Đăi tă Trần Văn Quyển, Lưh đoân trương Lưh đoân 146 tối ăm ‘nâi: Hâi lơ 8/5/1978 cho hdró tơdroăng roh nah ki kal, po troăng prôk nếo dêi môi đông lêng djâ tung châ tơná hnoăng ki krip krih: Mơjiâng khu lêng hbrâ tơplâ kring tơniăn rơlố, rĕng tơniăn khu pêi cheăng, tơkâ hluâ rêm tơdroăng pá puât apoăng, chôa ‘lâng mơjiâng lĕm chính quy, tơkŭm po pơtâp, mơjiâng troăng pêi cheăng tơplâ kring tơniăn rơlố. Tơkâ hluâ 48 hơnăm, Lưh đoân 146 hiăng chiâng khu ki xiâm tung pơkuâ, kring tơniăn rơlố Trường Sa.

Bu riân krê tung 10 hơnăm hiăng hluâ, tíu cheăng châ hlo lối 5 rơpâu roh pơkâ pêi a rơvâ plêng, a têa kơxĭ; teăm tơdrêng tơbleăng, tơleăng mơnhên châ tơƀrê rêm tơdroăng, ôh tá lôi tro ôh tá ‘nâi pêi pro, tro kơdrâ; pêi pro vâ chê 150 roh ti tăng tŏng gum; thâ pơlât, pơlât vâ chê 1.500 roh kuăn pơlê tơnăng ká xi xŏng; tŏng toi vâ chê 60 roh tuk ká tro trâm xía vâ vêh tơniăn.

Tiô Đăi tă Trần Văn Quyển, nôkố, hdrối pơkâ hnoăng cheăng kring tơniăn hnoăng pơkuâ têa kơxĭ rơlố tung tơdroăng nếo, Lưh đoân 146 đi đo mơdêk ki hôm hnê pơtâp, chiâng rơkê hbrâ tơplâ, mơjiâng Lưh đoân krá rơdêi tâi tâng.

‘’Lưh đoân đi đo hlê plĕng ƀă pêi pro tŭm troăng hnê pơtâp ki xiâm, kal păng ‘nâng, krá tơniăn; tơkŭm po hnê pơtâp tro hnoăng cheăng, tro mơngế ki tơplâ, tro tơdroăng nôkố tíu tơplâ a têa kơxĭ rơlố. Tơdrêng amê rak kơtăng khu lêng, tuk hbrâ rơnáu tơplâ, mơdêk ivá tơleăng rêm tơdroăng, ôh tá lôi ôh tá chiâng pêi pro ki klâi, kơdrâ tung rêm tơdroăng’’.

Ôh tá xê to tơtrŏng mơdêk ki dâi lĕm pơtâp, hbrâ tơplâ, Lưh đoân 146 ối lĕm má môi tơmâng mơjiâng khên tơnôu kal kí, khŏm mơ-eăm ăm kăn ƀô̆ tíu rơlố hơngế. Tung dế tíu ki phá tơ-ê to kong tô khía, hơngế tơnêi, trâm ƀă hên pá puât, pơloăng mơnúa, tơdroăng hnê hriâm kal kí, troăng tơmiât đi đo châ khu râ kăn pơkuâ cheăng Đảng, khu râ kăn pơkuâ mâu râ pêi pro đi đo, châ tơƀrê, gum kăn ƀô̆, mâu lêng thăm krá tíu a ko têa rơlêa. Đăi tă Phạm Văn Thọ, Chính ủi Lưh đoân 146, Kơpong 4 Lêng gâk kring têa kơxĭ tối rơdêi:

“Ngin hiăng pêi pro tơdâng tơ’mô mâu troăng pêi, tung mê tơmâng troh tơdroăng hnê hriâm tiô khôi vâi krâ nah vâ mơnhông ăm rêm kăn ƀô̆, mâu lêng tơdroăng hâk mơnê, hâk tơngăm ‘na khôi túa vâi krâ nah dêi Khu Trường Sa Khên tơnôu. Ing mê, mơjiâng ăm kăn ƀô̆, mâu lêng khên tơnôu krá chân, krá tơniăn, khŏm mơ-eăm tơplâ; mơnhông hiâm mơno lĕm Mô đô̆i Pôa Hồ - ngế lêng Gâk kring têa kơxĭ; hbrâ tơplâ, pleăng hnoăng cheăng gâk kring krá tơniăn hnoăng têa kơxĭ, rơlố, tơnêi tơníu krih tơviah dêi Tơnêi têa tung rêm tơdroăng’’.

Mơnhông khôi túa vâi krâ nah đông lêng péa xôh châ diâp ăm inâi Ngế khên tơnôu Khu lêng kuăn pơlê, hâi kố, a mâu rơlố ối tung rơlố Trường Sa, kăn ƀô̆, mâu lêng Lưh đoân 146 xuân plâ hâi măng râng hnêa krá, tơnôu rơdêi gâk kring hnoăng pơkuâ têa kơxĭ rơlố krip krih dêi Tơnêi têa. Mơhé tơdroăng pêi cheăng ối hên pá puât, laga rêm ngế lêng Trường Sa đi đo mơnhên inhên hnoăng, ngăn rơlố cho hngêi, têa kơxĭ cho pơlê xiâm. Trung tă Trần Huy Phụng, Cheăng Kal kí Rơlố Trường Sa mơnhên:

‘’Kăn ƀô̆ mâu lêng a rơlố đi đo krá tơniăn kâi chân khên tơnôu kal kí, khŏm mơ-eăm ôh tá hêng thu khu vâi rơneăm. Hmâ trâm tơdroăng ti lâi, mơhé thế pleăng mơheăm chá ngin kô khŏm mơ-eăm gâk kring hnoăng pơkuâ têa kơxĭ rơlố krip krih dêi Tơnêi têa’’.

Hâk tơngăm pơtối khôi túa vâi krâ nah pôa pâ prôk hdrối, mâu rơxông kăn ƀô̆, mâu lêng hơnăm ối nếo dêi Lưh đoân 146 hâi kố dế pơtối pơtâp, pleăng hnoăng cheăng, veăng gum mơjiâng tíu cheăng krá rơdêi tâi tâng, djâ troăng ahdrối kơhnâ rơkê. Trung tă Nguyễn Thành Vũ, Kăn ƀô̆ hơnăm ối nếo Lưh đoân 146, Kơpong 4 Lêng gâk kring têa kơxĭ tối: Châ pêi cheăng tung đông péa xôh Ngế khên tơnôu Khu lêng kuăn pơlê cho tơdroăng ki hâk mơnê, hâk tơngăm kân ƀă rêm kăn ƀô̆ mâu lêng Khu Trường Sa:

‘’Á hâk tơngăm cho sih quan hơnăm ối nếo dêi Khu Trường Sa khên tơnôu. Á kô đi đo mơ-eăm tơkâ hluâ pá puât gum gâk kring krá tơniăn rêm rơlối, kơpong têa kơxĭ krip krih dêi Tơnêi têa’’.

Tơkâ hluâ vâ chê tơdế chal, sap ing mâu hâi apoăng trâm hên pá puât, tơmeăm khoăng ôh tá tŭm, mâu rơxông kăn ƀô̆, mâu lêng Lưh đoân hiăng mơdêk tơdroăng ki khŏm mơ-eăm, hiâm mơno rêh ối ƀă têa kơxĭ, mơdêk tơdroăng tơkêa: “Mơhé lơ hlâ laga ôh tá lo vêh ing rơlố; mơhé pleăng mơheăm châ ôh tá vâ hía lôi hnoăng pơkuâ’’. Tơkâ hluâ mơhot đi đo ƀă mâu tơdroăng ki trâm pá a têa kơxĭ, tung dế têa kơxĭ Trường Sa hâi kố, mâu ngế lêng Gâk kring têa kơxĭ xuân dế plâ hâi măng gâk kring têa kơxĭ Tơnêi têa ƀă tơdroăng ki khŏm mơ-eăm, hiâm mơno pôu râng hnoăng cheăng ƀă tơdroăng pói vâ pleăng đi đo.

Ing ko têa kơxĭ rơlêa mê, tiô khôi vâi krâ nah khên tơnôu dêi Khu Trường Sa xuân châ chêh pơtó ƀă mâu hnoăng cheăng châ tơƀrê nếo tung tơdroăng gâk kring hnoăng pơkuâ têa kơxĭ, rơlố krip krih dêi Tơnêi têa.