Veăng a lâm hnê hriâm ai 30 ngế hriâm cho rơtăm phô̆m xông kân ƀă ngê̆ nhân mơngế Rơđế a cheăm Ea Phê. Tung plâ 25 hâi hriâm, mâu ngế mơhriâm châ Ngê̆ sih ưu tú Y Phôn Ksơr ƀă Ngê̆ sih ưu tú Vũ Lân tơdrêng hnê tôu chêng koăng, kơhnhon xuăng ƀă hnê mâu ƀai chêng tiô khôi vâi krâ nah dêi mơngế Rơđế. Rơtế ƀă hriâm lĭ thuyết, ngế hriâm kô châ pơtâp tôu, tơdrêng amê chêh tung kơxop mơ-éa, quay video, ‘măn ‘noăng chư chêh tung kơmăi tĭnh gum tung tơdroăng rak vế tơmeăm kơnía. O Y Li San Kbuôr, ối a ƀuôn Puăn, cheăm Ea Phê hâk ro:

“Pơlê ối ai khu tôu chêng koăng, á hâk vâ ‘nâng. Á vâ hriâm tôu chêng koăng vâ veăng tung khu chêng koăng. Hâi kố châ hriâm á hlo sôk ro ‘nâng”.

Hdrối mê, hâi lơ 7/7, kơvâ khôi túa lĕm tro pơxiâm po lâm hnê tôu hơkâ tơpéa, koăng 3, chêng 5 dêi hdrông kuăn ngo Bơhnéa a thôn Xí Thoại, cheăm Xuân Lãnh; hâi lơ 8/7 pơxiâm po lâm hnê tôu hơkâ tơpéa, koăng 3, chêng 5 hlối kơhnhon xuăng dêi hdrông kuăn ngo Chăm Hroi a Hngêi trung Phôh thong Hdrông kuăn ngo ai tíu kâ koi ối pơtê Đinh Núp, cheăm Phú Mỡ. Rơtế ƀă lâm a Ea Phê, rôh kố Dak Lak po 3 lâm hnê khôi túa lĕm tro hdrông kuăn ngo, rêm lâm 30 ngế hriâm ƀă tiô tối hdrối kêi đeăng hdrối hâi lơ 30/8.

Tiô jâ Nguyễn Thụy Phương Hiếu, Phŏ Kăn pơkuâ Khu pơkuâ Khôi túa lĕm tro, Tơ’noăng ivá ƀă Ôm hyô kong pơlê Dak Lak, klêi 3 lâm hnê apoăng, kơvâ khôi túa lĕm tro kô pơtối po tơ’nôm hên lâm ing Tơdroăng pơkâ xiâm tơnêi têa ƀă pêi pro mâu troăng hơlâ  nếo ‘na rak vế khôi túa lĕm tro chêng koăng.

“Mâu lâm hnê kố pêi pro tiô Tơdroăng 1719 pơtroh kơxô̆ liăn hơnăm 2025 troh, ki u ối dêi tơdroăng hơnăm 2026 mê kô ai hên lâm hnê pơtâp nếo, tơkŭm pêi pro tiô tơdroăng xiâm Tơdroăng pêi pro kơxô̆ 14 dêi kong pơlê xuân môi tiah Tơdroăng pơkâ kơxô̆ 03. Xuân pói vâ cho mâu cheăm, bêng mơjiâng mâu khu chêng koăng tiô pơkâ nếo dêi Tơdroăng pơkâ 215 dêi Chin phuh, drêng mot pêi cheăng mê nếo châ troăng hơlâ tŏng gum cho lĕm tro ‘nâng”.