Tung 6 khế apoăng hơnăm, Hô̆i đong hnê ngăn rêm râ kong pơlê Dak Lak hiăng tơbleăng hên tơdroăng cheăng pêi ki kal tung pơla nếo pơcháu hnoăng cheăng, nếo klâ xoăng ‘mot tơkŭm kơ koan cheăng tơnêi têa tiô túa pơkâ kăn pơkuâ kong pơlê péa râ. Hô̆i đong hnê ngăn râ kong pơlê hiăng tơkŭm po 4 hneăng hôp, pơkâ 46 tơdroăng; po hôp tiâ mơnhên tơdrêng châ pơhlêh nếo, tơkŭm tung mâu tơdroăng ki kuăn pơlê kal vâ ‘nâi. Cheăng trâm mâ kuăn pơlê châ rak vế đi đo, tơdah xo lối 788 rơkong tơpui, pâ thế vâ pơtroh ăm kơ koan ai hnoăng pơkuâ séa ngăn, tơleăng.

A râ cheăm, Hô̆i đong hnê ngăn mâu cheăm bêng hiăng tơkŭm po lối 400 hneăng hôp, tơbleăng lối 2.000 pơkâ; pêi pro vâ chê 230 rôh lăm ngăn tơdroăng kal ƀă 58 rôh lăm séa ngăn, lêi tah hên mâu tơdroăng xơpá dế trâm a cheăm bêng.

‘Na mâu tơdroăng ki tơvâ tơvân, hên rơkong tối tiah kố, khu kăn ki pơkuâ a râ cheăm ối iâ, tơdroăng lăm ngăn, tiâ mơnhên tá hâi tơ’mô; cheăng chêh ‘măn tơdroăng kal tung internet ƀă ứng dụng túa pêi cheăng “hôp ôh tá kal ai mơ-éa vâ chêh” ối hrá. Mâu kăn pâ thế thăm mơnhông hnê hriâm tơdroăng cheăng, chêh pro klêi troăng hơlâ tơrŭm pơla Hô̆i đong hnê ngăn ƀă Vi ƀan hnê ngăn kong pơlê ƀă mâu kơ koan pêi cheăng, tơdrêng amê hlối mơdêk rơdêi ứng dụng kong ngê̆ thong tin vâ mơdêk tơƀrê tơdroăng cheăng dêi kơ koan kuăn pơlê pôk.

Tơpui mơgêi rôh hôp, jâ Cao Thị Hòa An, Ngế cheăng tung Tíu xiâm Đảng, Phŏ pơkuâ hnê ngăn Đảng kong pơlê, Kăn hnê ngăn Hô̆i đong kong pơlê Dak Lak, pơkâ thế Hô̆i đong hnê ngăn rêm râ pơtối séa ngăn kơtăng mâu tơdroăng ki ai khât a cheăm bêng, tơmâng mâu tơdroăng tơpui tối, pâ thế tơdroăng púi rơhêng vâ dêi kuăn pơlê vâ teăm tơbleăng tơdrêng, pâ thế ƀă râ ki ai hnoăng. Tơdrêng amê hlối, thăm mơnhông séa ngăn cheăng pêi pro mâu pơkâ, tơdroăng tơkêa bro ki kal. Jâ Cao Thị Hòa An tối nhên:

“Hnoăng dêi Hô̆i đong hnê ngăn kong pơlê athế lăm tí tăng, ‘nâi nhên, tíu ki lâi tro kreăng vâ tơbleăng ăm Đảng. La ƀă tơdroăng ki tŏng gum ăm Vi ƀan tơbleăng ing troăng hơlâ, tơdroăng ki séa ngăn, lăm ngăn vâ tơleăng mâu tơdroăng. Ai kăn ƀô̆ ki ‘nâ vâi ví há lơ ôh? Ai kăn ƀô̆ ki ‘nâ ôh tá khên tơmiât, ôh tá khên pêi há lơ ôh? Ƀă tơdroăng cheăng dêi Hô̆i đong hnê ngăn kuăn pơlê rêm râ cho kal châ pơhlêh nếo rơdêi tâ, rơtế veăng pêi, rơtế veăng tơrŭm mê nếo pêi klêi tơdroăng cheăng”.