Kong pơlê xuân pơkâ pêi nhên ‘no liăn ngân tiô rêm hneăng. Vâ pêi pro pơkâ pêi kố, Vi ƀan hnê ngăn kong pơlê Lâm Đồng pơkâ thế mâu khu râ, kơvâ cheăng, kong pơlê ƀă ngế ki ‘no liăn pêi cheăng thăm pêi kơtăng tung ‘no liăn cheăng tơdjuôm; mơnhên nhên hnoăng cheăng pôu râng dêi ngế ki ối a ko ƀă kăn ƀô̆ séa ngăn tơrêm kơ tơdroăng tơkêa bro, rêm tơdroăng cheăng.

Vi ƀan hnê ngăn kong pơlê Lâm Đồng pơcháu ăm Khu ngăn kong pơlê, cheăm bêng ƀă hnoăng cheăng mâu kăn ƀô̆, tơrŭm ƀă mâu tíu pêi cheăng, kong pơlê tung pêi pro hnoăng cheăng ‘no liăn pêi cheăng tơdjuôm; tí tăng ‘nâi plĕng pơxâu phâk kơtăng mâu ngế pro xôi, ôh tá pêi pro klêi tơdroăng cheăng ki châ pơcháu.

Tơdrêng amê, hlối hriăn plĕng tăng ‘nâi ăm Vi ƀan hnê ngăn kong pơlê séa ngăn klêi kơ’nâi ‘no liăn pêi cheăng tơdjuôm vâ pro tơdroăng, túa pơkâ pêi ki tro mơnhên tối, pơxâu phâk, pơkâ thế, pôk kăn ƀô̆ tung la ngiâ. Hơnăm 2026 tâi tâng kơxô̆ liăn ‘no pêi cheăng tơdjuôm dêi kong pơlê Lâm Đồng cho lối 20.000 rơtal liăn. Troh mơ’nui khế 4, kong pơlê Lâm Đồng nếo ‘no lối 875 rơtal liăn, tá hâi châ 10% túa pơcháu.