Sap hâi lơ 25 – 27/4, kong pơlê Lâm Đồng tơdah dâng 350.000 roh tơmối lăm ngăn, ối, tung mê ai 14.000 roh tơmối lâp plâi tơnêi; tâi tâng pêi lo liăn châ dâng 768 rơtal liăn.

Xúa kơbong ối tơdâng châ 65 – 75%, krê hngêi tơmối kâ koi ối pơtê ki lĕm 3 – 5 hơlŏng châ 80 – 95%. Tiô Khu pơkuâ ‘na Khôi túa lĕm tro, Tơ’noăng Ivá ƀă Ôm hyô kong pơlê Lâm Đồng, kơnôm hbrâ rĕng xua mê gâk kring tơniăn, rak tơniăn troăng klông, hbrâ tơpâ on chếo ƀă mơgrúa tơniăn kế kâ a mâu kơpong, tíu ôm hyô châ tơniăn; yă tê mơdró, ki rơhêng vâ tối cho yă kơbong tíu ối, ki xiâm tơniăn, ôh tá ăm ai tơdroăng hjip yă, toi tơbriât tơmối.

Tung hneăng pơtê leh 3 hâi, hên tơdroăng mơhno khôi túa lĕm tro – ôm hyô môi tiah tơdroăng po xối pleăng, prôk pơtăng drô troăng kân, mođah tơbleăng ngê̆, tơdroăng xah hêi tiô khôi vâi krâ nah ... châ tơkŭm pro, pro tíu ki rơdêi mơhnhôk tơmối ôm hyô, gum pro ton hâi khế ối ƀă mơdêk mơ’no hrê liăn ngân.