Tung tơdroăng kơdrâm kơdrĕngm hơniap ong dêi Hâi tơkŭm xah hêi ro, tíu a Plông kân 16/4 pêng păm mơngiơk ếo pơtâk ƀă idrâp chuât dêi mâu prôa, têng nêng vâi krâ nah. Drêng tâng idrâp chuât hơkâ Paranưng, idrâp chuât keng Saranai chuât ro tơniâ tung ihiâm mơno kuăn mơngế, ngoh Davit, môi ngế tơmối troh ing kong têa Mih, phiu ro tối:

“Á hâk vâ tơmâng tơdrá prôa dêi mơngế Chăm, tâ ga trâu hơngế tung tuăn i hiâm, kơnâ tung tuăn tơmiât, hlê plĕng tơ’nôm ‘na ki tâ rơrêk tung ihiâm mơno kuăn mơngế. Kố cho ếo pơtâk vâi krâ nah dêi mơngế Chăm troh ing pơlê Mỹ Nghiệp, cho tơmeăm ki kal vâ rak ăm tơdroăng kơnía la ngiâ’’.

Hâi tơkŭm xah hêi ro hiăng chiâng môi um méa hên mơngiơk, kơdrâm kơdrĕng, hơniâp ong, phiu ro ƀă pêng păm tơdroăng pói vâ tung chal nếo. Tơdroăng ki mơhnhôk hâi tơkŭm xah hêi ro ôh tá xê to ối a mâu tơmeăm ki kơnía lĕm phá tơ-ê mê ối cho tuăn ihiâm mơno tơdjêp, tơkŭm ro tơniâ dêi kuăn pơlê ing lâp lu mâu kơpong. Ối tung dế plông kân eăng lĕm hlá cơ reăng, pôa Mô Ha Mad, troh ing kong pơlê An Giang, phiu ro tối:

“Ki lĕm má môi dêi rêm kơpong châ mơhno. Á cho mơngế Chăm khôp Islam, ƀă akố cho Chăm Bà Ni, Chăm H’Roi...Rêm kơpong ai ki lĕm phá tơ-ê krê, ai tơdroăng ki môi tiah, ing mê, thăm tơrŭm môi tuăn”.

Hâi tơkŭm xah hêi ro Khôi túa lĕm tro hdrông kuăn ngo Chăm ƀă po lâp tơnêi têa cho mơnhên rêh pơlê pơla ăm troăng hiu ôh tá kâi tui dêi khôi túa lĕm tro hdrông kuăn ngo tung rơxông pơhlêh nếo. Ƀă kong pơlê Khánh Hòa, Hâi tơkŭm xah hêi ro ai kơnâ kal khât. Klêi kơ’nâi mot chiâng môi, Khánh Hòa pơkuâ môi tíu mơnhông nếo - tíu tơkŭm hên tơmeăm kơnía rôh nah, têa kơxĭ rơlố rơtế hên tơmeăm ki kơnâ kân ôm hyô, khoa hok kŏng ngê̆ ƀă cheăng kâ têa kơxĭ. Kố cho ki tơ’lêi hlâu vâ kong pơlê tơdjêp tơtro pơla rak vế tơmeăm kơnía ƀă mơnhông krá tơniăn, pơla rak khôi túa lĕm tro ƀă pơhlêh nếo tơmiât pêi rơkê. Mơnhên ki kal dêi tơdroăng rak xiâm rêi tơmeăm kơnía, pôa Nguyễn Việt Nam Hùng, Kăn hnê ngăn Vi ƀan kong pơlê Khánh Hòa tối nhên:

“Ngin loi tơngah vâ prôk rĕng thế mơ’no liăn ăm hngêi trăng troăng klông, laga vâ prôk hơngế thế mơ’no liăn ăm khôi túa lĕm tro, ăm kuăn mơngế. Mê ôh tá xê to rah dêi kong pơlê Khánh Hòa mê cho hnoăng dêi kong pơlê Khánh Hòa ƀă tơdroăng mơnhông krá tơniăn dêi tơnêi têa, dêi hdrông kuăn ngo. Rêm rơxông bu kal prôk ƀă tơnêi têa môi troăng laga xuân khôi túa lĕm tro kô prôk rơtế hdrông kuăn ngo troh tá ah’’.

Vâ pêi pro tơdroăng tơmiât pêi mê, Khánh Hòa dế thăm tơrŭm ƀă mâu khu xiâm, kơvâ cheăng tơnêi têa, mâu ngế cheăng khoa hok ƀă kŏng ngê̆ vâ mơjiâng hô sơ UNESCO chêh inâi tơmeăm kơnía ‘na ihiâm mơno  “Pêi pro tơdroăng loi tĭng koh pleăng Mẫu Thiên Y Ana'’ dêi hdrông kuăn ngo Chăm tung Inâi chêh tơmeăm kơnía khôi túa lĕm tro '‘na ihiâm mơno teăng mâ dêi kuăn mơngế. Nôkố Khánh Hòa tơmiât la ngiâ mơnhông hnoăng cho tíu xiâm rak vế, hriăn plĕng ƀă mơđah tơbleăng khôi túa lĕm tro Chăm dêi lâp kơpong tơbăng peăng Tơdế Tơnêi têa ƀă Tây Nguyên.