Hâi lơ 14/5, a Tíu pêi cheăng Tíu xiâm Đảng, Khu hnê mơhno tối mơgêi 100 hơnăm Đảng pơkuâ hnê kăch măng Vịêt Nam, troăng hnê mơhno mơnhông tơnêi têa tung 100 hơnăm pơtối ƀă tối mơgêi 40 hơnăm pêi tiô Tơdroăng luât mơjiâng tơnêi têa tung rơxông  prôk tiô troăng chuh ngiah xah hội tơkŭm po hôp roh má môi. Pơkuâ hôp, pôa Tô Lâm Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, mơgêi 100 hơnăm Đảng pơkuâ hnê mơhno, 50 hơnăm pêi pro tiô tơdroăng Luât thế hlê trâu tơdroăng ton nah, ki kal dêi tơdroăng tơpui ƀă ki vâ tơbâ mâu tơdroăng vâ ăm pêi tung la ngiâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tuăn vâ thế tơpui nhên tâ túa mơnhông dêi Việt Nam túa pêi cheăng chuh ngiah xah hô̆i ƀă troăng hơlâ pro tiô troăng chuh ngiah xah hô̆i Việt Nam tơdrêng ƀă mâu tơdroăng tơrŭm ki kân ai pêi tiô luât tung mơjiâng chuh ngiah xah hô̆i; mơjiâng troăng tơmiât vâ pêi pro vâ mơjiâng luât mơnhông tơnêi têa ƀă kring vế Tơnêi têa tung chal nếo - châl dêi mơnhông tơná dêi hdroâng mơngế.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên 3 tơdroăng pơkâ thế ‘na troăng hơlâ mơgêi, tung mê, thế tơkŭm chiâng hlâu pơla tơpui tơno ƀă ki ai khât; pơkâ thế ăm tung la ngiâ thế ngăn a tơdroăng ăm hlo ki ai khât dêi khoa hok, tối tơbleăng hdrối ki tơdroăng pêi pro hmâ hlo ƀă pơkâ mơnhông tơnêi têa.