Kong pơlê Dak Lak dế tơbleăng pro 3 to hngêi trung ai tíu kâ koi ối pơtê pơtối râ a mâu cheăm tơkăng kong Ia R’vê, Ia Lốp ƀă Buôn Đôn tâi tâng kơxô̆ liăn ‘no pro 390 rơtal liăn, vâ ăm 3.300 ngế hok tro râ má môi ƀă râ má péa hriâm. Mâu hngêi trung thế pro klêi  ƀă kô pơcháu châ xúa a khế 8 hơnăm kố.

Pôa Võ Văn Lợi, Phŏ pơkuâ Rak ngăn tơdroăng tơkêa bro ‘no Liăn mơjiâng pro tơmeăm khoăng kong pơlê Dak Lak ăm ‘nâi, ngế pơkuâ ‘no liăn pro dế tăng ‘nâi plĕng mâu troăng hnê mơhno dêi Khu xiâm ngăn mơjiâng tơmeăm khoăng vâ tăng plĕng tâh ki xơpá ăm khu ‘no liăn mơjiâng pro.

Mơhé ối trâm hên xơpá ‘na kong prâi, tơmeăm khoăng pro ƀă mơngế ki vâ pêi cheăng pro, mâu tíu pêi cheăng mơjiâng pro ƀă ngế pơkuâ ’no liăn dế mơ-eăm tơrŭm tah xơpá, tơvâ tơvân, rĕng pro hngêi trung ai tíu kâ koi ối pơtê a kơpong tơkăng kong rĕng châ xúa, ai tiô púi vâ hriâm dêi hok tro kơpong tíu tơkăng kong.