Tung mâu hâi dêi mơ’nui măng tĭng achê kố, kơpong long Ea Kao, bêng Ea Kao, kong pơlê Dak Lak chiâng tíu ki hên rơpâu ngế kuăn pơlê ƀă tơmối troh. Mâu troh pêi pro drêng troh akố vâi pro hơpăm xah hêi pơtân, to SUP, kơ’’nêi kleăng  ki vâi xah pro lơ xah to pa rơxut mơnúa vâ tâ ki rơ iô pro chiâng tơdroăng xah hêi ki nếo, vâ tí tăng ‘nâi ki rơ oh  hlối rơtế ƀă kong ké lĕm rơngiâp. Ing môi kơpong long têa hdrối nah rơhíng rơhôi, long Ea Kao dé chôa lâng chiâng tíu hên ngế lăm troh a hâi mơ’nui măng tĭng ƀă mâu kuăn pơlê ƀă tơmối ki ôm hyô. Pôa Lê Trương Quân, ố a  buôn Cư Mlim, cheăm Ea Kao hâk tơngăm drêng tíu kố chiâng tíu hên ngế vâ troh ôm hyô.

''To lâi hâi kố a hlo tơmối troh a long Ea Kao krâm ‘nnâng, malối a peăng kong xêi. A kố mâu tơdroăng xah hêi pro hơpăm, to plong, hơdruê, tơmối troh tâ phiu ro, kơdrâm  mơngế lem ro. A xuân tâng tối ai tơdroăng tơkâa bro  plông xah golf a Ea Kao la ta troh nôkố xuân hâi hlo pro pro, xuân tơngah vâi pro ăm Ea Kao rế lĕm tâ, hên tơmối vâ troh tâ, kuăn pơlê kô ai tơ’nôm hnoăng cheăng pêi vâ mơdró kâ''.

Tơdroăng tơkêa pro plông xah golf Ea Kao hiăng chêh tung hlá mơ-éa pơkâ hdró ing hên hơnăm kố la troh nôkố xuân hâi hlo tơbleăng pro. Tâng châ ‘no liăn tơdâng pro tơdrêng ƀă tíu pơtê ối, tê mơdró ƀă mơdró ôm hyô ki mơnúa vâ ‘nâi rơtâ tá long, kơpong ki kố kô châ pêi cheăng tơ ƀrê tâ ‘na tơnêi tíu ôm hêi, hlối kum hên ngế ai cheăng pêi ƀă rế mơdêk ki pơxúa ăm ‘na ôm hyô kong pơlê.

Dak Lak ai tơmeăm khoăng vâ pro tíu ôm hyô kân la troh nôkố xuân hâi ai plông xa golf ki pro tro tiô pơkâ.  Tung mê, ôm hyô xah golf cho tơdroăng ôm hyô ki dế tâk rĕng, tơ’mot khu tơmối ki pêi lo liăn hên ƀă hêi khế ối pơtê hlối ton hâi. Xua ti mê, pơkâ hdró nếo ‘nâi nhên mơnhông 6 tơdroăng tơkêa bro plông golf ƀă tâi tâng kơxô̆ liăn  lối 11.000 rơtal liăn a Ea Kao, Buôn Đôn, Bình Kiến, Tuy An Nam ƀă hên tíu ki ê vâ mơjiâng tíu ôm hyô xah golf rơ tế ƀă  pơtê ối, túa lĕm tro ƀă hyô ngăn tíu ki lĕm. Tiô pôa Trần Tiến Lợi, Kăn hnê ngăn Khu ngăn tơnêi tơníu kong pơlê Dak Lak tối, kố cho tíu ki tơ’lêi tơƀrê ăm tơdroăng ôm hyô a kong pơlê.

“Pin ôh tá chiâng ngăn golf cho môi túa môn tơ’noăng ivá xah hêi tê mê ối cho kơ vâ cheăng kâ ôm hyô ki xiâm. Mơ jiâng khu tơrŭm, mơjiâng tơrŭm krá, plông xah golf, tơ riah tơƀai, tíu pơtê ối ƀă tíu troh, vâ mơjiâng tơmeăm ôm hyo ki hlâu. Mâu tơdroăng tơkêa pơkâ pro golf ki lĕm tro hiăng pro chiâng mâu kơpong tơnêi khăng kơ tô chiâng mâu tơnêi mêa, châ mơ jiâng pro chât rơpâu tơdroăng cheăng pêi”.

Ôh ti xê to plông golf, pơkâ hdró xuân ‘mâi hơ’lêh klêi tơ‘mot mê ối po tíu mơnhông ôm hyô nếo drêng kal roh apoăng Dak Lak tơkŭm hlối hlâu ăm kong ngo ƀă têa kơxĭ. Tung inâi 257 tơdroăng tơkêa bro pêi ahdrối tơ’mot ‘no liăn pro apoăng, ai 32 tơdroăng tơkêa bro dêi kơvâ ôm hyô pơtê ối, pông golf ƀă pơtâp ivá ƀă tâi tâng kơxô̆ liăn vâ chê 127 rơpâu rơtal liăn. Kôpng peăng mâ hâi Lo hâ mơjiâng pro tíu pơtê ối a têa kơxĭ, plông golf ƀă kơphô̆ ôm hyô; peăng mâ hâi Lu ai kong kân, tơnêi chiâk deăng ƀă túa lĕm tro dêi vâ chê 50 hdroâng mơngế vâ vâ mơjiâng pro mâu tơmeăm ôm hyô ki krê xêh.

Tiô pôa Lê Phúc Long, Phŏ kăn pơkuâ ngăn Túa lĕm tro, tơ’noăng ivá ƀă ôm hyô kong pơlê Dak Lak, pơkâ hdrói rôh kố ôh ti xê to po rơdâ tíu mơnhông tơbrê mê ối pro xiâm  ki tro luât  kal vâ tơ’mot mâu khu ‘no liăn pro.

“Kô cho tơdroăng ki pêi pro tro luât ki kal má môi vâ tơ’mot, krếo mâu khu ‘no liăn hên vâ pêi cheăng cho tơdroăng kal tơmâng khât dtroh mâu khu tơrŭm cheăng ôm hyô, pro tíu pơtê ối ngăn nhâ loăng kong ngế ki lĕm. Pơkâ dêi ôm hyô Dak Lak tung la ngiâ  cho ‘no liăn mơjiâng pro mâu tơmeăm ôm hyô lĕm, krúa, krá kak hlối hmâ ƀă hyôh kong prâi”.

Vâ mâu troăng hơlâ pơkâ thế rĕng pêi tâ chiâng xêt khât, Dak Lak ‘nâi nhên tơdrêng ƀă pê klêi tơmeăm khoăng kô tơmâng mơjiâng môi tơdroăng ‘no liăn pêi cheăng tơdrăng, hbrâ tăng tơnêi ki lĕm, tah ki tơvâ tơvân ‘na tơnêi vâ pro tơmeăm khoăng hlối rơtế ƀă khu mơdró tung pơla   tơbleăng tơdroăng tơkêa bro. Pôa Đỗ Hữu Huy, Kăn hnê ngăn Vi ƀan Kuăn pơlê kong pơlê Dak Lak tối:

“Kong pơlê Dak Lak tơhrâ rơtế tơrŭm ƀă khu mơdró tung tâi tâng tơdroăng cheăng dêi rơdroăng tơkêa bro, tơhrâ hbrâ tơnêi lĕm, mơdêk tơdroăng chêl thiăn, kơjo kum, pro pơlê nếo, xo tơnêi vâ pro tơmeăm khoăng. Ƀă mâu tơdroăng tơkêa bro a tíu ki kal, tơdroăng pêi pro kô tơdâk kân troh cheăng kâ  rêh ối pơlê pơla dêi kong pơlê, kăn hnê ngăn kong pơlê kô hnê mơhno tah ki xơpá, tơvâ tơvân, tơniăn tơdroăng xo tơnêi chêl thiăn  hlối pêi tơdrêng, tro pơkâ”.

          Ing tơdroăng rêh ối dế vâ mơjiâng pro pa kĭng long Ea Kao troh mâ ngăn mâu tơdroăng vâ mơjiâng pro ton hơnăm a kong ngo troh a têa kơxĭ, Dak Lak dế ai rôh tơ’lêi hlâu vâ mơnhông po rơdâ tíu ôm hyô.