A rôh tơdah, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi tối, Đảng ƀă tơnêi têa Việt Nam hdrối ƀă kơ’nâi xuân môi, đi đo pêi ahdrối tâ cho tơrŭm cheăng ai pơxúa ki kân, “Ai môi ôh tá ai péa” Việt Nam - Lếo, vâ môi tuăn rơdêi tung tơdroăng hơ’lêh nếo hlối tơrŭm ƀă lâp plâi tơnêi dêi Lếo, vâ kơjo kum hên ăm Đảng, Tơnêi têa ƀă kuăn pơlê Lếo, tối ăm dêi rơpó ‘nâi túa pêi cheăng vâ tơkâ luâ xơpá pơloăng mơnúa, ƀă hlối rơkâu mâu khu Kăn lăm pôu mê pêi cheăng lĕm tơbrê.

Kăn xiâm hnê ngăn Đảng, Kăn xiâm hnê ngăn tơnêi tối nhên, pơxiâm mot hơnăm ki nếo péa pâ kal tơbleăng pêi kơtăng mâu tơdroăng vâ châ tơƀrê Hlá mơ-éa chêh tơhrâ tơrŭm cheăng ki hiăng kĭ. Pôa Tô Lâm loi khât tiah kố, ƀă tơdroăng xiâm krá kak ƀă pơkâ ‘na kal kí hên, tơrŭm cheăng Hà Nội - Viêng Chăn kô pơtối mơnhông rơdêi, veăng ‘no hnoăng ai pơxúa a mơnhông dêi tơrêm kong têa, hlối pro trâu rơdâ tâ nếo tơrŭm cheăng ki kal, tơrŭm môi tuăn krá pơla Việt Nam ƀă Lếo.