*Pôa Hồ Văn Mười, Kăn hnê ngăn vi ƀan kong pơlê Lâm Đồng nếo lăm ngăn, vâ ‘naia nhên tơdroăng ki mơjiâng pro mâu kế tơmeăm ƀă pơkâ thế mâu khu ki ‘no liăn pro, tíu pêi cheăng pro mơdêk rĕng tơdroăng ki pro. Khu kố hiăng troh pôu ƀă pêi cheăng a Kŏng ti pêi cheăng tiô rơnó Luyện kim Trần Hồng Quân cheăm Nhân Cơ vâ ‘nâi nhên tơdroăng ki pro Hngêi kơmăi Điê̆n phân nhôm Dak Nông, Tơdroăng tơkêa kố ai tâi tâng kơxô̆ liăn pro vâ chê 18.500 rơtal liăn, pro châ 450.000 tâưn nhôm tung môi hơnăm. Hngêi kơmăi kố cho tíu ki mơjiâng pro, uâ pơliê má mơ’nui dêi tíu cheăng ƀă kơmăi kơmok chiâ xo bô-xit-pro alumin ƀă pro nhôm kim loăi. Tiô tối hdrối, sap ing khế 4 troh khế 6 hơnăm kố kô klêi tơdroăng ki liăn pro, ƀă ăm xúa, ƀă ki têi 150.000 tâ̆n tung môi hơnăm; sap ing khế 7 troh khế 9 hơnăm 2027 kô pêi châ tơdroăng ki pơkâ. Klêi kơ’nâi lăm ngăn, pôa Hồ Văn Mười, Kăn hnê ngăn kong pơlê tối nhên kố cho hngêi kơmăi mơjiâng pro kim loăi ki apoăng dêi Việt Nam, kal châ tơtrŏng troh tơniăn tung xúa, malối cho ‘na on tơhrik, tơdrêng amê hlối pơkâ thế mâu kơvâ cheăng tơrŭm lêi tah xơpá ăm khu mơdró kâ.

*Viƀan kong pơlê Lâm Đồng xuân nếo hôp mơnhên troăng hơlâ mơ’no liăn hceăng tơnêi têa hneăng hơnăm 2026 – 2030 ƀă 24 tơdroăng tơkêa bro hiăng môi tuăn. Kong pơlê pơkâ thâ kêi đeăng tâi tâng pro mơ-éa, rĕng pơxiâm pêi pro, mơdêk rĕng mơ’no liăn; Khu pơkuâ liăn ngân hbrâ xing xoăng kơxô̆ liăn, mâu cheăm bêng kơtăng tăng tơnêi. Laga, mơ’no liăn ngân tơnêi têa dêi Lâm Đông cho iâ tá hâi châ 4% pơkâ pêi. Tâi tâng kơxô̆ liăn hơnăm 2026 châ pơcháu vâ chê 15.800 rơtal liăn laga tâi pái khế apoăng hơnăm mơ’no liăn ngân châ dâng 578 rơtal liăn.

Xiâm kối ki xiâm cho trâm pá tăng tơnêi, ivá khu pro tá hâi rơkê, pro mơ-éa ối tơvâ ƀă hnoăng cheăng mâu khu mơ’no liăn hceăng tá hâi hên. Pôa Nguyễn Ngọc Phúc, Phŏ Kăn hnê ngăn Viƀan kong pơlê Lâm Đồng tối ăm ‘nâi kong pơlê tơkŭm tah lôi ‘’tíu kreăng’’, ki rơhêng vâ tối cho luât mơ’no liăn cheăng tơnêi têa:

"Kal thế ‘nâi tung pơla kố pon thế tah tíu ki kreăng môi tiah lâi. Tâng têa kơxăng têa châu to kơnâ yă mê pin tơkŭm tung tơpui pêi pro mơ-éa luât ‘na mơ’no liăn hceăng tơnêi têa hdrối, pơtối mê cho mâu tơmeăm ki kô chiâng pêi tơdrêng. Pơtih, môi tuăn rêm cheăm cho 3 tơmeăm ƀă pêi tơdrêng vâ mơdêk mơ’no liăn cheăng tơnêi têa, laga thế rah mâu tơmeăm ki ai tơdjâk tơdrêng, djâ xúa hlối, mâu tơmeăm ki ôh tá xê to ƀăng tơnêi’’.