Pôa pơkâ thế mâu Khu xiâm kơvâ cheăng kong pơlê hlê plĕng pêi pro tơ’nôm “pái tơdroăng ki pơhlêh kân”, tơtro ƀă khôi túa lĕm tro rêh ối pơlê pơla chuh nghiah Việt Nam tung hneăng nếo. Mê cho: pơhlêh ing troăng tơmiât ngăn khôi túa lĕm tro cho môi kơvâ mơnhông chiâng mơjiâng khôi túa lĕm tro cho xiâm kối ihiâm mơno dêi pơlê pơla; pơhlêh ing tíu khôi túa lĕm tro tiô khôi vâi krâ nah chiâng mơnhông khôi túa lĕm tro tung tá tíu rêh ối hâi kố ƀă tung kŏng ngê̆ măng internet; pơhlêh ing troăng tơmiât rak vế cho tơdjêp krá tơniăn pơla rak vế ƀă tơmiêt pêi rơkê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên; Thăm mơdêk mơjiâng hnoăng pơkuâ khôi túa lĕm tro tung măng internet mơdêk tơdroăng ki pro vâi hâk vâ, tơdroăng ki troh lâp lu ƀă gâk kring mâu ki kơnâ khôi túa lĕm tro Việt Nam. Tung troăng hyôh măng internet, tơdroăng ki tơkok, pơtối pro pơhlêh khôi túa lĕm tro cho tơdroăng ki kal pêi pro, pro tơ’lêi hlâu vâ Việt Nam tơmâng xo ki lĕm khôi túa lĕm tro kuăn mơngế, laga tơdrêng amê xuân pơkâ kal thế mơdêk ivá pơkuâ xêh, tơdroăng ki chiâng mơnhên troăng prôk la ngiâ ƀă ivá kâi trâng dêi khôi túa lĕm tro hdrông mơngế.