Pơtối roh lăm pôu pêi cheăng a Gia Lai, kơxo lơ 28/4, Đăi tươ̆ng Nguyễn Trọng Nghĩa, Kăn cheăng tung Khu xiâm kal kí, Kăn pơkuâ hnê ngăn cheăng Đảng, Kăn pơkuâ Kơ koan xiâm Kal kí Khu lêng Kuăn pơlê Việt Nam rơtế khu râ kăn pêi cheăng Tơnêi têa hiăng troh lăm pôu, diâp kơxuô tơmeăm mâu rơpŏng ai troăng hơlâ tơnêi têa tong gum, mơngế ai hnoăng tơnêi têa tung kong pơlê klăng leh tơbâ 51 hơnăm Hâi tơleăng lĕm peăng hdroh Tơnêi têa, môi tuăn tơnêi têa.

A roh trâm mâ, khu râ kăn hiăng diâp 300 kơxuô tơmeăm ăm mâu rơpŏng ai hnoăng tơnêi têa, ai troăng hơlâ tơnêi têa tŏng gum, rơpŏng kơtiê, kŏng nhân ƀă mơngế pêi cheăng ai tơdroăng rêh ối pá puât. Đăi tươ̆ng tối rơdêi, tŏng gum mơngế ai hnoăng tơnêi têa cho hnoăng cheăng kal kí pêi đi đo dêi Đảng ƀă Tơnêi têa, mơhno hiâm mơno “Ô têa pâ kơnhŏng’’, ‘’Pâ hnoăng mơngế ki hiăng pleăng dêi hnoăng cheăng’’ dêi hdroâng mơngế.

Tơdrêng amê pơkâ thế khu râ kăn pơkuâ hnê ngăn cheăng Đảng, khu râ kăn pơkuâ pơtối pêi pro tơtro tơdroăng pâ mơnê mơngế ai hnoăng, tơmâng hên tâ mê nếo troh tơdroăng rêh ối kế tơmeăm khoăng, ihiâm mơno dêi mâu rơpŏng ai hnoăng tơnêi têa, gum pro krá tơniăn loi tơngah dêi Kuăn pơlê, mơdêk tơrŭm môi tuăn tâi tâng mâu hdroâng mơngế.

Kơxo lơ 28/4, khu ki pêi dêi hnoăng cheăng Tơnêi têa xua pôa Nguyễn Thanh Nghị, Ngế cheăng tung Tíu xiâm kal kí, Kăn pơkuâ hnê ngăn Đảng, Ngế xiâm ngăn tơdroăng tŏng gum, tơdroăng cheăng tung la ngiâ tơnêi têa pro ngế xiâm pơkuâ djâ khu kăn kố troh pôu kơ-êng, hbru tơmeăm ăm mâu rơpŏng châ tơnêi têa tŏng gum, rơpŏng kơtiê ƀă ngế pêi cheăng ai tơdroăng rêh ối pá puât a cheăm Quảng Phú, kong pơlê Dak Lak. Khu kố diâp 80 kơxuô tơmeăm vâ gum, mơhnhôk mâu ngế ki xơpá kuăn tê a cheăm.

A rôh trâm mâ, pôa Nguyễn Thanh Nghị kơ-êng ivá, tơdroăng rêh ối dêi vâi krâ kuăn pơlê, hlối pơtroh rơkong mơhnhôk, veăng hơlêm dêi kăn pơkuâ Đảng ƀă Tơnêi têa troh mâu rơpŏng ối trâm hên xơpá. Pôa rơhêng vâ mâu rơpŏng pơtối mơdêk hiâm mơno tơrŭm, mơeăm pêi cheăng vâ rế hía rế tơniăn, mơdêk tơdroăng rêh ối. Tối nhên troăng tơmiât tung la ngiâ, pôa tối rơdêi mâu râ, mâu kơvâ cheăng kô pơtối tơbleăng tơƀrê troăng hơlâ tŏng gum rêh ối, rak tơniăn ăm rêm ngế kuăn pơlê pơrá châ pơxúa ki tơƀrê mơnhông, pôi tá ai kơbố ki lâi tro lôi pá rŏng.