Dak Lak mơdêk tơrŭm cheăng ƀă UNESCO prế FAO tung pơtối rak vế tơmeăm khoăng ton nah ƀă mơnhông pêi chiâk krá tơniăn
Thứ hai, 13:00, 20/04/2026
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV.Xơ Đăng - A bêng Buôn Ma Thuột, mâu kăn Vi ƀan kuăn pơlê kong pơlê Dak Lak hiăng tơdah hlối pêi cheăng ƀă mâu kăn dêi UNESCO ƀă FAO xua pôa Jonathan Wallace Baker, Ngế kăn teăng mâ UNESCO a Việt Nam ƀă pôa Vinod Ahuja, Ngế kăn teăng mâ dêi FAO a Việt Nam pơkuâ djâ, rôh kố, drêng troh veăng hôp tơpui ‘na tơmeăm khoăng kơphế lâp plâi tơnêi po a Dak Lak.
A rôh pêi cheăng, kăn hnê ngăn kong pơlê Dak Lak pơkâ thế UNESCO pơtối kơjo kum pro hồ sơ vâ tơbriât chêh inâi tơmeăm khoăng “ki rơkê pêt ƀă uâ pơliê pro kơphế Dak Lak”, hlối hnê tối chêh hlá mơ-éa pro hồ sơ kŏng viên tơnêi tơníu kơpong peăng mâ hâi Lo kong pơlê, vâ châ ai inâi Kŏng viên tơnêi tơníu tung Lâp plâi tơnêi.
Pôa Jonathan Wallace Baker, Kăn teăng mâ UNESCO a Việt Nam ăm ‘nâi, UNESCO hbrâ vâ kơjo kum Dak Lak tung pro hồ sơ “Ki rơkê pêt ƀă uâ pơliê pro kơphế Dak Lak “pơtroh ăm UNESCO ngăn chêh inâi tơmeăm túa lĕm tro kơnía git. Pakĭng mê, tơkŭm po mê xuân pơtối rơtế ƀă mâu kong pơlê tung mâu hồ sơ ki ê, tung mê, ai Kong viên tơnêi tơníu.
Viết bình luận