Mâu hâi ki kố, a mâu ƀăng klâng mơ’nui rơnó a pơlê A Lao, cheăm ‘Mang Yang, kong pơlê Gia Lai, rơpŏng hngêi pôa Ngưm rơtế ƀă hên rơpŏng ki ê, dế thâ pôe dêi báu rơnó xeăng tôu vâ teăm pơcháu tơnêi vâ pro troăng tiô tơdroăng tơkêa bro păng má 3 dêi troăng kân tơdrăng Quy Nhơn – Pleiku.  Mơhé môi pâ tơnêi pêi kâ tro xo tơvêh, kuăn pơlê ki ối tung pơlê xuân vâ môi tuăn, tiô troăng pơkâ xua vâ pro pơxúa mơnhông ton ta troh ah. Pôa Ngưm tối, pơla A Lao  ai 51 rơpŏng cho tung inâi thế xĕn tíu ê vâ xo tơnêi mê ƀă tâi tâng mâu rơpŏng hiăng mê xo liăn ki chêk thiăn, hbrâ tah tơmeăm, ko tah dêi loăng plâi klêi mê pơcháu ăm khu ngăn tơdroăng tơkêa bro:

 “Kuăn pơlê ngin mơnê kô tơnêi têa pơkâ mơjiâng pro troăng mê, tâi tâng kuăn pơlê ki ối tung pơlê mê xuân môi tuăn ƀă tơdroăng tơkêa bro mê. Môi tiah môi iâ tơnêi dêi rơpŏng hngêi a tung tơdroăng pơkâ pro mê ai 2 sao klâng báu, ƀă 1 sao kơphế; ngin hiăng ko tah dế hbrâ vâ pơcháu ăm peăng mơjiâng pro tơmeăm khoăng”.

Ƀă troăng hơlâ, pơcháu tơnêi troh dâng lâi pro troh dâng mê, a Tơdroăng tơkêa bro peăng má 1 ƀă má 3, tíu ki châ ăm tơnêi vâ pro lối 70%, mâu tíu mơjiâng pro djâ hrĭng toăng kơmăi, tơmeăm vâ pêi tơdrêng ƀă rơpâu ngế pêi cheăng pêi plâ hâi măng ôh tá pơtê vâ tơbleăng pêi pro mâu trêi troăng, pro troăng cho mơ’no têa ƀă pro mâu tíu pá kơdâm kông, pro mâu tíu tung kloh.

Tung mê, mâu kông ki xiâm môi tiah kông An Nhơn, kông tơkâ luâ kroăng Kôn, kông Hà Nhe ƀă kông tơkâ a ‘ngêi troăng kân tơdrăng peăng Kơnhŏng - peăng Hdroh châ vê hdró pro tâi ivá hdrối vâ troh rơnó mêi la ngiâ. Pôa Đoàn Minh Hoàng - Ngế hnê  ngăn Kong ti Veăng tơlo liăn hnê tối VNC, tíu pêi cheăng séa ngăn mơ jiâng pro kông An Nhơn 4 ăm ‘nâi:

“Kông An Nhơn 4, nôkố cho vâi pong tâp châ 12/24 xiâm trăng meăm, tơdroăng pro châ 50% tơdroăng tâp trăng meăm. Nôkố, ngế pơkuâ hiăng pơcháu ăm tơnêi vâ pro kông. 2 pâ kĭng  hiăng châ pro. Nôkố a tíu pro kông, ngin tơkôm tơmeăm vâ pơtối pro kông”.

Tơdroăng tơkêa bro troăng kân tơdrăng Quy Nhơn - Pleiku  ai ki xŏn dâng 125km, tâi tâng kơlo ‘no liăn pro lối 43.700 rơtal liăn, tơkâ luâ 16 to cheăm, bêng dêi kong pơlê Gia Lai, tơdjâk troh lối 4.600 rơpŏng kuăn pơlê ƀă tâi tâng tơnêi xo tơvêh lối 1.097 ha. Troh hâi lơ 4/5/2026 kơxỗ ki châ pơcháu tơnêi vâ pro tơdroăng tơkêa bro peăng má 1 (22km) châ 70,5%; Tơdroăng tơkêa bro peăng má 3 (25km) châ 72%.

Krê Tơdroăng tơkêa bro peăng mâ 3 (68km) dế pro klêi mâu hlá mơ-éa vâ pơxiâm pro tung khế 5/2020. La ƀă tơdroăng gu tơbăng tơnêi, 10/12 kơpong pro pơlê nếo drô kĭng troăng xuân châ tơbleăng pro hên, tiô tối hdrối pơcháu tơnêi ăm kuăn pơlê pro hngêi tung khế 6/2026.

Pôa Phạm Xuân Tỉnh, Phŏ pơkuâ Tơdroăng tơkêa bro peăng má 1 (ối tung Khu rak ngăn mâu tơdroăng tơkêa bro tơmeăm khoăng troăng prôk ƀă kal vâ xúa tung kong pơlê Gia Lai) ăm ‘nâi, tơdroăng mê tơdrêng ƀă gu tơbăng tơnêi, hiăng klêi chêl thiăn liăn, nếo tơbleăng pro cho túa ki rĕng má môi vâ tơniăn tơmeăm khoăng mơjiâng pro tro tiô tơdroăng ki kong pơlê pơkâ.

 “Troh nôkố, tơdroăng xo tơnêi, gu tơbăng tơnêi tíu vâ pro vâ tối hiăng klêi ai tiô kal vâ tơbleăng pêi dêi khu mơjiâng pro. Ngin rơtế ƀă khu mơjiâng pro tơrŭm ƀă mâu kơ koan ki tơdjâk troh vâ tăng ngăn tơdroăng hbrâ tơmeăm, vâ ai tiô mâu pơkâ kih thuât dêi tơdroăng tơkêa bro, vâ tơbleăng pêi, séa ngăn châ tơbrê ƀă pêi tro tơdroăng”.

Troăng kân tơdrăng Quy Nhơn - Pleiku ai pơ xiâm kân ƀă kong pơlê Gia Lai xua kô cho xiâm ki tơdjêp tơrŭm ki kal pơla kơpong kĭng têa kơxĭ ‘na hdroh Tơdế tơnêi têa ƀă tơbăng ngo dêi kong pơlê, veăng mơnhông tơrŭm tung kơpong, kơdroh kơxố liăn ‘no chơ  ƀă po rơdâ tíu vâ mơnhông. Xua mê, mâu kong pơlê ƀă tíu mơjiâng pro dế tơkŭm pêi vâ rĕng klêi hlối tơniăn tro tiô tơdroăng pơkâ.