Tung dế kân kĕng têa rơlâu, rơlố têa kơxĭ Phú Quý (kong pơlê Lâm Đồng) lo môi tiah pŭm hmốu kơnía dêi kong pro. Lo hơngế tơdroăng rêh ối thâ, tơbréa, tô tuăn cheăng kâ-rêh ối dêi Pơlê kong xiâm Hà Nội, nâ Ngô Thị Hồng Ánh ti tăng troh ƀă kong tô, khía ƀă tơdroăng tâi ihiâm mơno dêi kuăn mơngế têa kơxĭ rơlố Phú Quý. Kố ôh tá xê to roh apoăng nâ troh a rơlố têa kơxĭ ki lĕm kố, laga ‘na tuăn ihiâm mơno dêi tơnêi, tuăn pâ dêi kuăn mơngế tíu Kơpong cheăng kâ Phú Quý xuân pro nâ môi tiah vêh trâm ngế pú hmâ ton hmâ achê dêi pó. Mâu hâi châ tâ tung dế têa kơxĭ kân rơdâ ngiât lĕm cho mâu hâi nâ Ánh châ ối tung tơdroăng ki hlế rơkê ƀă ki lĕm dêi têa kơxĭ rơlố.

‘’Á tâ lăm ôm hyô Phú Quý djâ ăm á mâu tơdroăng ki châ tâ lĕm ro ‘nâng. Kuăn pơlê akố tơtrŏng gâk ngăn kong prâi, rêm ngế xuân hlế lĕm ƀă tơmối ôm hyô. Yă rôe kế tơmeăm khoăng a Phú Quý cho tơtro ‘nâng, ôh tá xê to tơdroăng ki chiâng tê mơdró ôh. Châ tâ ƀă Phú Quý sap ing roh hdrối a troh akố roh kố xuân djâ ăm mâu tơdroăng ki tâ rơrêk cho lĕm ‘nâng’’.

Klêi kơ’nâi tơmot chiâng môi, kong pơlê Lâm Đồng ƀă tíu mê cho tá Dak Nông ƀă Bình Thuận ton hiăng po môi tơdroăng mơnhông mơdêk kân rơdâ. Nôkố, tơmối ôm hyô kô châ tâ hlo môi pái víu ki kơnía, mê cho: “Đà Lạt – rơpâu rơnâ reăng Châu Âu tung dế kơpong ai hyôh rơngiâp hngíu’’;  “Mũi Né – pŭm hmốu kơnía dêi ôm hyô têa kơxĭ Đông Nam Á” ƀă “Tà Đùng – Ving Hạ Long a kơpong kân rơdâ”. Ngoh Lê Văn Thức, Kăn pơkuâ môi kŏng ti ôm hyô a Đà Lạt tối, kố cho troăng prôk ôm hyô tŭm tâi tâng, păng ‘nâng cho lĕm dêi kơpong kân rơdâ troh têa kơxĭ ngiât lĕm.

“Á loi tơngah cho troăng klông tung la ngiâ kô châ kêi đeăng tơdjêp ing Đà Lạt chu a Mũi Né, sap ing Đà Lạt tơkâ hluâ Gia Nghĩa lơ Tà Đùng chiâng môi víu môi tiah mê cho lĕm ‘nâng’’.

Rơtế ƀă Lâm Đồng, tơdroăng ki rơdêi dêi ôm hyô xuân troh lâp lu troh kơpong kân rơdâ Dak Lak. Tung dế kơpong tơmeăm kơnía, tíu chôu tot tung idrâp chêng koăng chuât lâp ngo kong, tơdroăng tâi ihiâm mơno dêi kuăn mơngế ƀă mâu tơdroăng ki lĕm dêi kơpong tơnêi kố hiăng păng ‘nâng troh plâi nuih dêi mâu tơmối a kơpong hơngế. Roh apoăng to a tơnêi khêi bazan, pôa Nguyễn Văn Minh, tơmối ôm hyô troh ing Pơlê kong kân Đà Nẵng păng ‘nâng tâ lĕm ro ƀă mâu ki kơnâ khôi túa lĕm tro ki má môi dêi Dak Lak:

“Khôi túa lĕm tro chêng koăng cho lĕm ƀă drôu xiâm akố mê ôu xăng lĕm ‘mrĭt, hôm păng ‘nâng. Kố xuân cho roh apoăng á troh akố lăm ngăn, khu mơngế pêi cheăng tâi ihiâm mơno’’.

Tơdroăng ki tơtrŏng hơnăm kố cho kong pơlê Gia Lai, tíu po Hơnăm Ôm hyô Tơnêi têa 2026. Pôa Phạm Anh Tuấn, Kăn hnê ngăn Vi ƀan kong pơlê Gia Lai tối ăm ‘nâi, kong pơlê dế mơ-eăm pro nếo um méa ƀă tơdroăng kal đi đo, tơdjêp tơtro pơla khôi túa lĕm tro kơpong kân rơdâ ƀă tơdrá lâp plâi tơnêi tiô rơxông nếo. Kố cho xiâm rêi vâ Gia Lai mơnhông mơdêk, djâ ôm hyô chiâng kơvâ cheăng kâ ki xiâm ƀă mơnhên inâi “kơpong kân rơdâ troh têa kơxĭ” a lơgât ôm hyô lâp plâi tơnêi.

“Kong pơlê Gia Lai tơkêa kô tơkŭm po châ tơƀrê Hơnăm Ôm hyô Tơnêi têa 2026 ƀă ihiâm mơno rơkê, tơniăn, achê, hmê, ro rih, khôi túa lĕm vâ rêm ngế tơmối troh pơrá tâ tơdroăng ki tá ihiâm mơno, phá tơ-ê ƀă pâ khât’’.

Klêi kơ’nâi tơmot chiâng môi, mâu kong pơlê a Tây Nguyên ƀă Kơpong tơbăng achê têa kơxĭ Pá hdroh peăng Tơdế Tơnêi têa ai môi tíu mơnhông ki phá tơ-ê, tơkŭm kong – têa kơxĭ – kơpong kân rơdâ ƀă khôi túa lĕm tro mâu hdroâng mơngế. Ing tơdroăng mê, hên khu tê mơdró dế pơxiâm rup kŏng mơjiâng mâu hnoăng  tơmeăm ôm hyô tơdjêp dêi tung kơpong, po rơdâ tíu châ tâ, châ hlo ăm tơmối. Pôa Nguyễn Minh Trí, môi khu tê mơdró pêi ôm hyô Dak Lak ƀă Khánh Hòa tối:

“Môi troăng kô ai tơ’nôm hên tíu troh tâ, troăng mê ai têa kơxĭ, ai kong, ai khôi túa lĕm tro, kơchâi kâ kơhiâm. Kô tơdjêp pơla Dak Lak ƀă Khánh Hòa chiâng 1 tơmeăm lĕm. Tung 3 hâi, drêng tơmối troh Khánh Hòa rế châ hum têa kơxĭ, kô châ lo a Peăng mâ hâi lo Dak Lak lăm ngăn xí Nghênh Phong, troh a Dak Lak lăm ngăn khôi túa lĕm tro, têa kroăng, kong ngo, long têa, xí’’.

“Kơpong kân rơdâ troh têa kơxĭ ngiêt” ôh tá xê to tơdroăng ki tơdjêp ‘na tơnêi tơníu, mê ối cho tơdroăng ki tơkŭm dêi tơmeăm kơnía ƀă tâ rơrêk tung ihiâm mơno. Drêng kuăn pơlê ‘nâi nhuô̆m kế san hô, drêng khu râ kăn pơkuâ tơkêa tơdroăng ki hlế rơkê lĕm ƀă rơkê plĕng, mê cho drêng ôm hyô chiâng kơvâ cheăng kâ ki xiâm, krá tơniăn, pro eăng bâ inâi môi Việt Nam khên tơnôu, kân rơdâ ƀă pêng păm khôi túa lĕm.