*** A Đình Lạc Giao, bêng Buôn Ma Thuột, Khu xiâm ngăn Túa lĕm tro, Tơ’noăng Ivá ƀă Ôm hyô kong pơlê Dak Lak tơkŭm po tơdroăng mơđah hơdruê xuăng “Bản hùng ca Tháng Tư”,  “Bài ca thống nhất”  ƀă “Đắk Lắk - Âm vang ngày mới”.  

Tơdroăng pơtối tơbâ mê cho troh troăng tơplâ pa puât, pro tơƀrê ki pơxúa ‘na ton nah dêi rôh pơplâ pro tơleăng lĕm rơnó Hơngui hơnăm 1975, malối cho rôh lăm pơplâ Buôn Ma Thuột, plâ ƀlêi trâng xâ po troăng lăm plâ Tây Nguyên, veăng pro tơleăng lĕm  rôh lăm a Hneăng tơplâ inâi Hồ Chí Minh. Hlối mơnhên tối ngiâ méa hơ’lêh nếo dêi Dak Lak kơ’nâi 50 hơnăm châ tơleăng lĕm.

Sap hâi lơ 30/4 troh hâi lơ 3/5, a bêng Tuy Hòa pêi pro tơdroăng ki nếo ƀă pơxá “Cá ngừ Đắk Lắk – Tinh hoa câu vàng” rơtế ƀă “Leh mơdĭng khinh khí cầu - Kơneăng ngăn mâ hâi lo” vâ koh tơbâ mâu hâi leh kân hlối tơbleăng ôm hyô a cheăm bêng, kong pơlê.

*** A Plông kân Đại Đoàn Kết, bêng Pleiku, Vi ƀan hnê ngăn kong pơlê Gia Lai nếo tơkŭm po Tơdroăng ngê̆ thuât ki hơniâp ro “Idrâp chuât xơtó” ô eăng ivá tơrŭm kân mâu hdroâng kuăn ngo. Tơdroăng kố ai pơxúa khât Tơbâ 80 hơnăm Hâi Pôa Hồ pơtroh kơthô ăm Hneăng hôp mâu hdroâng kuăn ngo peăng Hdroh a Pleiku, Tơbâ 51 hơnăm Hâi tơleăng lĕm peăng Hdroh, pro tơnêi têa tơrŭm chiâng môi.

Tơdroăng ki xiâm dêi rôh po kố cho vêh mơhno kơthô pôa Hồ Chí Minh pơtroh ăm mâu kuăn pơlê hdroâng kuăn ngo hơnăm 1946. Tơpui a rôh po tơdroăng, pôa Phạm Anh Tuấn, Kăn hnê ngăn kong pơlê Gia Lai tối nhên, kơtăn kố 80 hơnăm, kơthô Pôa Hồ Chí Minh, Kăn xiâm hnê ngăn tơnêi têa hneăng hdrối pơtroh ăm Hneăng hôp kân mâu hdroâng kuăn ngo peăng Hdroh a Pleiku hiăng chiâng tơdroăng tơbleăng kân ‘na hiâm mơno tơrŭm mâu hdroâng kuăn ngo, ‘mâi mơnhông hiâm mơno loi khât kăch măng.

“Kong măng po mơdĭng trâm mâ tơpui tơno mâu hdroâng kuăn ngo ai inâi “Idrâp chuât xơtó” ôh ti xê to tơdroăng ki mơđah tơbleăng túa lĕm tro, mê ối cho rơkong tối rơdêi: pin phá dêi rơpó la ôh tá chiâng tơklâ dêi rơpó. Pin hên túa la rơtế tơdjuôm môi hiâm mơno tơmiât. Tơbâ 80 hơnăm tơdroăng ki kân, tơdroăng ki kal khât ôh tá xê athế vêh tối nêo rơkong Pôa pơchân, mê chôu pâ ki kơnía khât, ối troh tá ah hiâm mơno dêi Hồ Chí Minh ‘na tơrŭm kân mâu hdroâng kuăn ngo, pơtối pêi pro pơhlêh ƀă tơdroăng pêi pro nhên ƀă tơdroăng loi khât, Tơnêi têa Việt Nam cho môi, hdroâng mơngế Việt Nam cho môi. Têa kroăng kô xoê, ngo chiâng tơhnah, la tơdroăng ki pôa pơchân ôh tá la lâi kâi pơhlêh”.