Troh tơmâng mâu tơdroăng tối, púi vâ dêi hên ngế vâi ngoh nâ o kŏng nhân, pôa Tô Lâm rơrêk lo têa mâ xua hlo hên ngế hơ-ui mơjo, mơhno ki lĕm tro dêi mâu kŏng nhân Việt Nam hâi kố: kơhnâ, mơ-eăm ‘nâng, kơdôu mơ-eăm khât ‘nâng, rêh ối ‘nâi hnoăng cheăng tơná, ‘nâi hơ-ui pâ dêi on veăng rơpŏng hngêi, rơtế hmâ ƀă vâi pú, ƀă khu mơdró, ƀă khu tơrŭm kŏng đoân ƀă tơnêi têa.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, Đảng ƀă Tơnêi têa đi đo ‘nâi nhên giai cấp kŏng nhân cho mâu ki kal tung tơdroăng pêi cheăng mơjiâng ƀă kring vế Tơnêi têa. Tung mâu hơnăm kăch măng, kŏng nhân Việt Nam đi đo ai mâu tíu ki xơpá, pá puât, a kŏng trương, tung hngêi kơmăi, tung kơpong hngêi kơmăi, tung mâu kơvâ cheăng, mơdró kâ, rơxế chơ tơmeăm, kŏng ngê̆, uâ pơliê, pro tơmeăm.

Kơpeăng kŏng, tuăn ngôa rơkê, têa kơxô kơxâm ƀă tuăn hriăn plĕng tơdroăng ki nếo dêi ngoh nâ o hiăng veăng mơhno mâu hnoăng mơnhông tơƀrê dêi tơnêi têa nôkố. Pôa Tô Lâm pơkâ thế pơtối ngăn tơmâng khât mâu kŏng nhân, mơngế pêi cheăng cho môi tơdroăng kal kí, đi đo ƀă troh ta ah. 

Pơlê kong kân thế séa ngăn nhên tâ tơdroăng púi vâ hngêi ối pơlê pơla, hngêi ăm mâu kŏng nhân ối pơlê, Hngêi trung, hngêi păn vâi hdrêng, hngêi pơkeăng, mơhno túa lĕm tro, kơpong hmâ tơkŭm hôp a mâu kơpong hngêi kơmăi, kơpong pro tơmeăm khoăng ƀă mâu tíu ki ai krâm kŏng nhân rêh ối, thế pro ti lâi vâ kŏng nhân ôh ti xê to ai cheăng pêi, mê ối ai tíu ối tơniăn; ôh tá xê to pêi lo liăn, mê ối thế ai kơxô̆ liăn păn chĕm kuăn ‘nĕng, pơtroh ăm dêi nôu pâ a pơlê;  ôh tá xê to pêi cheăng, mê ối châ pơtê, hriâm tâp, xah hêi, mơnhông tơdroăng rêh ối tuăn ngôa tơniăn lĕm.