Khu kăn Kuô̆k hô̆i kong pơlê Gia Lai tơkŭm po Rôh hôp trâm mâ kuăn pơlê klêi kơ’nâi Hneăng hôp má Môi, Kuô̆k hô̆i hneăng má XVI tiô túa ki ‘no tơdrêng ing troăng hyôh internet tơdjêp troh a mâu cheăm, bêng. A rôh hôp, kuăn pơlê 2 to tíu pêi cheăng tâ phĭu tối tơbleăng hên tơdroăng ki ai tơdjâk troh ‘na ‘no liăn pro troăng prôk, troăng hơlâ tŏng gum ăm kuăn pơlê, rak vế tơniăn tŏng gum rêh ối pơlê pơla, tŏng gum chêh pro klêi mâu hlá mơ-éa, xoăng mâu ngế pêi cheăng ôh tá hmâ, liăn tŏng gum ăm kăn ƀô̆ khô̆i Đảng pơhlêh troh pêi cheăng a kong pơlê, kơxô̆ liăn tŏng gum ăm mâu ngê̆ nhân ƀă mâu kâu lak ƀô̆ ngê̆ thuât khôi hmâ.

Hên kuăn pơlê tối kal vâ ‘nâi plĕng khât troh ivá pơkuâ pêi cheăng dêi kăn pơkuâ kong pơlê drêng râ cheăm châ klâ xoăng ‘mot tơkŭm châ xoăng tơ’nôm hên hnoăng pơkuâ. Kuăn pơlê tối tiah kố tơdroăng ki chêh pro mâu hlá mơ-éa a mâu tíu pêi cheăng ki ‘nâ ối hrá, ôh tá ai tơdroăng ki hbrâ rơnáu hdrối; xua mê, râ cheăm kal pơhlêh nếo túa tơmiât pêi cheăng pơkuâ ngăn, mơdêk hnoăng cheăng pôu râng dêi hnoăng ăm Kuăn pơlê, vâ ví pôi tá ăm kuăn pơlê athế prôk lăm hên xôh môi tiah dế nôkố.

Tơpui a rôh hôp, pôa Nguyễn Hồng Diên, Phŏ kăn xiâm hnê ngăn Kuô̆k hô̆i tơmâng xo mâu rơkong tơpui tối pâ thế, tro ƀă tơdroăng ki ai khât dêi kuăn pơlê ƀă ăm ‘nâi Khu kăn Kuô̆k hô̆i kong pơlê Gia Lai kô chêh xo tŭm mâu rơkong pâ thế mê vâ pơtroh ăm kơ koan ki ai hnoăng pơkuâ séa ngăn, tơleăng.

“Klêi kơ’nâi chêh xo tâi mâu rơkong tơpui tối, pâ thế mê ngin klâ xoăng mâu tơdroăng pro chiâng péa khu: cheăng kâ-‘no liăn cheăng ƀă tơrŭm kơ koan cheăng tơnêi têa – troăng hơlâ tŏng gum liăn. Tơdế mâu rơkong tơpui tối pâ thế kố ối tung hnoăng pơkuâ tơleăng dêi râ kong pơlê ƀă râ cheăm, rơhêng vâ mâu kăn pơkuâ cheăm, bêng kal tơkŭm khât vâ tơleăng mâu tơdroăng, xua ki khât nôkố hnoăng pơkuâ dêi râ cheăm, bêng cho hên. Malối, Chin phuh dế tơpui tơno ‘na tơdroăng pơtối poê kơdroh mâu mơ-éa chêh pro ối tung râ Tơnêi têa vâ pơcháu ăm kong pơlê. Mê kơvâ cheăng, hnoăng cheăng ƀă hnoăng pơkuâ dêi râ cheăm tung la ngiâ kô châ mơdêk hên tâ. Cheăm, bêng cho tíu ki trâm mâ ƀă pêi cheăng ƀă kuăn pơlê, mê athế mơ-eăm, hbrâ rơnáu vâ tơleăng klêi mâu tơdroăng ki ai pơxúa tơdjâk troh tơdroăng rêh ối dêi kuăn pơlê".

A cheăm Phúc Thọ Lâm Hà, pôa Lâm Văn Đoan – Phŏ pơkuâ Vi ƀan Túa lĕm tro ƀă Pơlê pơla dêi Kuô̆k hô̆i, ối tung Khu kăn Kuô̆k hô̆i kong pơlê Lâm Đồng, hiăng trâm mâ kuăn pơlê klêi kơ’nâi Hneăng hôp má Môi, Kuô̆k hô̆i hneăng má XVI. Tung tơdroăng ki tơniăn krê, tơdrăng, kuăn pơlê tối môi tuăn khât ƀă klêi kơ’nâi dêi hneăng hôp, hlối tối tơbleăng hên tơdroăng ki pá, tơvâ tơvân a kong pơlê.

Hên rơkong tơpui tối pâ thế ‘na tơdroăng ki ai mâu tơdroăng tơkêa bro hrá tơbleăng tung pơla hnoăng cheăng xo tơvêh tơnêi châ pêi pro thâ tơdrêng, pro kuăn pơlê tôu tuăn, hêng hôu. Kuăn pơlê xuân tối tơdroăng ki chêh pro mơ-éa ối hlo ôh tá tơniăn, pro kuăn pơlê prôk lăm hên xôh; tơdrêng amê hlối pâ thế tơmâng ngăn ‘no liăn cheăng, ‘mêng pro troăng prôk tung thôn pơlê, pro tơ’lêi hlâu ăm tơdroăng ki prôk lăm pơto chơ tơmeăm ƀă châ xúa mâu tơdroăng khăm pơlât, hnê hriâm a kơpong hngế hngo.

Tơpui a rôh hôp, pôa Lâm Văn Đoan mơnhên tối khât hiâm mơno pôu râng, mâu rơkong tơpui tối pâ thế dêi kuăn pơlê; tối rơdêi Khu kăn Kuô̆k hô̆i kong pơlê kô tơmâng xo tŭm mâu rơkong tơpui tối pâ thế vâ pơtroh ăm Kuô̆k hô̆i, Chin phuh ƀă mâu khu xiâm kơvâ cheăng. Tơdrêng amê hlối pơkâ thế mâu khu râ, kơvâ cheăng, kong pơlê thăm mơnhông tơrŭm, tơkŭm tơleăng klêi mâu tơdroăng ki ối tung hnoăng pơkuâ, ví pro tơdjâk troh hnoăng pơxúa ki tơxâng ăm kuăn pơlê.

A Dak Lak, pôa Ngô Trung Thành - Phŏ pơkuâ Vi ƀan Luât ƀă Luât dêi Kuô̆k hô̆i rơtế ƀă Khu kăn Kuô̆k hô̆i kong pơlê Dak Lak hiăng trâm mâ kuăn pơlê a mâu cheăm Krông Bông, Čư̆ Pui ƀă Hòa Sơn. Kuăn pơlê pâ thế Tơnêi têa ‘no liăn pro troăng prôk tung klâng, pro hno têa, tíu hrik têa, hno têa a mâu cheăm ki hmâ tro têa lân lu; ‘mêng pro troăng mot tung cheăm, tung thôn ki hiăng tơ’nhiê; mơdêk rĕng tơdroăng ki pro mâu kế tơmeăm xúa tơdjuôm môi tiah troăng prôk, kông dế pro ton hâi khế. Pakĭng mê, kuăn pơlê rơhêng vâ ai troăng hơlâ pơkâ kơjo gum rah xo thái cô ăm kơpong hngế hngo; rĕng pơkâ tơdroăng chưk danh, kơxô̆ liăn tŏng gum ăm kăn ƀô̆ thôn, pơlê; rĕng xoăng liăn pêi cheăng tơdjuôm ƀă liăn dêi mâu tơdroăng pơkâ dêi tơnêi têa vâ pêi pro tơƀrê pơkâ pêi thăm mơnhông péa kơxô̆; pơtối tơmâng ngăn troh tơdroăng cheăng pêt loăng ngiât, rak ngăn kong ƀă prâu tah, tâp kơđu xok hvât hmâng vâ kơpong thôn pơlê.