A hên pơlê cheăm a kong pơlê Lâm Đồng, idrâp chêng koăng đi đo châ chuât xơtó tung mâu tơdroăng rêh ối pơlê pơla; tung mâu ếo pơtâk hdrông kuăn ngo châ mơhnhôk thế xâp tung rêh kâ ối rêm hâi; mâu tơdrá rơngê, ting ting, cheăng tê̆n ếo pơtâk, tê̆n pong chêa lơ túa rơkâu xối ‘na tơdroăng erêh xuân châ mâu rơxông rak vế ƀă hnê ăm mâu kuăn ‘nĕng cháu chái. Túa lĕm tro mâu hdrông kuăn ngo a kong pơlê: K’Ho, Mạ, Chu Ru, M’Nông, Chăm ƀă hên hdrông kuăn ngo ki ê a kong pơlê Lâm Đồng ôh tá xê ối tơniăn tung tuăn mơno mê ối châ ối tung mâu rôh kâ hmê, lăm a chiâk deăng, tung túa ki tơpui ƀă kong kế ƀă pơlê pơla. Ngê̆ nhân Ka Duýp, cheăm Đing Trang Thượng, ăm ‘nâi:

“Cho mơngế K’Ho, á hlo tiah kố nôkố tâng ôh tá rak vế túa lĕm tro hdrông kuăn ngo mê xo ah hmôi kô rế hía rế piu hiêt lôi. Hlo hnoăng cheăng ki mê, a Đinh Trang Thượng, á pơkuâ môi kâu lak ƀô̆ tŏn chêng koăng ăm hok tro. Sap ing cheăng pêi ki kŭm dêi mâu vâi o hok tro, xuân môi tiah môi plá on vâ mâu vâi o hlê ki kơnía ‘na túa lĕm tro, ‘nâi rak ƀă rak vế. Pakĭng mê, a Đinh Trang Thượng ối ai hên kâu lak ƀô̆ ki ê, ƀă ki xiâm pơrá cho vâ rak vế ki lĕm dêi túa lĕm tro chal krâ dêi mơngế K’Ho”.

Ngoh Kră Jan K’Druynhs – môi ngế ngê̆ sih hơnăm ối nếo dêi K’Ho a bêng Langbiang – Đà Lạt, ngoh rơtế ƀă dâng 20 ngế khu ki tơrŭm tung ƀă mâu ngế rơtăm, ngế droh ối a chêng ngo Lang Biang nôkố dế veăng mơđah tơbleăng a kơpong ôm hyô Langbiang Land. Tung mâu ƀai chêng, túa kơhnhon xuăng chal krâ, khu kố hiăng rơkê tơkŭm tơ’nôm mâu tơdroăng ki nếo vâ pro pơxúa ‘na ki achê, tơniăn lĕm tâ ăm tơmối la xuân ối ai hiâm mơno hâk vâ ‘na túa lĕm tro dêi kong pơlê. Mâu ngế cheăng tung khu châ tơngah kĭ tơkêa pêi cheăng tơniăn a kơpong ôm hyô ƀă 3 ngế ki mơđah tơbleăng rêm hâi, kơnôm mê ai liăn pêi lo tơniăn tâ.

Pôa K’Keo, krâ pơlê thôn Hàng Lang, cheăm Di Linh, kong pơlê Lâm Đồng ăm ‘nâi, mâu hơnăm hdrối nah, Đảng ƀă Tơnêi têa đi đo pro tơ’lêi hlâu tŏng gum vâi krâ kuăn pơlê ‘mâi mơnhông dêi mâu tơdroăng cheăng túa lĕm tro chal krâ. Ôh ti xê to a pơlê cheăm, chêng koăng ối châ hnê a mâu hngêi trung hriâm, rế hía rế ai hên mâu phô̆m vâ xông kân veăng hriâm tŏn. Tiô pôa K’Keo, krâ pơlê, cheăng tơkŭm po leh po mơdĭng kâ báu nếo cho rôh vâ kuăn ‘nĕng pơtó dêi rơpó, mơdêk khôi túa lĕm tro hdrông kuăn ngo.

“Tơná á cho krâ pơlê, ngế ki châ kuăn pơlê loi tung kơpong hdrông kuăn ngo ki iâ mơngế mê rơhêng vâ ‘mâi mơnhông túa lĕm tro kố, cho vâ hnê pơtó, rak vế ăm kuăn muăn cháu chái xo ah hmôi hriâm tâp. Tâng ai liăn ngân nếo mê rơhêng vâ ‘mâi mơnhông vâ pơtối rak vế túa lĕm tro tŏn chêng koăng túa lĕm tro dêi hdrông kuăn ngo dêi tơná, veăng tơrŭm tơdjuôm ƀă pơlê pơla mâu hdrông kuăn ngo nhŏng o”.

Klêi kơ’nâi ‘mot tơkŭm kong pơlê Lâm Đồng, Dak Lak ƀă Bình Thuận, kong pơlê Lâm Đồng nếo hiăng rĕng tơbleăng hên troăng hơlâ pêi pro ai pơxúa vâ rak vế tro túa lĕm tro ƀă mơnhông krá tơniăn. Mâu túa pơkâ pro ôm hyô pơlê pơla, túa lĕm tro chêng koăng, po lâm hnê tŏn chêng koăng châ mơhnhôk hriâm tơdrêng hlối a pơlê cheăm. Kuăn pơlê chiâng ngế ki xiâm vâ rak vế túa lĕm tro, rế tăng pêi lo liăn tơniăn sap ing kế tơmeăm kơnía ki ai hlâu ‘na túa lĕm tro. Ki khât gá ăm hlo, cheăng ăm túa lĕm tro dêi kong pơlê vêh châ vêh xúa tung tơdroăng rêh ối rêm hâi ôh tá xê to veăng gum rak vế mâu tơdroăng ki kơnía ‘na túa lĕm tro dêi pâ pôa, mê ối tối rơdêi túa lĕm tro krê ai dêi Lâm Đồng tung rôh mot tơrŭm cheăng. Kố cho tơdroăng ki kal vâ túa lĕm tro mâu hdrông kuăn ngo a kong pơlê châ rak vế krá tơniăn, rêh ối rơtế ƀă tơdjâk troh la ngiâ.