A ƀuôn Hwiê, bêng Ea Kao, tơdroăng cheăng ‘mot tơkŭm hiăng châ tơbleăng troh rêm rơpŏng kuăn pơlê. Tiô tơdroăng ăm ‘nâi ing tơdroăng ki pơkuâ ngăn, drêng ‘mot tơkŭm, ƀuôn Hwiê nếo kô ai 454 rơpŏng ƀă 1.914 pơ’leăng mâ mơngế, ƀăng tơnêi lối 496 ha. Tơdroăng ki ‘mot tơkŭm 2 to ƀuôn châ xo tơdroăng ki môi tuăn khât xua tung hên hơnăm hdrối, ki hên vâi krâ kuăn pơlê tơrŭm môi tuăn. Nâ H’Trang Ƀuôn Yă, ngế ki ối a ƀuôn Hwiê ton ăm ‘nâi:

“Rêm rôh ai pơkoăng, ai ngế hlâ vâi xuân lăm troh akố, mê á hlo péa to ƀuôn xuân achê dêi pó, tơrŭm tro ƀă dêi rơpó. Nôkố ‘mot tơkŭm á xuân vâ môi tuăn, hlo tơdroăng ki ‘mot tơkŭm kô hmâ achê tâ, rế hía rế tơniăn lĕm tâ. Á rơhêng vâ ngế ki pơkuâ kô achê ƀă kuăn pơlê, hmâ ƀă kuăn pơlê, hlê khôi túa tơlá dêi kuăn pơlê vâ djâ pơlê cheăm rế hía rế mơnhông tơniăn lĕm tâ”.

Tơdroăng ki môi tuăn dêi kuăn pơlê a ƀuôn Hwiê châ mơhno nhên ing klêi kơ’nâi xo rơkong tơpui tối dêi 96% ngế kuăn pơlê vâ môi tuăn ƀă túa pơkâ ‘mot tơkŭm. Ki kal tâ, kuăn pơlê ôh tá xê to môi tuăn ƀă túa pơkâ ‘mot tơkŭm tíu ối, mê ối tơngah pơlê nếo9 kô ai tơ’nôm tơdroăng vâ mơnhông cheăng kâ rêh ối, rak vế khôi túa lĕm tro ƀă mơdêk tơdroăng rêh ối kuăn pơlê. Mê xuân cho troăng pơkâ pêi ki khu râ đảng ủi ƀuôn Hwiê mơnhên sap ing rôh chêh pro túa pơkâ ‘mot tơkŭm. Pôa Y Vui Ayun, kăn pơkuâ chi ƀô̆ ƀuôn Hwiê tối:

“Péa to ƀuôn klêi kơ’nâi ‘mot tơkŭm kô môi tuăn mơjiâng pro ôm hyô pơlê pơla ƀă mơjiâng pro mâu tơdroăng túa lĕm tro hdrông kuăn ngo dêi mơngế Rơđế môi tiah ếo pơtâk, mâu tơdroăng mơhno túa lĕm tro ngê̆ thuât dêi pơlê, túa pơkâ pêi ngin kô tơbleăng tê̆n ếo pơtâk dêi hdrông kuăn ngo. Ngin xuân rơhêng vâ pâ thế ƀă Đảng ủi po lâm hnê tŏn chêng koăng vâ mâu vâi o xo ah hmôi pơtó pâ pôa”.

Sap ing tơdroăng a ƀuôn Hwiê ăm hlo, vâ ăm môi troăng hơlâ pơkâ pêi ki kân châ mot tung tơdroăng rêh ối, ki kal má môi ôh tá xê cho pêi pro châ tiô tơdroăng pơkâ pêi ‘na mâu pơ’leăng mâ mơngế lơ ƀăng tơnêi, mê ối athế châ rak tơdroăng ki tơrŭm dêi kuăn pơlê ƀă mâu tơdroăng ki kơnía git dêi túa lĕm tro hiăng châ tơbêng ing hên mâu rơxông. Ƀă tơdroăng mê, bêng Ea Kao hiăng chêh pro túa pơkâ klâ xoăng ‘mot tơkŭm sap ing 25 chu ối 18 tíu pêi cheăng, tơdrêng amê hlối kơjo gum rak vế mâu pơlê cheăng ai hên tơdroăng ton nah ƀă túa lĕm tro dêi hdrông kuăn ngo Rơđế. Pôa Đặng Gia Duẩn, Kăn pơkuâ ngăn Đảng ủi bêng Ea Kao ăm ‘nâi:

“Ai hên tơdroăng pơkâ pêi séa ngăn tung tơdroăng ki ‘mot tơkŭm kố, tơdroăng ki kal châ riân troh apoăng. Ƀă mâu cheăm bêng ai khôi hmâ sap ing ton nah môi tiah pơlê cheăm mơngế Rơđế hdrối nah mê mơeăm rak vế ƀă mơnhông mâu tơdroăng ki kơnía ‘na túa lĕm tro chal krâ. Kuăn pơlê xuân ối tơmiât hên klêi kơ’nâi ‘mot tơkŭm mê mâu tơdroăng ki chêh pro hlá mơéa ga tiah lâi? La ngiâ ah Đảng ủi kô hnê mơhno mâu kăn ƀô̆ lăm chu troh a cheăm bêng, tôh kơphô̆ klêi kơ’nâi ‘mot tơkŭm vâ pơhlêh mâu hlá mơéa ki kal ăm kuăn pơlê ai tơdroăng ki rơhêng vâ ƀă kuăn pơlê chiâng vâ lăm pêi cheăng tơdjuôm vâ pơhlêh dêi mâu hlá mơéa klêi kơ’nâi ‘mot tơkŭm, ƀă malối tâi tâng mâu hlá mơéa kố pơrá pơhlêh tê kơtê”.

Túa pêi cheăng dêi bêng Ea Kao xuân cho túa ki xúa tơdjuôm dêi kong pơlê Dak Lak: ‘mot tơkŭm ôh tá xê cho ƀai toăn ‘na tơkŭm pơ’leăng mâ mơngế lơ ƀăng tơnêi ki chiâng xêh, mê ối athế riân troh tơdroăng túa lĕm tro ƀă tơtroăng tơrŭm dêi rêm kuăn pơlê.

Ki pơkâ pêi dêi Dak lak cho kơdroh tâi tâng thôn, pơlê, tôh kơphô̆ sap ing 2.801 tíu chu ối 1.556 tíu. Pôa Vũ Lê Các, Phŏ pơkuâ Khu ngăn kong pơlê, cheăm bêng ƀă hnoăng cheăng mâu kăn ƀô̆ kong pơlê Dak Lak ăm ‘nâi, tung pơla chêh pro túa pơkâ, Dak Lak đi đo ngăn nhuô̆m tơdroăng cheăng krê dêi rêm to thôn pơlê:

“Ƀă kong pơlê Dak Lak, tíu ai hên pơlê hdrông kuăn ngo rêh ối, ngin tơmâng ngăn khât troh tơdroăng ki rak vế mâu tơdroăng ki kơnía dêi túa lĕm tro khôi hmâ ƀă rak vế tơdroăng ki tơrŭm dêi kuăn pơlê. Xua mê, ƀă mâu cheăm bêng, thôn pơlê ki ai tơdroăng cheăng krê môi tiah kơpong hngế hngo, kơpong tíu tơkăng kong, kơpong tíu prôk lăm ki xơpá lơ mâu thôn pơlê ki ai khôi túa lĕm tro tơviah, mâu cheăm bêng kô séa ngăn tŭm mâu tơdroăng tiô pơkâ hdrối vâ pơkâ tơdroăng ki ‘mot tơkŭm thôn pơlê”.

Mơni klêi kơ’nâi ‘mot tơkŭm, môi péa to inâi ƀuôn kô ôh tá ai xếo tung hlá mơéa. La tâng túa lĕm tro xuân ối châ rak, tơdroăng ki tơrŭm pơla thôn pơlê xuân ối châ tơbêng ƀă kuăn pơlê xuân ối hlo tơná cho ngế ki ối tung mê dêi tơdroăng pơhlâh, mê rêm rôh ‘mot tơkŭm ôh tá xê tơdroăng ki hía lôi, mê rế hía cho tơdroăng ki pơxiâm ăm tơdroăng ki mơnhông nếo dêi mâu pơlê cheăm a kong ngo Dak Lak.