Viƀan kong pơlê Gia Lai nếo tơkŭm po hôp tơpui pêi pro tơdroăng pá puât tăng ƀăng tơnêi tơdroăng tơkêa bro troăng kân ăm phêp rơxế kơtâu têi Quy Nhơn – Pleiku xŏn 125 km. Tơdroăng tơkêa bro 1 hiăng pơcháu 65% ƀăng tơnêi. Kong pơlê pêi pro 13 kơpong vêh xĕn ối ăm lối 620 rơpŏng kuăn pơlê. Laga, yă chêl thiê̆n iâ ƀă trâm pá xĕn hngêi trăng kih thuât dế tơdjâk tơdroăng mơjiâng pro. Pôa Nguyễn Tự Công Hoàng, Phŏ Kăn hnê ngăn Viƀan kong pơlê pơkâ thế:

‘’Chêl thiê̆n tơnêi pêi chiâk deăng cho thế séa ngăn xiâm rêi tro păng ‘nâng. Vâ pêi cheăng kố mê tá khu cheăng kal kí ing thôn, pơlê tơngi klêng thế pơtâng tối, mơhnhôk, ‘nâi tơdroăng, tiâ tối, pâ thế dêi kuăn pơlê, vâ tơpui pêi pro tơdrêng ing xiâm rêi. Mơ-eăm tơdroăng tơkêa bro 2 thế  mơdêk tơniăn tơdroăng mơjiâng pro rơtế ƀă tơdroăng tơkêa bro 1 ƀă 3. Ki xiâm chêl thiê̆n tơnêi pêi chiâk deăng cho 30/4 cho klêi’’.

Rơtế ƀă mê, Gia Lai pơkâ hên hĭn tơdroăng vâ pêi pro: kêi đeăng troăng hâng long cheăng kâ peăng mâ hâi Lo tung khế 6/2026; mâu troăng tơdjêp tơring kêi đeăng tung hơnăm; tăng ƀăng tơnêi ăm phêp rơxế kơtâu têi klêi tung khế 4/2026. Hên tơdroăng tơkêa bro long rơchôa hno têa, khăm pơlât, khôi túa lĕm tro, hngêi trăng troăng klông xuân châ pơkâ pơxiâm mơjiâng pro ƀă kêi đeăng tiô kơlo ki xiâm. Kong pơlê châ pơkâ mơ’no vâ chê 100% kơxô̆ liăn hơnăm 2026, pơkâ pơkuâ tiô pơkâ ‘’6 nhên’’, hlối pôu râng hnoăng cheăng krê.