Nâ Võ Thị Tuyết Nhung, pêi cheăng a Khoa Tiêu hóa, cho môi ngiâ méa ki kơhnâ rơkê má môi. 9 hơnăm pêi cheăng khăm pơlât, ôh tá xê to tâi ihiâm mơno rak ngăn, khăm pơlât mâu vâi hdrêng tamo châi, nâ ối hên xôh pleăng mơheăm drêng kal thâ. Troh nôkố, nâ hiăng ai 22 xôh pleăng mơheăm thâ, teăm tơdrêng veăng gum tŏng rêh hên ngế châi tamo ki râ. Ƀă nâ, rêm roh ăm mơheăm cho tơ’nôm môi roh tơ’lêi vâ châ rêh châ vêh diâp ăm.

“Drêng thâ pơlât môi tiah mê á bu tơmiât cho pleăng mơheăm ăm mâu pú hmâ, djâ ăm môi roh tơ’lêi ăm mâu pú hmâ. Mê mâu roh drêng mê á tâ sôk ro xua á hiăng pêi châ môi tơdroăng ki lĕm ăm mâu ngế ki ê. Ôh tá xê to môi ngế á djâ mâu tơdroăng kố troh ăm rêm ngế, mê ai kơnốu á, nôu á, ngoh nâ á ƀă cho tâi tâng mâu ngế tung rơpŏng á pơrá pleăng mơheăm. Laga drêng thâ pơlât, kal mơheăm ki lâi mê á xuân hbrâ pleăng ăm mâu pú hmâ’’.

Rơtế ƀă nâ Nhung, pleăng mơheăm hiăng chiâng tơdroăng ki hmâ ƀă mâu khu kăn ƀô̆, nhân viên khăm pơlât dêi hngêi pơkeăng pơlât Vâi hdrêng tamo châi kong pơlê Gia Lai. Kăn pơkuâ râ kơbong môi tiah nâ Đỗ Thị Thu Hà tối ăm ‘nâi:

“Á tơmiât cho môi kơto mơheăm ăm cho ăm môi ngế châ rêh, mê á tơmiât mê cho tơdroăng ki kơnâ kân. Drêng mê á ôh tá ai tơmiât cho môi tơdroăng kân ki klâi ôh. Drêng mê hlo ngế tamo châi dế kal thâ khât, kal châ thâ pơlât. Drêng mê hlo ngế tamo châi kal châ thâ pơlât mê á tơmiât cho a á ai ivá mê á kô ăm’’.

Lơ a khoa ƀok thái pơkeăng ngoh Rmah Din pơrá hiăng hên xôh pleăng mơheăm, tối:

‘’Tâi tâng mâu ngế pêi cheăng khăm pơlât a Hngêi pơkeăng pơlât Vâi hdrêng tamo châi pơrá ai tuăn ihiâm mơno vâ pleăng hnoăng cheăng vâ tŏng gum mơngế tamo châi. Ihiâm mơno xua ngế tamo châi cho ahdrối, xua mê mâu ƀok thái pơkeăng lơ mâu điều dưỡng lơ mâu ngế pêi cheăng ki ê dêi hngêi pơkeăng đi đo hâk vâ tơdroăng ki pleăng mơheăm vâ tŏng gum mơngế tamo châi kal mơheăm.’’

Châ hlo tơdroăng pơlât hên mơheăm ki ai xêh sap ing pơxiâm kot mâ (Thalassemia) dêi kuăn a Hngêi pơkeăng pơlât vâi hdrêng Gia Lai, nâ Nông Thị Tươi, ối a cheăm Ia Piơr ôh tá kâi mơdât ki rơrêk tung ihiâm mơno mâu tơdroăng ki tâi ihiâm mơno dêi khu ƀok thái pơkeăng akố. Drêng roh ki thâ lơ drêng kơto mơheăm vâ pơlât ôh tá ai, cho mâu ƀok thái pơkeăng hiăng khên tơnôu pleăng mâu kơto mơheăm dêi tơná vâ teăm tơdrêng thâ pơlât ăm mâu vâi hdrêng ki tamo châi.

“Kuăn á châi tamo kal hên mơheăm sap ing pơxiâm kot mâ nah, ƀă rêm khế thế mot akố pâk tơ’mot mơheăm, thế pâk tơ’mot mơheăm đi đo. Ƀă akố đi đo ai hbrâ kơxô̆ mơheăm vâ mâu muăn tơniăn ivá’’.

Mâu kơto mơheăm tuăn pâ ôh tá xê to veăng gum rêh ăm hên ngế tamo châi, mê ối troh lâp lu trâu hơngế tơdroăng pơtâng hnê tối tuăn pâ tung pơlê pơla. Mê xuân cho mơnhên ki tiah hlo ƀă mâ ăm rơkong hnê ‘’Ƀok thái pơkeăng thế môi tiah ngế nôu’’ drêng ngế ƀok thái pơkeăng ôh tá xê to pơlât mâu ngế tamo châi, mê ối diâp tơdroăng ki pói tơngah rêh ăm ngế ki ê, ƀă mâu tơdroăng ai ti lâi mơhno ti mê laga cho kơnâ kơnía kân ‘nâng.