Kố cho tíu hdrối hơnăm 2018 châ ngăn cho ‘’tíu tô’’ ai mơngế xôi ‘na ma tŭi dêi kơpong Tây Bắc, laga nôkố hiăng chiâng kơpong tơnêi tơniăn lĕm, cheăng kâ - rêh ối pơlê pơla châ mơnhông mơdêk, kuăn pơlê ai tơdroăng rêh ối phâi hơtô, hơniêp lĕm, mơhnhôk tơmối ôm hyô tung tơnêi têa ƀă kong têa ê.

Teăng mâ kăn pơkuâ Đảng, Tơnêi têa, pơtroh rơkong troh mâu kăn teăng mâ ƀă tâi tâng Kuăn pơlê tung pơlê rơkong kơ-êng tâi ihiâm mơno, rơkong rơkâu lĕm má môi, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên, tơkâ hluâ 21 hơnăm, Hâi tơkŭm xah hêi ro tâi tâng kuăn pơlê gâk kring Tơnêi têa hiăng chiâng tơdroăng cheăng pêi rêm hơnăm, ai ki kơnâ kân, gum pro kro mơdrŏng tơ’nôm ivá tơnăng pêi dêi tơná kăch măng, khôi túa vâi krâ nah pâ nhuô̆m tơnêi têa, ihiâm mơno hdrông kuăn ngo, pơ-ôu pơ-eăng ivá ó rơdêi pơlê pơla.

Tối, pêi pro gâk kring Tơnêi têa cho vâ mơjiâng tíu ki lĕm ăm mơnhông mơdêk cheăng kâ - rêh ối pơlê pơla, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa xuân pơkâ thế, Pơlê Loóng Luông, cheăm Vân Hồ tối krê, kong pơlê Sơn La tối tơdjuôm kal thăm mơjiâng, po rơdâ mâu troăng mơnhông tung mơnhông cheăng kâ – rêh ối pơlê pơla vâ rêm rơpŏng, rêm kuăn pơlê ai tơdroăng rêh ối lĕm tro tâ, kro mơdrŏng tâ, pơkâ cho Kuăn pơlê châ tơniăn lĕm, ai tơdroăng rêh ối rế hía rế lĕm tro tâ.

Rôh kố, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế mâu kăn pơkuâ Đảng, Tơnêi têa hiăng diâp hên kơxuô tơmeăm diâp ăm khu râ kăn pơkuâ hnê ngăn Đảng, khu râ kăn pơkuâ pơlê Lóng Luông ƀă cheăm Vân Hồ; ngế ki kuăn pơlê loi tơngah, krâ pơlê, kăn pơkuâ pơlê châ tơƀrê tung tơdroăng gâk kring Tơnêi têa ƀă mâu ngế tung khu gâk kring ki má môi tung kong pơlê; mâu rơpŏng ai hnoăng tơnêi têa tŏng gum, rơpŏng ai tơdroăng rêh ối pá puât.