Tơdroăng ‘no liăn pro hngêi hôp tơdjuôm hlối pro tíu ối tung pơla kong mê khía mơhot têa kân lân lu a mâu thôn, pơlê, kơpong kơphô̆ a kong pơlê Dak Lak (hneăng má 1) ai tâi tâng liăn pro lối 170 rơtal liăn. Tơdroăng kố cho vâ pơhlêh troăng hơlâ dêi Đảng ƀă Tơnêi têa ‘na thăm mơnhông ivá hbrâ ví kong mêi khía mơhot têa kân lân lu, rak tơniăn ăm kuăn pơlê hdrối rơnó kong mê khía mơhot hiăng vâ troh.

Tơdrêng amê hlối pro klêi hngêi trăng, troăng klông vâ xúa tung tơdroăng rêh ối ăm Kuăn pơlê. Tiô pơkâ, pơla hneăng má 1 kô pro 100 toăng hngêi hôp hlối ối tung pơla kong mê khía mơhot a 27 to cheăm, bêng. Rêm toăng cho dâng 220 met karê, ƀăng tơnêi pro lối 440 met karê, mê cho 2 râ ƀă trêi ƀê tong trăng meăm, mơnât meăm thep krá ƀă trêi chiâng hbrâ mơdât tê lân lu. Mâu hngêi ki kố tiô tối kô pro klêi hdrối hâi lơ 15/9/2026, teăm xúa hdrối rơnó kong mê khía mơhot têa kân lân lu hơnăm kố.