Tơpui mơgêi rôh pêi cheăng, pôa Trần Thanh Mẫn, Kăn xiâm hnê ngăn Kuô̆k hô̆i vâ ƀă tơdroăng tơkŭm Péa khu hnê mơhno cheăng chiâng môi; pơchân Khu hnê mơhno athế pêi pro kơtăng tơdroăng cheăng, pôi tá ăm tơdroăng cheăng pêi hrá, ton; hlối mơnhên nhên hnoăng cheăng dêi ngế krê, khu tơrŭm, khŏm mơeăm pêi pro troăng hơlâ ôh tá veăng, ôh tá pêi pro châ tơdroăng púi vâ ‘na pơhlêh kơxô̆ mê ối môi pâ.

‘Na klêi kơ’nâi pêi pro Tơdroăng “Bình dân học vụ kơxô̆ - Kuô̆k hô̆i kơxô̆”, Kăn xiâm hnê ngăn Kuô̆k hô̆i pơkâ thế kal châ tơdjâk tung tâi tung khu pơkuâ cheăng kal kí drêng ai tŭm tơdroăng; pakĭng mê, pơtối tơbleăng mâu hlá mơ-éa ‘na kih năng kơxô̆ ăm kăn ƀô̆, kong chưk tung Kuô̆k hô̆i vâ tơniăn tro mâu tơdroăng ki rơkê, kih năng kố ai pơxúa tung tơdroăng ki xúa rêm hâi.