Kơxo hâi lơ 13/5, a rôh mơgêi hneăng hôp mâu kăn tung lâp tơnêi têa Măt trâ̆n tơnêi têa Việt Nam rôh má 11, hneăng 2026-2031, teăng mâ Khu kăn hnê ngăn Vi ƀan xiâm Măt trâ̆n tơnêi têa Việt Nam, jâ Hà Thị Nga, Phŏ kăn hnê ngăn - Kăn xiâm chêh tôm xo rơkong  Vi ƀan xiâm Măt trâ̆n tơnêi têa Việt Nam hneăng 11 hiăng tối tơbleăng tơdroăng Hôp roh má môi Vi ƀan xiâm Măt trâ̆n tơnêi têa Việt Nam hneăng 2025-2031.

Kăn hnê ngăn Tíu xiâm Đảng, Kăn hnê ngăn Đảng ủi Măt trâ̆n tơnêi têa, mâu khu grup Tíu xiâm, Kăn hnê ngăn Vi ƀan Tíu xiâm Măt trâ̆n tơnêi têa Việt Nam hneăng 10 - jâ Bùi Thị Minh Hoài, pơtối châ rah xo, hôp tơpui ‘na tơdroăng pơtối pro Kăn hnê ngăn Vi ƀan Tíu xiâm Măt trâ̆n tơnêi têa Việt Nam hneăng 11, hneăng 2026-2031. 

Tối tơbleăng drêng xo pêi hnoăng cheăng, Jâ Bùi Thị Minh Hoài tơhrâ kô pơtối rak krá tuăn chân krá kal kí, hiâm mơno ki lĕm tro; kơhnâ khât, pêi cheăng tâi ivá, pêi tâi tá hiâm mơno, pơtối rak ki môi tuăn kuăn pơlê, tuăn ngôa rơkê, mơdêk hnoăng cheăng, mơ-eăm  khât, pê klêi hnoăng cheăng châ pơcháu.

Tơdrêng amê, rak ki môi tuăn, tơrŭm môi; rơkê plĕng, hriăn plĕng ki nếo, hơ‘lêh nếo, tơkŭm tơbleăng pêi tơdrêng mâu tơdroăng cheăng, troăng hơlâ pêi klêi Pơkâ Hneăng hôp ai tơbleăng, veăng mơnhông tơrŭm dêi rơpó tâi tâng hdroâng mơngế, mơhno nhên hnoăng cheăng pêi, ki rơdêi dêi Măt trâ̆n tơnêi têa Việt Nam tung mâu hơnăm hơ’lêh nếo.