Hiăng luâ 70 hơnăm, pôa Ayun Y Hmoan, krâ pơlê xuân ối kơhnâ veăng tung tơdroăng cheăng Măt trâ̆n a ƀuôn Tri Gha, cheăm Ea Drăng, kong pơlê Dak Lak. Rêm hâi, pôa xuân pơrá lăm troh a rêm rơpŏng vâ ‘nâi tơdroăng cheăng rêh ối tung pơlê, sap ing pêt tơmeăm troh tơdroăng pêi cheăng kâ dêi droh rơtăm.

Séa ngăn Hneăng hôp khu kăn Măt trâ̆n Tơnêi têa Việt Nam rôh má XI ing mâu rơ’jíu, um tơvi, pôa Y Hmoan rơhêng vâ, Măt trâ̆n rêm râ hneăng ki nếo kô tơkŭm pêi tung mâu tơdroăng pơhlêh nếo túa pơkâ pêi cheăng mơdêk ki rơkê tung cheăng séa ngăn, tối tơbleăng. Ƀă cheăm kong ngo, kơpong hngế hngo, kơpong hdroâng kuăn ngo, kal tơ’nôm rơkong tơpui tối tơbleăng sap ing Măt trâ̆n vâ mâu tơdroăng pơkâ, troăng hơlâ tŏng gum châ tơbleăng pêi tơƀrê, ai pơxúa tâ.

Tiô pôa Y Hmoan, tơdroăng kố kal tơmâng ngăn khât drêng kố cho tŏng gum túa rêh kâ ối, tăng cheăng pêi ăm droh rơtăm a thôn pơlê.

“Á ro khât xua kuăn pơlê pơrá pêi pro tro mâu troăng hơlâ, tơdroăng pơkâ pêi pro dêi Đảng ƀă Tơnêi têa, kơnôm ing mê pơlê cheăm chiâng tơniăn lĕm. Vâi krâ nhŏng o nôkố rơhêng vâ má môi cho pơlê cheăm tơniăn, ai tơdroăng tŏng gum tung rêh ối, kuăn ‘nĕng ai cheăng pêi, pêi cheăng kâ mơnhông”.

Cho cheăm ki ai tơdroăng cheăng kâ hên cho pêi chiâk pêi deăng, kuăn pơlê kong pơlê Dak Lak xuân rơhêng vâ Măt trâ̆n tơnêi têa rêm râ ƀă hnoăng cheăng ngế ki teăng mâ ăm rơkong tơpui dêi kuăn pơlê, kô ai mâu rơkong pâ thế mơnhên tro tơxâng ăm Kuô̆k hô̆i, Chin phuh vâ pơhlêh troăng hơlâ tŏng gum ‘na pêi chiâk deăng, kuăn pơlê pêi chiâk ƀă thôn pơlê.

Ƀă tơnêi tơníu môi tiah Dak Lak, pêi chiâk deăng xuân ối trâm hên tơdroăng ki ôh tá mơhúa xua ôh tá tơniăn dêi kơchơ tê mơdró ƀă hyôh kong prâi pro pơhlêh, la tơdroăng ki tê tơmeăm pêi lo ing chiâk deăng, tơdroăng ‘na tŏng gum ăm kơvâ pêi chiâk xuân kal châ tơmâng khât. Jâ H’Wơn Kmăn, ngế pơkuâ ƀuôn Knach, cheăm Dak Liêng, kong pơlê Dak Lak pâ thế:

“Akố tơdroăng rêh kâ ối dêi vâi krâ kuăn pơlê ối trâm hên xơpá, ngin xuân rơhêng vâ Măt trâ̆n tơmâng mâu rơkong tơpui tối, pâ thế dêi kuăn pơlê vâ tối tơbleăng ăm râ kơpêng, ai mâu troăng hơlâ tŏng gum tơtro ƀă mâu ngế ki châ tơnêi têa tŏng gum, ngế ki xơpá, tŏng gum ‘nhiê tah hngêi ối pơtân, tơ’nhiê xi kơchoh, gum ăm hdrê pêt, vâ mơnhông cheăng kâ tơniăn tung rêh ối”.

Rơtế ƀă mâu tơdroăng rêh kâ ối, pêi cheăng kâ, tơdroăng rêh ối, séa ngăn Hneăng hôp khu kăn Măt trâ̆n Tơnêi têa Việt Nam rôh má XI, mâu kuăn pơlê kong pơlê Dak Lak xuân tơkôm, mâu hiâm mơno tơmiât, tơdroăng púi rơhêng vâ sap ing cheăm bêng châ tơnâng hmâng tŭm, tối tơbleăng tơdrăng ƀă pơhlêh troăng hơlâ chiâng tơdroăng ki tro ƀă tơdroăng ki ai khât.

Tiô pôa Lương Triều Dương, bêng Tuy Hòa, kong pơlê Dak Lak, tơdroăng ki kal má môi cho mâu kăn ƀô̆ măt trâ̆n, kăn ƀô̆ cheăm bêng athế achê ƀă kuăn pơlê, hlê kuăn pơlê ƀă ‘nâi hmâng rơkong tơpui sap ing kuăn pơlê.

“Á bú rơhêng vâ môi tơdroăng vâi tơpui athế chiâng pêi, athế achê kuăn pơlê, hlê kuăn pơlê, hmâng rơkong kuăn pơlê tơpui, kal athế plâ mơdât mâu tơdroăng ki ôh tá tro môi tiah kâ kơhveăm liăn ngân”.

Tung pơla pơhlêh kơxô̆ châ pêi pro mơdêi, a hên cheăm bêng kơpong hngế hngo dêi kong pơlê Dak Lak, mâu Zalo pơlê pơla dế chiâng kông tơdjêp hmâ pơla kuăn pơlê ƀă kuăn pơkuâ ƀă Măt trâ̆n a cheăm bêng. Pakĭng mâu rôh trâm mâ, hên tơdroăng tối tơbleăng dêi kuăn pơlê nôkố châ tơmâng xo ing phôn râng kŏng, khu mâu kuăn pơlê lơ mâu tôh kong ngê̆ kơxô̆. Sap ing tơdroăng ‘na troăng prôk hiăng tơ’nhiê, ôh tá ai têa xúa troh tơdroăng chêh pro mơ-éa, hên tơdroăng pâ thế hiăng châ pơtroh ăm kăn pơkuâ cheăm bêng.

Tiô pôa Phạm Văn Bảy, Phŏ kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak, pơkâ thế pơhlêh nếo túa tơkŭm, mơhnhôk kuăn pơlê dế pơkâ mơ’no nhên tâ ƀă troăng hơlâ Măt trâ̆n rêm râ, malối cho a kơpong hngế hngo kơpong kuăn pơlê hdroâng kuăn ngo. Tung mê, tơdroăng ki hbrâ rơnáu tơmâng mâu rơkong tối sap ing cheăm bêng ƀă ứng dụng kong ngê̆ kơxô̆ cho pơkâ thế ki kal vâ mơdêk tơƀrê tung tơdroăng cheăng.

“Vâ pêi châ tơdroăng kố mê pin athế ứng dụng kong ngê̆ thong tin, ứng dụng kơxô̆ vâ tung mâu tối tơbleăng tơdroăng kal tơkŭm, tơbleăng mâu tơdroăng gá rĕng tâ, tơdrêng tâ; hmâng mâu rơkong tơpui tối dêi kuăn pơlê, tơdrêng amê, hlối hnê tối mâu tơdroăng cheăng ki kal troh ăm kuăn pơlê vâ kuăn pơlê châ pơxúa ing tơdroăng cheăng mê tiô túa ki tơƀrê khât”.

Pơhlêh nếo tơdroăng kal, túa pơkâ pêi cheăng tiô troăng ki achê ƀă kuăn pơlê, tro ƀă kuăn pơlê, troăng prôk rơdêi troh a cheăm bêng ƀă mơdêk rơdêi tơdroăng ki xúa pơhlêh kơxô̆ dế cho pơkâ thế ăm Măt trâ̆n Tơnêi têa tung hneăng ki nếo. Sap ing ƀlêi chiâng dêi Hneăng hôp khu kăn Măt trâ̆n Tơnêi têa Việt Nam rôh má XI, kuăn pơlê Dak Lak tơngah rơkong tơpui sap ing cheăm bêng kô pơtối châ tơmâng tŭm tâ, mâu tơdroăng ki xơpá tung tơdroăng rêh ối teăm châ tơbleăng tâ ƀă mâu troăng hơlâ tŏng gum rế hía rế tro ƀă tơdroăng ki ai khât tâ.