Hâi lơ 14/5, a rôh hôp chuyên đề, Hô̆i đong kuăn pơlê dêi kong pơlê Khánh Hòa hiăng tơbleăng hên pơkâ ki kal ‘na mơnhông cheăng kâ-pơlê pơla. Ki vâ tối, kong pơlê Khánh Hòa hiăng tơbleăng troăng hơlâ tơbleăng tơdroăng tơkêa bro troăng kân tơdrăng Nha Trang - Đà Lạt tiô troăng hơlâ tơrŭm cheăng ƀă PPP. Tiô pơkâ, Hội đong kuăn pơlê kong pơlê pơcháu ăm Vi ƀan kuăn pơlê dêi kong pơlê Khánh Hòa  tối kô ăm dâng 1.500 rơtal liăn ing kơxô̆ liăn pơkâ ‘no mơ jiâng tơmeăm khoăng pơla hơnăm 2026-2030 vâ chêl thiăn, gu tơbăng tơnêi tíu pro, kơjo kum ƀă pơtối pro pơlê nếo.

Tơdroăng tơkêa bro troăng kân Nha Trang - Đà Lạt (tâi tâng kơxô̆ liăn pro tiô tối hdrối lối 25 rơpâu rơtal liăn), ai pơxúa kal tung tơrŭm mơnhông pơla kong pơlê Khánh Hòa ƀă Lâm Đồng. Troăng kân mê kô pro klêi troăng pơla ki tơdjêp ƀă kơpong Tây Nguyên ƀă kơpong kĭng êa kơxĭ ‘na hdroh tơnêi têa, mơdêk ivá tơdjêp pro troh a kơno tuk têa kơxĭ, tíu xiâm cheăng kâ ƀă mau tíu ôm hyô.