Môi tiah tơdroăng ôh tá bê tơnêi vâ tơbêng cho tơdroăng tơkêa bro troăng kân kĭng têa kơxĭ Vạn Ninh – Ninh Hòa xŏn dâng 25 km, tâi tâng kơlo mơ’no liăn cheăng lối 2.000 rơtal liăn. Tơdroăng tơkêa bro kố kal dâng 1,3 rơtuh met khô̆i tơnêi tơbêng, laga xua ôh tá bê tơnêi, xua mê tơdroăng mơjiâng pro nếo châ dâng 30%. Pôa Trần Minh Chiến, Kăn pơkuâ Khu pơkuâ Kơpong cheăng kâ ƀă mâu Kơpong kơmăi kơmok kong pơlê Khánh Hòa tô tuăn:

‘’Troăng kân kĭng têa kơxĭ nôkố mơjiâng pro pá puât xua ôh tá bê tơnêi tơbêng. Ôh tá ai tơnêi vâ tơbêng tơdjâk troh tơdroăng mơ’no liăn cheăng tơnêi têa. La ngiâ, mâu Kơpong kơmăi kơmok pêi pro tơdroăng mơjiâng hngêi trăng troăng klông xuân trâm pá há. Sap ing nôkố, khu mơ’no liăn cheăng tô tuăn xua ôh tá ai tơnêi vâ tơbêng, drêng tơdâng tơ’mô chiâng tơbêng tung khu dế ôh tá bê hên tơnêi vâ tơbêng’’.

Tiô Khu pơkuâ Pêi chiâk deăng ƀă Kong prâi kong pơlê Khánh Hòa, mâu tơdroăng tơkêa bro a kong pơlê Khánh Hòa dế kal dâng 6,3 rơtuh met khô̆i tơmeăm vâ gu bêng ƀă 350.000 met khô̆i hmốu mơjiâng pro. Vâ rơnêu tơdroăng ki ôh tá bê tơnêi vâ tơbêng, mâu khu mơ’no liăn cheăng dế pơto tơnêi hmốu ki rơlối ing tơdroăng mơjiâng pro mâu tơdroăng tơkêa bro troăng klông ki ê. Nôkố kơxô̆ tơmeăm ki rơlối a mâu ‘núa hvât tơmeăm dâng 3,3 rơtuh met khô̆i. Pôa Phạm Văn Hòa, Phŏ Kăn pơkuâ Khu pơkuâ mâu tơdroăng tơkêa bro Pêi chiâk deăng ƀă Troăng klông kong pơlê Khánh Hòa tối ăm ‘nâi, tơdroăng pơto tơmeăm cho kal khât:

“Tơdroăng kố kô ai hên ki pơxúa xua hbrâ châ tơmeăm dêi tơdroăng tơkêa bro, kơdroh ok mơ’no lo pa kong. Xua môi tiah tơdroăng tơkêa bro Khánh Hòa – Buôn Ma Thuột xuân pá puât xua ôh tá ai tíu ok. Pơhlêh chiâng tơdroăng tơkêa bro ki ê kô kơdroh châ hên kơxô̆ liăn mơ’no cheăng ăm tŭm 2 tơdroăng tơkêa bro’’.

Tơdroăng ki ôh tá ai tŭm tơmeăm vâ mơjiâng pro hngêi trăng, troăng klông a Khánh Hòa ing tơdroăng ki kal vâ hên tơdrêng amê tíu ki vâ xo ối iâ, pro mơ-éa vâ chiâ xo tơmeăm ƀă mơdêk ivá mâu tíu chiâng xo tơmeăm xuân mơdoh hên chôu. Vâ pro tơniăn ing xiâm rêi, pakĭng tơdroăng pơto mâu tơmeăm ki mơjiâng tơmeăm khoăng, kong pơlê Khánh Hòa dế séa ngăn mâu kơpong chiâng vâ chiâ xo, tơ’nôm mâu troăng pơkuâ kế tơmeăm khoăng tung kơdâm tơnêi tung Pơkâ pêi kong pơlê.

Rơtế amê, séa ngăn kĭ mâu kơpong ôh tá há yă hnoăng chiâng chiâ xo tơmeăm khoăng tung kơdâm tơnêi pơtroh mâu tơmeăm ki vâ mơjiâng pro hngêi trăng troăng klông, tơdroăng tơkêa bro ki xiâm. Pôa Lê Huyền, Phŏ Kăn hnê ngăn Vi ƀan kong pơlê Khánh Hòa pơkâ thế mâu khu mơ’no liăn cheăng, tíu cheăng hnê mơhno thế hbrâ tơdrêng ing hbrâ tơdroăng tơkêa bro, séa ngăn inhên kế ki vâ pro tơmeăm khoăng vâ mơjiâng troăng pêi ki tơtro, ví chiâng ai tơdroăng ki pá tung tơdroăng pêi pro:

“Mâu Khu pơkuâ tơdroăng tơkêa bro kal hbrâ tơleăng châ tơdroăng: Tơdroăng tơkêa bro dêi tơná kal tơmeăm ki klâi? Ulâi? Yă to lâi? Ví tơdroăng tơmeăm khoăng mê chiâng tối, kơ-êng alâi ƀă to lâi mê ôh tá tiâ. Tâng ôh tá tối châ alâi mê ôh tá ‘nâi xiâm kối ki lâi vâ mơjiâng tơdroăng hbrâ hdrối djâ tung mơjiâng tơmeăm, xua kơtăn dâng 3 km lơ 5 km kô phá dêi pó. Chiâng ôh tá ‘nâi pro ti lâi ăm kơvâ Pêi chiâk deăng ƀă Kong prâi tung tơdroăng ti tăng tíu, pơkâ, djâ tung pơkâ pêi’’.