Ƀă lối 5 rơtuh 300 rơpâu ngế Việt Nam ki dế rêh ối ƀă pêi cheăng a kong têa ê, hâi Xối tơbâ Pơtáu Hùng hlâ cho “roh ki kal khât” vâ rêm ngế chôu vế ‘na xiêm rêi hdrông hdrê. Rak vế tơdroăng ki loi tĭng, rơkâu xối kơ Pơtáu Hùng a kong têa ê, cho ki xiâm rak vế khôi túa, vêa vong dêi mơngế Việt Nam, gum ăm rêm khu rơxông chal nếo ki rêh ối a kong têa ê ôh tá piu hiât xiâm rêi hdrông hdrê dêi tơná.

Ing hơnăm 2015, Tơdroăng tơkêa bro Hâi tơbâ pôa xiâm ki mơjiâng ƀă mơnhông Tơnêi têa Việt Nam tung lâp plâi tơnêi hiăng pơkâ pêi pro, hiăng tơdjêp, tơrŭm pơlê pơla mơngế Việt Nam a hên kong têa tung lâp plâi tơnêi vâ rơtế tơkŭm po leh xối tơbâ hâi Pơtáu Hùng hlâ tiô kơ tơdroăng ki tơdjuôm. Hâi xối tơbâ pôa xiâm ki mơjiâng ƀă mơnhông tơnêi têa Việt Nam tung lâp plâi tơnêi cho khôi túa, vêa vong ki ai pơxúa, tơtro kân khât ki krih tơviah, ôh ta xê to ƀă mơngế pơlê pơla cho mơngế Việt Nam ki dế rêh ối, mơhriâm, hriăn plĕng ƀă pêi cheăng a kong têa ê, thăm mơdêk tơrŭm cheăng nhŏng o ki hơniâp ro pơla Việt Nam ƀă pú hmâ tung lâp plâi tơnêi ƀă hên mâu tơdroăng ki ê....

Troh nôkố, tơdroăng tơkêa bro kố hiăng tơdjêp tơdrêng ƀă leh Xối tơbâ hâi Pơtáu hlâ ƀă hnối koh pơ-eăng kơ kuăn cháu Pơtáu Hùng tung vâ chê 50 to kong têa ki rêh ối tung 5 pâ, thăm mơdêk tơrŭm cheăng pơlê pơla mơngế Việt Nam tung lâp plâi tơnêi, tơdrêng amê, mơđah tơbleăng um méa Việt Nam troh a pú hmâ tung lâp plâi tơnêi.

Tung chôu phut ki krih tơviah mê, pơlê pơla mơngế Việt Nam a kong pơlê Udon Thani, ối a kơpong pêa mâ hâi lo pa kơnhŏng kong têa Siam hiăng tơkŭm po Leh xối tơbâ Hâi  Pơtáu Hùng hlâ. Pôa Lương Xuân Hòa, Kăn hnê ngăn Khu mơngế Việt Nam a kong pơlê Udon Thani vêh mơnhên i hiâm mơno dêi kuăn pơlê ki rêh ối a kong têa ê:

“Hơnăm ki lâi ngin xuân hmâ tơkŭm po leh tiah kố vâ kuăn cháu đi đo chôu vế troh hdrông hdrê, mơheăm chhá dêi Pơtáu Hùng. Méluâ kot mâ ƀă xông kân a tơnêi têa Siam, la hdrông hdrê, mơheăm chhá Việt Nam xuân ối đi đo tung plâi nuih, ƀă ngin xuân hmâ môi i hiâm mơno ‘na pơlê pơla dêi tơnêi têa xiâm tơná”.

Pơtối mơnhông ki kơnía dêi Hâi xối tơbâ Pơtáu Hùng hlâ ôh tá xê to pơtê to dâng tơdroăng ki tơkŭm mâu tơdroăng ki leh nhoăm kân khât mê ối cho hnoăng ki vâ kring vế, rak ngăn, păn roăng rak ngăn i hiâm mơno mơjo pâ ƀă tuăn mơno ki tơrŭm tung rêm ngế Việt Nam. Kố châ ngăn cho ki xiâm kối ivá, cho khôi túa, vêa vong dêi hdrông mơngế Việt Nam xuân ối krá khâp tung chal ki tơrŭm ƀă ôh tá la lâi pơhlêh dêi tuăn i hiâm tơná. Méluâ rêh ối ulâi, bu kal ối chôu vế troh a hâi má 10 khế 3, ối xối tơbâ dêi  Pơtáu Hùng, mê i hiâm mơno dêi hdrông hdrê, mơheăm chhá dêi hdrông mơngế xuân pơtối u ối, xuân ối tơrŭm pơlê pơla mơngế Việt Nam tung môi khu ki tơrŭm, krá kâk, tơniăn khât.