Roh má 2 Hneăng hôp má môi, Kuô̆k hô̆i hneăng má XVI tơkŭm po sap hâi kố (20/4) troh tâi hâi lơ 23/4. Kuô̆k hô̆i kô tơpui hên tơdroăng xiâm ki kal ƀă pêi pro têk kŏng môi tuăn tơbleăng mâu luât hiăng châ kăn teăng mâ Kuô̆k hô̆i tơpui a Roh má 1. Tiô tơdroăng pêi cheăng, kơxo kố, Ngế xiâm ngăn ‘na Túa lĕm tro, Tơ’noăng ivá ƀă Ôm hyô, pôu râng hnoăng dêi Ngế pro xiâm hnê ngăn Chin phuh, tơbleăng Mơ-éa tơbleăng ‘na mơ-éa chêh hdrối Tơdroăng pơkâ dêi Kuô̆k hô̆i ‘na mâu troăng pơkâ pêi, troăng hơlâ pơhlêh nếo mơnhông khôi túa lĕm tro Việt Nam.

Xuân tung kơxo kố, mâu kăn teăng mâ tơpui a Tôh ‘na Mơ-éa chêh hdrối Tơdroăng pơkâ dêi Kuô̆k hô̆i ‘na mâu troăng pơkâ pêi, troăng hơlâ mơnhông mơdêk khôi túa lĕm tro Việt Nam; Mơ-éa chêh hdrối Tơdroăng pơkâ dêi Kuô̆k hô̆i ‘na pêi pro mơnúa troăng pơkâ luât sư tơnêi têa; Mơ-éa chêh hdrối Tơdroăng pơkâ dêi Kuô̆k hô̆i ‘na tơdroăng mơjiâng Pơlê kong kân Đồng Nai ối tung Khu xiâm tơnêi têa.