Kơxo lơ 5/5, a kong pơlê Tây Ninh, Khu pơkuâ hnê ngăn Đảng lêng Tơnêi têa, ối tung Khu xiâm pơkuâ lêng tơkŭm po Leh diâp Um meăn Pôa Hồ Chí Minh ƀă diâp Ƀâng kheăn kơdeăn dêi Ngế xiâm pơkuâ lêng ăm mâu khu pú hên, ngế krê ki kơhnâ rơkê tung tơdroăng tâ phĭu rah xo kăn teăng mâ Kuô̆k hô̆i hneăng má XVI ƀă Hô̆i đong kuăn pơlê mâu râ hneăng hơnăm 2026 – 2031. Veăng ƀă xông tơpui a roh leh, Đăi tươ̆ng Nguyễn Trọng Nghĩa, Kăn cheăng tung Khu xiâm kal kí, Kăn pơkuâ Kơ koan xiâm Kal kí Khu lêng kuăn pơlê Việt Nam tối nhên, tơdroăng diâp um meăn Pôa Hồ ai kơnâ kal kí, troăng tơmiât ƀă rơkê trâu hơngế, pơchân kăn ƀô̆, đảng viên đi đo hriâm tâp ƀă pêi tiô troăng tơdjâ dêi Pôa Hồ.

Đăi tươ̆ng tối nhuô̆m hdrối tơdroăng ki loi tơngah dêi kuăn pơlê drêng rah xo pro kăn teăng mâ Kuô̆k hô̆i hneăng má XVI, tơdrêng amê mơnhên kô pơtối mơ-eăm rak krá tơniăn kal kí, achê kuăn pơlê, tơmâng rơkong tơpui tối dêi kuăn pơlê. Pôa xuân pơkâ thế kong pơlê Tây Ninh mơdêk hriâm tâp ƀă pêi tiô troăng tơdjâ dêi Pôa Hồ, mơjiâng khu kăn ƀô̆ “rế ai hiâm mơno lĕm kăch măng, rế rơkê pêi cheăng’’, thăm tơrŭm môi tuăn khu lêng – kuăn pơlê, gum rak tơniăn ƀă mơnhông tâi tâng pơlê.