Ki má môi môi tiah a troăng kân Tơnêi têa 20, a văng D’ran tơdjêp Đà Lạt ƀă Phan Rang, troh nôkố hiăng lối 6 khế klêi tơnó tơhnâp 60.000 m3 tơnêi hmốu tơdroăng rơnêu xuân tá hâi klêi. A tíu tơhnâp, kơ koan cheăng xuân thế kơdroh ăm rơxế kân lối 5 tâ̆n prôk lăm a kông ƀă tơ’lêi tơhnâp kông xua tơhnâp kong ki a peăng kơnâng.

Tơdrêng amê, a văng Prenn tíu peăng Hdroh tíu xiâm Đà Lạt, mơhé hiăng rơnêu klêi tíu tơhnâp pro tơhneăng troăng kân laga hên tíu a kơnâng kông ai tơdjâk tơhnâp pro chôm troăng kal rơnêu nếo ahdrối rơnó mêi. Pôa Nguyễn Thanh Long, Phŏ Kăn pơkuâ Khu pơkuâ mơjiâng tơmeăm kong pơlê Lâm Đồng tối ăm ‘nâi, tơdroăng rơnêu mâu tíu tơhnâp ƀă tơ’nhê troăng klông a kong pơlê xuân ối hrá tâng pơchông ƀă pơkâ nôkố.