Nôkố EVNGENCO1 dế pơkuâ ăm pêi cheăng hên hngêi kơmăi on tơhrik ki kal a Lâm Đồng môi tiah a Đại Ninh, Đồng Nai 3, Đồng Nai 4, Dà Nhim, Hàm Thuận – Dà Mi ƀă on tơhrik kơtâu ƀă mâ hâi đông pêng long têa Dà Mi, ƀă tâi tâng ivá dâng 1.615MW. Pơtối mơnhên troăng prôk la ngiâ mơjiâng on tơhrik ki vêh pro, EVNGENCO1 pơkâ mơ’no 3 tơdroăng tơkêa bro on tơhrik kơtâu ƀă mâ hâi đông pêng têa a Lâm Đồng, mê cho: tơdroăng tơkêa bro Hngêi kơmăi On tơhrik kơtâu ƀă mâ hâi đông pêng long têa Đại Ninh ivá dâng 96MW, tâi tâng kơlo liăn mơ’no tiô tối hdrối dâng 1.600 rơtal liăn; tơdroăng tơkêa bro Hngêi kơmăi On tơhrik kơtâu ƀă mâ hâi đông pêng long têa Hàm Thuận hneăng má 1 ivá dâng 100MW, tâi tâng kơlo liăn mơ’no tiô tối hdrối dâng 1.650 rơtal liăn ƀă tơdroăng tơkêa bro Hngêi kơmăi on Tơhrik kơtâu ƀă mâ hâi đông pêng long têa Dà Mi hneăng má 2 ivá dâng 70 MW, tâi tâng kơlo liăn mơ’no tiô tối hdrối dâng 1.150 rơtal liăn.

Mâu tơdroăng tơkêa bro châ hriăn plĕng ing xúa ƀăng long têa mâu hngêi kơmăi on tơhrik ki ai nôkố, tơtro ƀă troăng hơlâ mơjiâng on tơhrik ki vêh pro dêi Chin phuh ƀă mơnhên troăng prôk la ngiâ tiô troăng on tơhrik krúa lĕm.