Cheăm Tà Năng, kong pơlê Lâm Đồng ai ƀăng tơnêi ki chiâng xêh lối 25.800 ha, pơ’leăng mâ mơngế vâ chê 14.000 ngế, tung mê hdroâng kuăn ngo châ vâ chê 78%. Klêi kơ’nâi 1 hơnăm pêi cheăng, troh nôkố tá Đảng ủi, Vi ƀan hnê ngăn, Vi ƀan Măt trâ̆n Tơnêi têa Việt Nam cheăm bu nếo ai tâi tâng 41 ngế ƀiên chê̆ ƀă ối kal 21 ngế ƀiên chê̆ nếo. Pôa Nguyễn Tiến Điền, Bĭ thư Đảng ủi cheăm Tà Năng, ăm ‘nâi, tung pơla tơdroăng cheăng hên mê Ƀơrô cheăng Đảng ủi cheăm bu ai 2 ngế ƀiên chê̆, Khu Mơjiâng Đảng 3 ƀiên chê̆, Vi ƀan Séa ngăn tơdroăng cheăng 2 ngế ƀiên chê̆, khô̆i măt trâ̆n đoân theh ki ôh tá hmâ ƀă khô̆i pơkuâ cheăng ối kal troh 9 ngế ƀiên chê̆. Hiăng tiah mê, la tơdroăng hriâm, ivá pêi cheăng dêi mâu kăn ƀô̆ cheăm ôh tá tơdâng tơ’mô:

“Bu ai 4 ngế cheăng ki ai mâ đi đo Bĭ thư, Phŏ Ƀĭ thư ki ai mâ đi đo, Kăn hnê ngăn ƀă 1 ngế Phŏ hnê ngăn châ pơtroh sap ing râ kong pơlê, râ tơring vêh, u ối mâu ƀiên chê̆ cho dêi 2 cheăm ‘mot tơkŭm mê ‘na ki rơkê plĕng, ivá pêi cheăng tá hâi châ tiô tơdroăng púi vâ. Xua mê, ối kal ƀiên chê̆ mê ối ai mâu ngế cheăng athế pêi hên tơdroăng cheăng. Nôkố môi ngế chuyên viên athế pêi dêi 4 – 5 Khu hnê mơhno”.

Phá ƀă tơdroăng ki ối kal ƀiên chê̆ a cheăm ki malối xơpá Tà Năng, tơdroăng ‘na kăn ƀô̆ xuân cho tơdroăng pơloăng a mâu bêng ki tơ’lêi hlâu dêi Lâm Đồng. Tung mê, bêng Xuân Trường – Đà Lạt, tơdroăng cheăng kăn ƀô̆ xuân cho tơdroăng ki ối tô tuăn khât. Jâ Ngô Thị Mỹ Lợi, Ƀĭ thư Đảng ủi bêng Xuân Trường – Đà Lạt, ăm ‘nâi, tơdroăng cheăng hên tâ a cheăm hdrối nah, xơpá tung tơdroăng cheăng mê chiâng pro ăm hên ngế kăn ƀô̆ pâ lo pơtê cheăng:

“Mâu kăn ƀô̆ kŏng chưk dêi bêng Xuân Trường – Đà Lạt nôkố gá ối kal hên khât, tơdroăng ki pâ lo pơtê cheăng dế rế hía rế hên. Đảng ủi hiăng ai 2 ngế kong chưk pâ lo pơtê cheăng. Ƀă Vi ƀan ai 3 ngế kăn ƀô̆ pơkuâ kơvâ cheăng pâ lo pơtê cheăng tiô tơdroăng ki tơná vâ pơtê ôh tá tơdjâk troh mâu tơdroăng tŏng gum ăm liăn ngân. Troh nôkố ngin hiăng tơdah xo tơ’nôm 4 hlá đơn pâ pơtê cheăng dêi kăn ƀô̆ kong chưk”.

Klêi kơ’nâi pêi pro tơdroăng ki ‘mot tơkŭm 3 to kong pơlê Dak Nông, Bình Thuận ƀă Lâm Đồng, kong pơlê Lâm Đồng nếo ai 124 to cheăm, bêng, kơpong pêi cheăng. Tung pơla ‘mot tơkŭm, pro lế lĕm tíu pêi cheăng Lâm Đồng ai 2.529 ngế pơtê cheăng tiô Pơkâ kơxô̆ 178; 145 ngế tiô Pơkâ kơxô̆ 07 ƀă pêi pro tơdroăng kơdroh kơxô̆ ngế pêi cheăng ƀă 1.450 ngế pêi cheăng a râ cheăm. Tơdroăng ki nếo sap ing Khu ngăn kong pơlê, cheăm bêng ƀă hnoăng cheăng dêi mâu kăn ƀô̆ kong pơlê Lâm Đồng, klêi kơ’nâi vâ chê 1 hơnăm ‘mot tơkŭm, tâng pơchông ƀă ƀiên chê̆ ki châ pơcháu nôkố râ cheăm ối kal 823 ngế, râ kong pơlê, kơvâ cheăng ối kal 990 ngế ƀiên chê̆.

Pôa Nguyễn Ngọc Phúc, Phŏ kăn hnê ngăn Vi ƀan kong pơlê Lâm Đồng, ăm ‘nâi, dế ai hên tơdroăng ki xơpá tung tơdroăng cheăng kăn ƀô̆ ngi klêng kal rĕng châ tơleăng.

“Hên hnoăng cheăng dêi râ tơring ƀă hên hnoăng cheăng dêi râ kong pơlê pơtroh vêh ăm râ cheăm. Ki pá má péa cho ivá pêi cheăng, tơdroăng ki rơkê plĕng vâ pêi cheăng dêi mâu nhŏng o ôh tá kâi pêi tâi mâu tơdroăng ki hdrối nah dêi tơring ƀă kong pơlê. Tơdroăng ki má pái nếo cho pá ‘na tơdroăng cheăng, pá ‘na hâi chôu tơbleăng, tro tiô chôu tro hâi khế pơkâ tung chêh pro hồ sơ pêi cheăng môi tíu. Tâng ôh tá kâi ‘mâi mơnhông dêi kơ koan cheăng râ cheăm ƀă ‘na mâu ngế cheăng dêi râ cheăm mê cho môi tơdroăng pá kân, pin athế hvái ngăn tơdroăng kố”.

A rôh hôp mơgêi 1 hơnăm pêi pro kăn pơkuâ 2 râ, Khu pơkuâ ngăn Đảng Lâm Đồng mơhno nhên: hên tơdroăng a râ cheăm la ƀiên chê̆ ối iâ, chiâng tơdjâk troh kăn ƀô̆ athế hlối pêi hên tơdroăng cheăng, pro pá kân; cheăng xing xoăng ƀiên chê̆ ƀă troăng hơlâ tŏng gum, troăng hơlâ kơjo gum ăm mâu kăn ƀô̆, kong chưk a cheăm bêng. Pôa Đỗ Thanh Bình, Ngế cheăng tung xiâm Đảng, Ngế xiâm ngăn kong pơlê ƀă hnoăng cheăng mâu kăn ƀô̆, ăm ‘nâi, sap ing tơdroăng ki ai khât 1 hơnăm pêi cheăng kăn pơkuâ 2 râ ƀă mơnhên nhên hơnăm 2026 cho “Hơnăm mơdêk ki rơkê dêi mâu kăn ƀô̆ kong pơlê”, Lâm Đồng kal séa ngăn, mơnhên tối, pơhlêh mâu kăn ƀô̆ râ cheăm, bêng; mơdêk rơdêi tơdroăng hnê tơdroăng cheăng ăm kăn ƀô̆.

“Rêm cheăm, rêm bêng mơnhên tối klâ xoăng kăn ƀô̆ mơ’no tối tơdroăng púi rơhêng vâ hnê tơdroăng cheăng. Tơdrêng amê hlối tro ƀă pêi pro klêi tíu pêi cheăng ƀă troăng hơlâ râng chêng mâu ngế pêi cheăng ki rơkê ‘na tơdroăng cheăng a kong pơlê, cheăm bêng. Túa tơmiât xing xoăng ƀă tŏng gum troăng hơlâ tŏng gum ƀă mâu ngế pêi cheăng ki ôh tá hmâ. Rêm râ, mâu kơvâ cheăng dêi Lâm Đồng athế hbrâ rơnáu, kơtăng tung tơkŭm pêi pro, tơkŭm lêi tah teăm tŏng gum tơdrêng, mâu tơdroăng xơpá, tơvâ tơvân mâu tíu kreăng vâ ăm túa pơkâ pêi kăn pơkuâ 2 râ pêi cheăng rế hía rế xêt, tơƀrê”.

Tơleăng mâu tíu kreăng kăn ƀô̆ klêi kơ’nâi vâ chê 1 hơnăm pêi cheăng kăn pơkuâ 2 râ, mâu tơdroăng ki châ hlo ing tơdroăng ai khât, kong pơlê Lâm Đồng dế pơtối klâ xoăng, pro klêi kơ koan cheăng tung kơvâ cheăng kal kí tro pơkâ hnê mơhno dêi Tơnêi têa. Rơtế amê Lâm Đồng dế tơkŭm mơdêk ki rơkê tung mâu kăn ƀô̆, kong chưk, viên chưk, malối cho râ cheăm bêng; pơtối séa ngăn, xing xoăng kăn ƀô̆ tơtro ƀă pơkâ thế dêi hnoăng cheăng; thăm mơnhông hnê, hriâm ‘na tơdroăng cheăng, kih năng kơxô̆ ƀă ivá pêi cheăng tơkŭm pêi pro vâ xúa kơ koan cheăng kăn pơkuâ 2 râ ai pơxúa, tơƀrê xo tơdroăng mê, tơdroăng ki hâk vâ dêi kuăn pơlê, khu mơdró kâ pro loăng rêh ki vê ngăn.