A cheăm Tà Hine, cheăm ki châ xing xoăng pro rế lĕm sap 24 thôn chu ối 12 to thôn. Tiô troăng hơlâ, pái thôn Đà Thành, Đà Phước ƀă Đà An kô tơ’mot chiâng thôn Đà An. Klêi tơ’mot rế lĕm, thôn nếo ai 775 rơpŏng ƀă lối 3.300 pơ‘leăng mâ mơngế, chiâng thôn ki kân má môi dêi cheăm. Pôa Hồ Đấu, Kăn hnê ngăn Chi ƀô̆ thôn Đà Phước, cheăm Tà Hine, kong pơlê Lâm Đồng ăm ‘nâi:

“Xing xoăng hnoăng cheăng mâu kăn vâ pro rế iâ mơngế la pêi cheăng tơbrê tâ mê, tơná á hlo vâ môi tuăn. A mơhnhôk kuăn pơlê, hnê kuăn pơlê thế pêi pro tro tiô troăng hơlâ dêi tơnêi têa ‘na xing xoăng pro rế lĕm thôn pơlê”.

Tơdrêng ƀă Tà Hine, cheăm Bảo Lâm 1 xuân tơbleăng pêi pro rế lĕm tro thôn tiô troăng pro iâ thôn, pêi cheăng tơbrê. Klêi xing xoăng pro rế lĕm, cheăm hiăng kơdroh ai 19 tíu pêi cheăng ƀă kơdroh 57 ngế pêi cheăng ki ôh tá hmâ, pêi mâu tơdroăng, veăng pro kơdroh kơxô̆ liăn ngân, mơdêk pêi tơbrê tơdroăng cheăng kal kí a kơpong kuăn pơlê ối.

Tiô pôa Nguyễn Đức Thanh, Phŏ kăn hnê ngăn Vi ƀan kuăn pơlê cheăm Bảo Lâm 1, tơdroăng mơjiâng troăng hơlâ tơ’mot châ pêi pro ing tơdroăng séa ngăn nhên mâu pơkâ ‘na kuăn pơlê ối, tơnêi kân rơdâ lơ ôh, tơnêi tíu mê lĕm lơ ôh, tơnêi tíu tơkăng, tơdroăng ton nah ‘na túa lĕm tro vâ môi tuăn dêi rơpó tung kuăn pơlê.

“Ngin tơmâng ngăn khât mâu tơdroăng ‘na kuăn pơlê, ‘na tơnêi tíu kân rơdâ lơ ôh, ‘na tơnêi tíu kong prâi, klêi mê ‘na tơnêi tíu tơkăng, tơdroăng tơbâ ton rôh nah ƀă ‘na mơhno túa lĕm tro vâ ngin tơ’mot thôn. Pro ti lâi vâ châ môi tuăn dêi kuăn pơlê tung tơdroăng tơ’mot thôn, vâ mơnhông cheăng kâ rêh ối pơlê pơla dêi cheăm, kong pơlê”.

Tiô séa ngăn dêi kong pơlê Lâm Đồng, nôkố lâp tung kong pơlê ai 2.773 thôn, tôh kuăn pơlê kơphô̆. Pêi pro tiô hnê mơhno dêi khu kăn pơkuâ hnê ngăn Đảng kong pơlê, mâu cheăm tung kong pơlê dế pê vâ klêi troăng hơlâ vâ kơdroh sap 50% kơxô̆ thôn, tôh kuăn pơlê kơphô̆ tơngi lêng klêi tơ’mot tơdjuôm xing xoăng pro rế lĕm. Ki môi tuăn dêi kuăn pơlê ƀă mơ-eăm dêi mâu kăn cheăm, tơdroăng pro rế lĕm thôn, tôh kuăn pơlê a kơphô̆ dế chôa lâng pro xiâm mơdêk ki pơxúa rak ngăn, pêi cheăng ăm kuăn pơlê krâu khât tâ, ai tiô púi vâ mơnhông tơƀrê tung mâu hơnăm la ngiâ.