Tơdroăng tơkŭm mâu ngế pế kơchâi kâ ƀă mâu ngế ki rơkê pế pơchên kơchâi kâ lo ing Việt Nam, Siam ƀă Malaysia, 3 kong têa ki rơdêi ‘na pêt mơjiâng, uâ bro plâi sầu riêng.             A talkshow, mâu ngế pế pơchên kơchâi kâ hiăng tơbleăng mơhno 7 túa kơchâi kâ. Mâu kơchâi kâ ai tơdroăng pêi pro ing pơla sầu riêng Dak Lak ƀă tơdroăng pế kơchâi kâ dêi 3 kong têa, ing kơchâi kâ ki kâ xah apoăng, kơchâi kâ xiâm troh kơchâi kâ má mơ’nui.

Hên ngế ki rơkê mơnhên, sầu riêng Dak Lak cho tơmeăm mơnhông ki kân vâ chiâng pro mâu tơmeăm kâ nếo, gum mơdêk ki kơnâ tơmeăm pêi lo ing chiâk deăng ƀă tơmối ƀă châ hlo khôi túa lĕm tro. Pôa Lý Kim Long, Phŏ Kăn hnê ngăn Khu rơkê pế pơchên kơchâi kâ Việt Nam, tối:

“Hâi kố á pế pro pơla kơchâi kâ ing xixŏng ƀă plâi sầu riêng, mơhnŏng rah xo xi xŏng cho tơmeăm ki phá tơ-ê ƀă ai hên má môi dêi Phú Yên ton pế ƀă plâi sầu riêng ki phá tơ-ê dêi Dak Lak. Xuân pói vâ hriăn plĕng vâ xúa mâu kơchâi kâ sầu riêng kố tung mâu kơchâi kâ, mơjiâng chiâng kế kâ ki phá tâ nếo ăm tơmối, mơhnhôk tơdroăng ki tê, gum pro pơhâk vâ ăm tơmối dêi Dak Lak tối krê ƀă Việt Nam tối tơdjuôm’’.

Tiô Khu tơkŭm po, talkshow ôh tá xê to tơbleăng mâu tơdroăng châ achê nếo tung uâ bro plâi sầu riêng mê ối tơmiât troh mơjiâng tơmeăm ôm hyô ki phá tơ-ê ing tơmeăm pêi lo ing chiâk deăng kong pơlê. Mâu kơchâi kâ tơtro kô châ hriăn plĕng, tơrŭm ƀă hngêi tê mơdró, hngêi ăm tơmối kâ koi ối pơtê tung pơlê vâ tê ăm tơmối tung roh Leh hô̆i Sầu riêng Dak Lak tơkŭm po a khế 8 la ngiâ. Pôa Nguyễn Quốc Hiệp, Phŏ Kăn pơkuâ Khôi túa lĕm tro, Tơ’noăng ivá ƀă Ôm hyô kong pơlê Dak Lak tối ăm ‘nâi:

“Ngin krếo ngế pơchên kơchâi kâ ki má môi pế mâu kơchâi kâ nếo ing plâi sầu riêng vâ châ hlo ƀă tơmiât pro rơkê mâu kơchâi kâ nếo ƀă mơdêk ki kơnâ dêi plâi sầu riêng tung kơchơ mơdró tung tơnêi têa xuân môi tiah kơchơ mơdró lâp plâi tơnêi, djâ ki kơnâ tơtêk tâ mê nếo ƀă mâu kơvâ plâi sầu riêng dêi pin’’.