâu xối pâ kong mêi dêi Xeăng Pơtáu Apui. Kố ôh tá xê to tơdroăng mơhno ‘na khôi túa lĕm tro – ôm hyô tơ’lêi hlâu, mê ối djâ hên ki kơnâ trâu hơngế ‘na khôi túa lĕm tro, pơlê pơla ƀă mơnhông krá tơniăn.