Ivá cho ki kơnâ dêi rêm ngế pin ƀă cho xiâm rêi ki kal ăm tơdroăng mơnhông krá tơniăn dêi tơnêi têa. Tung pơla nôkố ƀă hên pơloăng mơnúa ‘na pơreăng, pơ’leăng mâ mơngế hên ngế krâ, kong prâi tro pro ‘mêi ƀă pơhlêh tơdroăng rêh ối, tơdroăng mơdêk ki dâi lĕm rak ngăn ivá Kuăn pơlê chiâng hnoăng cheăng ki thâ. Tơdroăng pơkâ kơxô̆ 72-NQ/TW hâi lơ 9/9/2025 dêi Khu xiâm kal kí ‘na ‘’Mâu troăng pêi mơnhông tơƀrê, thăm gâk kring, rak ngăn ƀă mơdêk ivá kuăn pơlê’’, mơjiâng cho troăng prôk ton xŏn, mơhno troăng tơmiât la ngiâ ton xŏn ƀă khŏm mơ-eăm ó rơdêi dêi Đảng tung kơvâ khăm pơlât.

Tung hneăng hơnăm 2026 – 2030, Tơdroăng pơkâ 72 pơkâ xiâm kối cho mơjiâng hngêi pơkeăng tơdâng tơ’mô, dâi lĕm, châ tơƀrê ƀă mot tơrŭm, tơniăn rêm ngế kuăn pơlê pơrá châ achê tơdroăng khăm pơlât ivá tơtro ƀă, inhên:

-Mơdêk ivá, tuăn ngôa rơkê, plĕng ƀă hơnăm rêh mo sêi dêi kuăn pơlê. Troh hơnăm 2030, tâk ki xŏn tơdâng dêi vâi hdrêng ƀă droh rơtăm phô̆m xông kân sap ing 1 – 18 hơnăm tơ’nôm ki vâ iâ 1,5 cm; hơnăm tơdâng châ 75,5 hơnăm, tung mê kơxô̆ hơnăm rêh mo sêi châ ki vâ iâ 68 hơnăm.

-Kơdroh hngăm ngo pơreăng ƀă mơdât mau tơdroăng ki tơdjâk troh ivá. Kơlo pâk vaccine tung Tơdroăng pâ ki kal châ lối 95%. Kơlo kuăn pơlê hmâ veăng tơdroăng pơtâp ivá tâk tơ’nôm 10%.

Thăm pơkuâ mâu tơdroăng ki tơdjâk troh ivá môi tiah drôu, ƀiêr, hât ƀă ing tơnêi tơníu, têa, hyôh...

-Kuăn pơlê châ khăm pơlât hôm, tơmiât troh rak ngăn ivá tâi tâng.

-Sap hơnăm 2026, kuăn pơlê châ khăm ivá rêm hneăng lơ rah khăm tê kơtê ki vâ iâ rêm hơnăm 1 xôh, châ pro xôh khăm ivá điê̆n tưh vâ pơkuâ ivá tiô tơdroăng rêh, chôa ‘lâng kơdroh hngăm ‘na kơxô̆ liăn khăm pơlât. Troh hơnăm 2030, kuăn pơlê châ ăm tê kơtê a kơlo ki xiâm tung hnoăng pơxúa ƀaoh hiêm khăm pơlât tiô troăng.

-100% hngêi pơkeăng cheăm châ mơ’no liăn pro rơnêu rôe kế tơmeăm khăm pơlât, kơmăi kơmok khăm pơlât, mơngế pêi cheăng tiô tơdroăng cheăng, hnoăng cheăng; troh hơnăm 2027 ai ki vâ iâ má môi sap ing 4 – 5 ƀok thái pơkeăng. Mơdêk kơlo khăm pơlât, pơlât ƀă ƀaoh hiêm khăm pơlât râ cheăm tâk lối 20%.

-Troh hơnăm 2026, kơxo châ lâp lu ƀaoh hiêm khăm pơlât châ 95% pơ’leăng mâ mơngế, troh hơnăm 2030 châ tâi tâng ƀaoh hiêm khăm pơlât tâi tâng kuăn pơlê; mơjiâng mâu tơdroăng ƀaoh hiêm khăm pơlât.

Tơmiât pêi troh hơnăm 2045:

-Mơ-eăm tíu rêh ối lĕm mâu kơlo têk chu khăm pơlât dêi kuăn pơlê, kơlo têk chu lâp tơdroăng rak ngăn ivá tơ’mô ƀă mâu kong têa mơnhông mơdêk kơpong ƀă lâp plâi tơnêi.

-Kuăn pơlê ai hơnăm rêh ton châ lối 80 hơnăm, tung mê, kơxô̆ hơnăm mo sêi tâk lối 71 hơnăm, châ, ivá, ‘nhông tơdâng dêi droh rơtăm tơdâng ƀă mâu kong têa ai rơtế kơlo mơnhông mơdêk.

-Tơdroăng khăm pơlât tiô rơxông nếo, tơdâng tơ’mô, châ tơƀrê, krá tơniăn, xo tơdroăng hbrâ mơdât pơreăng cho kơjo má môi, tơxâng pơkâ rak ngăn ivá rế hía rế hôm ƀă ai hên dêi kuăn pơlê.

Vâ châ mâu pơkâ kơpêng mê, Tơdroăng pơkâ 72 pơkâ mâu hnoăng cheăng, troăng pêi djâ tơdroăng ki mơnhông hôm, mê cho:

1.Pơhlêh nếo ó rơdêi troăng tơmiât ƀă troăng pêi tung pơkuâ, hnê mơhno, tơkŭm po pêi pro tơdroăng gâk kring, rak ngăn ƀă mơdêk ivá kuăn pơlê.

2.Teăm tơdrêng pêi pro troăng pơkâ pêi, tơkŭm mơdêk ivá tung khăm pơlât, ki má lối cho tơdroăng hbrâ khăm pơlât, hngêi pơkeăng cheăm, mơnhông ki rơdêi dêi tơdroăng khăm pơlât ƀă pơkeăng rêi nhâ hlá loăng.

3.Mơdêk hiâm mơno lĕm, mơnhông mơngế ki pêi cheăng tơdroăng khăm pơlât, tơdâng tơ’mô, tơxâng ƀă tơdroăng ki môi tuăn ihiâm mơno dêi mơngế châi tamo ƀă mot tơrŭm lâp plâi tơnêi.

4.Mơdêk ‘mâi pro ‘na liăn ngân khăm pơlât ƀă mơnhông châ tơƀrê, krá tơniăn troăng hơlâ ƀaoh hiêm khăm pơlât.

5.Châ tơƀrê hluâ pơkâ mơnhông khoa hok, kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ tâi tâng tung rak ngăn ivá.

6.Mơdêk mơnhông tơdroăng khăm pơlât krê, mơhnhôk ƀă xúa châ tơƀrê rêm kơxô̆ liăn, mơngế pêi cheăng ăm mơnhông khăm pơlât.

Tơdroăng pơkâ 72 ai kơnâ kal khât tung troăng pêi cheăng ton xŏn mơnhông mơdêk tơnêi têa. Môi tơnêi têa bu chiâng mơnhông krá tơniăn drêng kuăn pơlê mo châ. Mơ’no liăn cheăng ăm khăm pơlât cho mơ’no liăn cheăng ăm tơdroăng la ngiâ, ăm mơngế pêi cheăng – cho ki xiâm dêi tơtêk cheăng kâ ƀă rơkê pơlê pơla.

Tơdroăng pơkâ ôh tá xê to tơpui ƀă pêi pro mâu tơdroăng ki u ối, kơdroh dêi hngêi pơkeăng nôkố, mê ối mơjiâng mâu tơdroăng châ tơƀrê ‘na troăng tơmiât ƀă pêi pro. Tơdroăng pơhlêh rơdêi ing “pơlât” troh “rak ngăn ivá tâi tâng”, ing ki kơdrâ troh hbrâ xêh, ing pơlât troh hbrâ mơdât cho troăng prôk ki kal, tơtro ƀă tơdroăng mơnhông lâp plâi tơnêi.

Tơdrêng amê, Tơdroăng pơkâ 72 gum pro krá tơniăn tơdroăng loi tơngah dêi Kuăn pơlê tung tơdroăng khăm pơlât, mơdêk ki dâi lĕm tơdroăng rêh ối ƀă kơlo têk chu hơniâp lĕm tơnêi têa. Kố xuân cho tơdroăng ki kal gum Việt Nam mơdêk ivá tơbriât ƀă tíu ối tung lâp plâi tơnêi.