Tơdroăng ăm ‘nâi ing khu xiâm ngăn ‘na chiâk deăng ƀă Hyôh kong prâi tối tơbleăng a rôh Hôp “Po ngăn tơbleăng tơdroăng nếo ai mâu pơkâ ‘na tơniăn krúa kế kâ ƀă séa ngăn pơreăng a kuăn kiâ, nhâ loăng tung tơdroăng Kĭ tơhrâ tơrŭm cheăng kâ tung Tŭm tơdroăng  cheăng tung kơpong (RCEP) ƀă pơkâ kơxô̆ 280 dêi Sinuâ” hâi lơ 14/5.

Hôp tơkŭm po a Dak Lak ƀă hôp tơdrêng troh 34 tíu mơ’no tung um tơvi  a Tíu xiâm rơtế bă mâu kong pơlê, pơlê kong kân tung lâp tơnêi têa. Tiô rối tơbleăng, tung pơla hdrối mê hía nah, mâu khu mơdró hiăng hbrâ hmâ ƀă hyôh kong prâi hơ’lêh ƀă tơdroăng kơchơ tê mơdró, xo rôe klêi mâu tơmeăm tê. Mâu tíu pêi cheăng dế hbrâ pơkâ ‘na mah kơpong pêt, séa ngăn ƀă tăng xiâm rêi vâ ai tiô pơkâ  ing kơchơ mơdró ki rôe, malối mâu pơkâ ing mâu tơdroăng kĭ tơhrâ tê mơdró.

Laga, tơmeăm pê lo ing chiâk deăng Việt Nam dế trâm hên mâu tơdroăng pơkâ rế nhên ‘na kih thuât thăm rế pá ‘na pro tơniăn kế kâ ƀă séa ngăn hôm râm pơkeăng. Malối, peăng Sinuâ dế mơdêk hnoăng cheăng rak ngăn kơtăng mâu kế kâ ki rôe ing kong vâi, tơkŭm ngăn nhên khât a mah kơxô̆ kơpong pêt, tíu tâ tung kơxuô, tung kơthung, tăng ngăn vâ ’nâi hôm ai hên pơkeăng xôh a tơmeăm kâ, nhăn tĕm têp a tơdrong ƀă tăng xiâm rêi gá.

Hneăng hôp rôh kố tối ăm ‘nâi mâu tơdroăng, pơkâ ki nếo ‘na tơniăn kế kâ ƀă séa ngăn kuăn kiâ pŭn to chêng, nhâ loăng (SPS) tung Tơdroăng kĭ tơhrâ Tơrŭm cheăng kâ tơrŭm tơdroăng tung kơpong; Pơkâ kơxô̆ 280 ƀă mâu tơdroăng tối tơbleăng dêi Khu xiâm ngăn na tê mơdró kăng kong dêi Sinuâ ‘na rak ngăn chêh inâi khu  mơdró kâ pêi pro tơmeăm kế kâ kong têa ê rôe ‘mot a Sinuâ vâ khu rak ngăn, khu mơdró khu pêi cheăng tơrŭm, kuăn pơlê hlê ƀă pêi pro, tơniăn hnoăng ki ai pơkâ thế.