Tung tơdroăng ki kong dế tôu a ƀăng klâng thôn Mỹ Xuân 1, cheăm Hòa Thịnh, ngoh Nguyễn Hải Triều rơtế ƀă 3 ngế ki cheăng tung kơmăi poê báu, poê 5 sào klâng báu ki hiăng tum. Ngoh Triều chôu vế, rôh ki kong mê khía mơhot têa kân lân lu a khế 11/2025 hiăng mơhiu dêi rơpŏng vâ chê tâi tâng mâu kế tơmeăm khoăng ƀă tá báu hdrê vâ mơdâ a rơnó hngíu. Klêi kơ’nâi pêi tơnêi klâng, rơpŏng châ gum ăm 30kg báu hdrê, 50kg phon rơvât vâ mơdâ pêt báu. Klêi kơ’nâi lối 3 khế mơdâ, rak ngăm, 5 sào báu klâng nôkố hiăng troh hâi poê.

“Rơpŏng á pêi 5 sào klâng, mơdâ hdrê BĐR999 ƀă Đài Thơm. Ki lĕm kơpâu hơnăm kố châ dâng 20% tâng vâ pơchông ƀă rơnó hdrối. Tối tơdjuôm poê xo châ dâng 400kg/môi sào (500m2-PV). Poê báu vêh mê hiăng ‘măn chôu dâng môi chât kơxâk vâ kâ, u ối vâ tê mơdrếo liăn phon, liăn pơkeăng ƀă mơhá ăm kơmăi poê”.

A ƀăng klâng kân Hòa Tân Đông, bêng Đông Hòa, pôa Trần Văn Hữu rơtế ƀă péa ngế kuăn xuân dế tung pơla poê báu achê môi tíu klâng báu hiăng tum. Rơnó hdrối nah, kơnôm ing hyôh kong prâi tơniăn lĕm ƀă rak ngăn krâ, ki kơpâu lĕm dêi báu châ hên. Pôa Hữu ăm ‘nâi:

“Kong prâi hơnăm kố kong mê tro tôu ‘ló, ki kơpâu lĕm dêi báu rơnó kố mê châ hên, tiô riân châ dâng 300 – 350 kg tung môi sao, tâk dâng 20% tâng vâ pơchông ƀă rơnó hdrối. Rơpŏng á pêi môi tíu mê xuân châ 3,3 – 3,5 tâ̆n báu. Rơpŏng ngin phiu ro khât”.

Pôa Nguyễn Thanh Minh - Kăn pơkuâ Khu pêi cheăng tơrŭm Pêi chiâk Hòa Đông (cheăm Hòa Thịnh) ăm ‘nâi, klêi kơ’nâi rôh kong mê têa kân lân lu a khế 11/2025, ki hên rơpŏng kuăn pơlê tro lŭp hên drêng báu hdrê ƀă phon hưh cơ tro têa mơhiu, tơdjâk ó troh mơdâ hdrê báu, choi phon rơnó hngíu tôu. Pêi pro hnê mơhno dêi Vi ƀan hnê ngăn kong pơlê Dak Lak ƀă kơnôm ing tơdroăng tŏng gum dêi mâu khu ki ai hiâm mơno hơ-ui, Khu pêi cheăng hiăng teăm tŏng gum ăm 126 hdrê báu ki lĕm, tơdrêng amê hlối tơkŭm po lâm hnê kih thuât ăm kuăn pơlê.

Kơnôm tiah mê, rơnó poê báu hơnăm kố châ chía hên; Khu pêi cheăng tơrŭm hiăng hbrâ rơnáu vâ tê roê, veăng pro tơniăn tíu tê ăm vâi krâ kuăn pơlê.

“Apoăng rơnó, Khu pêi cheăng tơrŭm hiăng tơrŭm ƀă Tíu pêi cheăng Pêt mơjiâng ƀă Rak vế pơkeăng xôh kơdê oâ hdrong kong pơlê Dak Lak (kơpong 6) tơkŭm po lâm hnê ăm kuăn pơlê ‘na kih thuât hbrâ mơdât oâ hdrong kâ ‘nhiê, hnê ‘na rak ngăn báu vâ kơpâu lĕm poê châ xo hên tâ. Nôkố, Khu pêi cheăng tơrŭm pơtối tơrŭm ƀă khu ki hnê mơhnhôk pêi chiâk cheăm, Ƀơrô cheăng Cheăng kâ cheăm ƀă tơrŭm ƀă 7 khu mơdró kâ vâ roê xo báu, gum ăm tíu tê ăm vâi krâ kuăn pơlê. Ƀă rơnó ki pơtối, Khu pêi cheăng tơrŭm kô tơrŭm ƀă Vi ƀan hnê ngăn cheăm Hòa Thịnh chêh pro túa pơkâ ki pơtối gum hdrê báu ăm kuăn pơlê tiô Pơkâ 112/2024/NĐ-CP.”

Rơnó hngíu tôu 2025–2026, cheăm Hòa Thịnh ƀă bêng Đông Hòa mơdâ pêt vâ chê 4 rơpâu ha báu klâng. Kơnôm châ gum ăm hdrê ƀă môi iâ phon rơvât hưh cơ, vâi krâ kuăn pơlê hiăng rĕng ‘mâi mơnhông pêt dêi klâng. Báu xông kân lĕm, kơpâu châ 300-400kg/sào. Hlo kong prâi ôh tá tơniăn, mâu cheăm bêng xuân hiăng hbrâ rơnáu tơbleăng rĕng poê vâ kơdroh iâ ki tro lŭp. Pôa Huỳnh Mỹ Phong, Kăn hnê ngăn Vi ƀan bêng Đông Hòa, kong pơlê Dak Lak ăm ‘nâi:

“Vâ rak tơniăn châ hên báu a rơnó hngíu tôu hơnăm kố, pêi pro túa pơkâ “poê báu tá hâi tum khât djâ tơniăn troh a hngêi, teăng ăm tơkôm báu tum nếo poê ah kô tro kong mê”, Vi ƀan hnê ngăn bêng hiăng hnê mơhno mâu Khu pêi cheăng tơrŭm tơbleăng poê báu ăm vâi krâ kuăn pơlê drêng báu tum châ 85-90%, pôi tá kôm báu tum tơruih a klâng. Tơdrêng amê hlối vâ ví tro kong mê kơdrâ pro báu leăng kơtong, tơruih chiâng hmŏng a klâng”.

Sap ing mâu ƀăng klâng ki hdrối nah tro têa kân lân lu, nôkố mơngiơk báu tum kơpâu lĕm hiăng vêh a mâu cheăm peăng mâ hâi Lo kong pơlê Dak Lak; ôh ti xê djâ vế tơdroăng ki ‘mâi mơnhông châ poê xo báu hên mê ối tối rơdêi ivá kâi trâng ƀă ivá kâi ‘mâi mơnhông krá tơniăn dêi kuăn pơlê pêi chiâk. Tơdroăng ki veăng gum teăm tơdrêng dêi kăn pơkuâ, Khu pêi cheăng tơrŭm ƀă mâu khu ki tŏng gum hiăng cho ngế ki tŏng gum krá rơdêi vâ vâi krâ kuăn pơlê tơkâ luâ xơpá vâ ai môi rơnó poê báu phâi hơtôu.