Pêi pro Pơkâ 57 ƀă Pơkâ 79 dêi Khu xiâm kal kí, tung pơla hdrối nah, Khu xiâm ngăn chiâk deăng ƀă Hyôh kong prâi tơrŭm ƀă Khu xiâm ngăn Kŏng an, mâu Khu xiâm kơvâ cheăng, kong pơlê mơ-eăm tơbleăng, chêh pro klêi tíu chêh ‘măn tơdroăng kal tung kơmăi dêi tơnêi têa ‘na tơnêi tơníu, malối cho rôh pro kro, pro krúa tíu chêh ‘măn tơdroăng kal ‘na tơnêi tơníu tung kơmăi dêi tơnêi têa hơnăm 2025.

Ai 34 to kong pơlê, pơlê kong kân hiăng chê tơ’mô mâu tíu ki chêh 'măn tơdroăng kal ‘na tơnêi tung kơmăi dâng 62,4 rơtuh to tíu. Khu xiâm ngăn chiâk deăng ƀă Hyôh kong prâi dế tơrŭm ƀă Khu xiâm ngăn Kŏng an vâ chêh pro mâu tơdroăng kal tung kơmăi dêi tơnêi têa ‘na tơnêi chêh ‘mot tung tíu ki ‘măn rak tơdroăng kal tơnêi têa. Laga tơdroăng ki vê kơchuâ pro lơgât tơnêi, hô sơ tơnêi, chêh pro klêi tíu chêh ‘măn tơdroăng kal tung kơmăi tơnêi têa ối hrá, tá hâi châ tiô tơdroăng púi vâ tung tơdroăng nếo nôkố. Tối rơdêi kố cho cheăng ki pá xua mâu tơdroăng kal ‘na tơnêi tơníu pơtối pơhlêh, pôa Hồ Quốc Dũng, Phŏ Ngế pro xiâm hnê ngăn Chin phuh pơkâ thế mâu khu xiâm kơvâ cheăng, kong pơlê athế pêi kơtăng ƀă hiâm mơno pêi pro 6 nhên, chêh pro nhên tơdroăng, hnoăng cheăng mơ’nui hơnăm athế pêi pro klêi tíu ki chêh ‘măn tơdroăng kal ‘na tơnêi tơníu tung kơmăi dêi tơnêi têa.