Ƀok thái pơkeăng Hoàng Hải Phúc tối ăm ‘nâi, ngế ki tro kuăn kiâ, mơnăn kâ hlâ roh kố cho muăn Y.J.P.H.Đ (5 hơnăm, ối a cheăm Krông Năng, kong pơlê Dak Lak). A hâi lơ 30/4, muăn tâ tơbrê tung châ, xâu kong tô, xâu khía, ôu kâ ôh tá lŏn, lo hêa ƀă châi klêa. Troh hâi lơ 2/5, muăn châ djâ a Hngêi pơkeăng kân Kơpong Tây Nguyên vâ khăm ƀă pơlât.

Hâi lơ 3/5, muăn hiăng châi râ, ‘nâi hdrối mơni kô hlâ. Rơpŏng pâ djâ vêh a hngêi ƀă tối tơdroăng châi: sốc nhiêm trung, nhiêm trung huyết, châi lâp châ, châi troăng klêa, êi ngôa, séa ngăn tơdroăng châi kôk rơsok ƀă kơdroh troăng hiêp đô̆ IV. Rơtế hâi mê, ngế ối kŭn ki tro kuăn kiâ kong kâ kố hlâ a hngêi. Tiô mơngế tung hngêi ăm ‘nâi, dâng 4 khế hdrối drêng mot pơlât, muăn tro miếo dâng 6 khế kơ’viêo a kŏng peăng hơ’vá.